Taur:“La’o ho Mari Alkatiri no Fretilin to’o mate"

Timor Hau Nian Doben

Horiseik iha konferénsia nasional Partidu Libertasaun Popular (PLP) nian, Primeiru-ministru, Taur Matan Ruak, hatete katak,sei “La’o ho Mari Alkatiri no Fretilin to’o mate”.

““Saida maka ita atu selu ba Maun Mari Alkatiri? Iha 2017 Maun Mari telefone ha’u atu fila ba Fretilin, ha’u hatan deskulpa maun ha’u la ba ona. Bou Naimori mos halai tiha. Kuandu CNRT so’e ami na’in rua nia mai fali. Lolós ne’e nia dehan hanesan ne’e; Matan Ruak, uluk ó halo ba ha’u, agora o simu o nian. Maibé nia la halo ida ne’e. Tanba ne’e saida maka ita halo? La’o ho nia to’o mate.”

Primeiru-ministru (PM) mos hatete katak nia sei ba hasai férias hodi ba halo kampãna eleitoral ba kandidatu Fretilian nian, Lu-Olo.

Taur Matan Ruak mos husu ba militante hotu-hotu hodi fo’o apoiu ba Lu-Olo.

“Militante hotu-hotu tenke mantein pozisaun ida ne’e (apoiu Lu-Olo) no assegura katak ami sei hamutuk to’o 2023 no fo’o vitória ba Lu-Olo”, nia dehan.

Bainhira jornalista sira husu ba PM kona nia feen, Dra. Isabel Ferreira, fo’o ninia apoiu ba kandidatura Ramos-Horta nian, Matan Ruak responde katak “ iha ami nia uma laran ami pratika demokrasia”.

Primeiru-ministro  iha nia diskursu nia kompara kandidatu Fretilin nian ho Maromak.

““Ita tenke buka ema ida hanesan Jesus. Hatene terus para salva ema. Ema ida ne’ebé ema trata, nia nonok de’it, ema tolok nia nonok de’it, ema insulta nia nonok de’it, hanesan Jesus. Ema ne’e maka naran Lú Olo”, afirmou.

Matan Ruak halo akuzasaun ba kandidato presidensial CNRT nian, José Ramos-Horta, katak nia bainhira nia sai Prezidenti da Repúblika “nia hakarak sobu uma”.

“Hau presiza ita boot sira nia ajuda se lae ita sei hili fali ema ne’ebe mai sobu ita nia uma”, akuzou. 

Iha sorin seluk kandidatu prezidensial José Ramos-Horta, iha entrevista ida ba Sra. Bella Galhos nia dehan katak “ konfiante nia sei manan boot liu tan iha segunda volta”.

Ramos-Horta mos dehan katak segunda volta sei la akontese karik Lu-Olo no Fretilin aseita rezultadu primeira volta nian, “ba segunda volta depende ba Dr. Lu-Olo (...) ita nia Konstituisaun halo copy and paste hosi Portugal nian tanba ne’e maka iha segunda volta, iha nasaun seluk ida ne'e la akontese”. Bele rona entrevista iha ne’e.

Segunda volta eleisaun prezidensial sei realiza iha loron 19 de abril no kampãna eleitoral sei hahu iha loron 02 to’o 16 de Abril ho kandidatu rua, José Ramos-Horta no Lu-Olo, hosi CNRT no Fretilin, respetivamente.