Keta bosok Ramos-Horta, keta bosok...

Zizi Pedruco

Ohin hau mai iha nee hodi explica ba leitor sira katak bandeira CNRT ke povu ba vota iha referendum laos bandeira partido CNRT, tio Alexandre (Xanana) nian.

Durante luta naruk hodi hetan independensia Xanana Gusmão toma desizaun ida katak FALINTIL tenki sai organizasaun independente la bele iha ligasaun ho partidu ida. Iha tinan 1988 Xanana husik Fretilin no harí Conselho Nacional de Resistência Maubere (CNRM) no Tio Alexandre assume lideransa no Ramos-Horta sai CNRM nia porta-voz iha rai liur.

Maibe Timor Oan barak ladun gosta naran Maubere iha organizasaun ida ne’e no lakohi hola parte organizasaun ida ne’e, liu-liu ema UDT, ida maka hau nia aman belun boot ida (sira rua matebian ona) no senhor ida ne'e Ramos-Horta nia rian. 

Ba colonialista sira :) , bolu povu Timor povu Maubere sai ofensa boot ida tanba ofensa ba povu, hanesan bolu povu beik. Hau pessoalmente gosta barak naran Maubere tanba ida ne’e maka Timor oan nia identidade, se maka la gosta imi nia problema.

VIVA O POVO MAUBERE! 

Ah, iha tinan 1998 Maubere Oan hosi partidu hotu-hotu ba reuniaun boot ida iha Peniche, Portugal, no hotu-hotu konkorda atu tama ba CNRM maibe tenke naran foun (hasai Maubere) no sira troka CNRM ba CNRT, Conselho Nacional da Resistência Timorense, los ka lae Ramos-Horta? Los!

Bainhira Maubere Oan ba vota iha referendum 1999, iha boletin de votu iha foto rua, ida maka Indonésia nia bandeira no seluk bandeira CNRT (1998) nian, laos bandeira CNRT 2007 nian, ne’e buat seluk, lolos bandeira CNRT 1998 nian hanesan  ho bandeira FALINTIL nian. Nune'e Mari Alkatiri koalia los duni, Ramos-Horta maka karik halimar iha Facebook ho ita, no karik hakarak lohi fali ita. Ema diplomata ita hatene ona, 24 horas no sira troka kedas sira nia hanoin...:)

TANBA SA RAMOS-HORTA NIA PAJINA IHA FACEBOOK BLOCK HAU? :) SIRA NIA DEMOKRASIA MAKA NE'E ONA.

Keta bosok Ramos-Horta, keta bosok...

Naran mos la hanesan, CNRT 1998 naran maka Conselho Nacional de Resistência Timorense no CNRT partidu politiku Xanana harí maka, Congresso Nacional de Reconstrução Timorense.  

Ita la bele troka História Timor-Leste nian, ita tenki respeitu ita nia povu nia luta no terus hodi hetan independensia, ita la bele troka História tanba buka kadeira no hakarak lohi povu. 

Maun Taur karik los duni, Horta bosok tun sae la halimar!

Iha tinan 2001 Xanana rasik maka dissolve CNRT ke sira hotu harí iha Portugal, le’e Kay Rala nia discurso iha ne’e.

Bandeira ke Maubere Oan vota iha referendum CNRT nian duni maibe laos imi nia CNRT ke imi kria iha tinan 2007. 

Keta bosok Ramos-Horta, keta bosok...