Ramos Horta halo kampaña fo'er tebes, la merese sai Prezidenti da Repúblika

Oan Kiak

Dala ida tan, ita ba hili ita nia Prezidenti da Repúblika hodi ukun ita durante tinan lima nia laran, tanba ida ne’e ita tenki ke hili didiak hodi povu bele moris diak, iha demokrasia no paz nia laran.

Iha primeira volta hau vota ba hau nia Maun Boot Jeneral Lere Anan Timur maibe iha segundu volta hau sei vota ba Maun Lu tanba lakohi vota ba ema ida ke hakarak sobu no halo krizi iha hau rai doben.

Maun Ramos Horta durante ninia kampaña nia hatudo ba ita hotu katak nia laiha respeitu ba povu kiik, laiha respeitu ba ita nia Prezidenti da Repúblika, laiha respeitu ba ita nia maun/alin ke servisu iha rai liur nomos laiha respeitu ba ita nia eroi sira, ita nian guerrilheiro sira hosi FALINTIL.

Maun Ramos husik iha ninia kampaña Maun Xanana ba iha palku leten no insulta barak tebes ita nia Prezidente da Repúblika, insulta fali orgaun soberania ida ba ita nia povu. Sa líder maka halo ida ne’e? Moral ka respeito lakon hotu ona. Maun Ramos hanesan Premio Nobel da Paz devia kuda paz laos ódio no husik ema insulta ema iha nia kampaña, liu-liu insulta ita nia Prezidenti. Imi karik moras mental ona, tenke ba trata lae. Imi moe oituan ba. 

Bainhira hau haree Maun Horta nia TBO iha palku leten no insulta ita nia maun/alin ke servisu iha rai liur hau moe, hau moe boot. Ita nia ema ke servisu iha rai liur, sira ema onrado, laos ema naokten hanesan balun ke servisu ba imi. Sira servisu hodi sustenta sira nia famillia, laos hanesan imi nia TBO sira ke re’i imi nia ain hodi hetan kadeira ka projetu hodi hamutuk estraga povu nia osan, durante imi nia ukun maka fo’o projetu barak ba imi nia famillia nomos ba imi nia TBO sira. Ida ne’e maka imi dehan imi hatene ukun, hatene ukun ba ema balun deit, povu kiik kuitadu la haree benefisiu nein ida. 

Hau nia aman no maun ida mate ho FALINTIL no bainhira hau rona imi nia TBO iha palku leten insulta ita nia guerreleiru FALINTIL hau sente revoltadu tebes, imi nia TBO dehan katak ema fuik husi ai laran la matenek no labele ukun? Tebes ka? 

Hau husu ba TBO ida ne’e, saida maka ema matenek konesidu iha mundu nia leet, saida maka nia halo ba ita nia povu bainhira nia ukun ita? La halo buat nein ida, ita la hetan nia iha Timor Lorosae, ninia palasiu prezidensial maka aviaun, tun sae hodi ba pasiar ba rai liur ho povu nia osan, tanba ida ne’e maka mundu hotu konese nia? 

Maun Xanana no Maun Horta nia TBO sira moe laiha, imi politika foer no dois tebes, TBO sira sei faan sira nia inan no aman hodi hetan kadeira no projetu. TBO sira ne’e moral laiha, imi aat liu balada fuik.

Se sira seidauk ukun sira insulta ona povu, FALINTIL no ita nia Prezidente imajina bainhira sira kaer ukun. 

Vota ba Ramos Horta hanesan vota ba insulta povu, laiha respeito ba ita nia orgaun soberania nomos vota ba krizi no instabilidade. Maun Ramos nia kampaña hatudu momos katak nia kandidatura nakonu ho TBO, ema oportunista, malkriadu no traidores da pátria. 

Iha loron dia 19 vota ba estabilidade, paz, domin, democrasia no moris diak, vota Maun Luolo. Ramos Horta halo kampaña fo'er tebes, la merese sai Prezidenti da Repúblika.

 

Dame ba ita hotu, dame ba ita nia rai doben, Timor Lorosae.