Igreja Katólika Fó Atensaun ba Horta Labele Hamosu 'Krize Foun'

Tempo Timor 

Tempotimor (Dili)-Igreja Katòlika Timor-Leste liuhusi Konferèsia Episkopàl Timorense ho Komisaun Nasionál ba Justisa no Páz (CET-CNJP) fó atensaun ba Prezidente Repúblika eleitu, José Ramos Horta atu lebele aumenta krize foun maibé buka dalan oinsá solusiona problema atuál iha rai laran.

“E nia (Horta) mai, ami fó hanoin atubele servisu didi’ak hanesan Xefe estadu aman ba nasaun. Se ita mai ita hahú, tanba problema ruma mak ita mai, mai atu rezolve problema la'ós atu aumenta problema, ida ne'e mak husi ami-nia hanoin, fó solusaun ba problema sira ne'ebé mak iha, e buat di'ak ruma ne'ebé iha ona, lori ida ne'e ba oin, buat ne'ebé mak ladún di'ak husik hela”, dehan Jurista Padre Julio Crispim Belo Ximenes, hafoin enkontru ho Prezidente Repúblika Eleitu Horta iha sede CNJP, Balide, kuarta (27/04).

Tanba, dadaun ne'e Timor-Leste iha hela situasaun krize naruk, COVID-19, ho situasaun ne'e hotu, agora monu tama tan ho krize ekonomika atual ne'ebé kauza husi guerra Ukraina ho Russia nian.

Ho situasaun sira ne'e hotu mak lori Komisaun Nasionál Justisa no Paz hanoin katak Prezidente Repúblika eleitu ninia prezensa, seidauk lori kestaun ruma mai atu ko’alia ho Komisaun Nasionál Justisa no Paz maibé mai halo diálogu oinsá bele la'o hamutuk, bele servisu hamutuk, bele fó hanoin ba malu.

Maske ajenda konkretu seidauk iha, maibé parte uma kreda dadaun komesa fó ona hanoin inklui simu mós hanoin balun husi parte prezidénsia nian.

Iha ne'e, igreja katólika pesoál no instituisionalmente agradese tanba ba José Ramos Horta ne'ebé foin eleitu bele mai vizita konferénsia Episkopál ninia misaun nasionál ba justisa no baze intergridade.

“Ami pesoál no instituisionalmente ami fó parabéns ba doutor Ramos Horta ninia kandidatura, ninia eleitu”, hatete nia.

Ho mandatu Prezidente Repúblika ne'e Horta sei asume iha loron 19 fulan-Maiu 2022, husu atu servisu didi’ak no tenke sai xefe estadu ida ne'ebé sai aman duni ba nasaun.

Tanba prioridade sira ne'ebe agora prezidente eleitu atu halo mak hadi’a povu nia moris, situasaun sira ne'ebé mak Timor-Leste liliu problema folin sasán ne'eb’e sa'e hanesan mina masa ida husi $4 dolar sa'e ba $9 dolar ne'e preokupasaun boot tebes.

“Ida ne'e sai prioridade oinsá mak ita-nia ukun na'in sira atu rezolve solusiona, foos mós sa'e hotu, buat hothotu iha merkadu sa'e ne'e oinsá mak ita-nia boot sira rezolve. Ida ne'e ha'u hanoin prioridade liu duke ita hanoin atu solusiona buat sira ne'ebé mak instituisionalmente ita haree ladún di'ak iha dalan seluk atu rezolve”, esplika nia.

Rezolve situasaun krize ne'e iha dalan barak atu solusiona, maibé igreja hanoin katak prezidente eleitu kuandu ezerse ona ninia papél ne'e ninia funsaun mak tenke buka atu oinsá rezolve uluk problema sira ne'ebé prioridade ho urjente liu ne'ebé mak lorloron povu hasoru.

“Duke problema instituisionál, pur ezemu hanesan dizolve parlamentu, demite Governu, serake ne'e prioridade ba inisiu mandatu doutor Horta nian ka la’e?. Ida ne'e depende ba prezidente mak sei halo, maibé ita hakarak katak buat hotu la'o tuir konstituisaun no lei, ida ne'e mak ita hakarak”, afirma nia. (*)