Isabel Ferreira hakarak hamonu Maun Taur nia Governu?

 Hosi Oan  Kiak

Agência TATOLI fo'o  sai notisia katak Mana Isabel Ferreira sei fo’o apoiu tomak ba candidatura Maun Ramos Horta nian iha segunda volta eleisaun presidencial 2022.

Tuir ajensia notisia Tatoli, “ Kandidata Prezidente Repúblika (PR) independente ba períodu 2022-2027, ho númeru sorteiu 01, Isabel da Costa Ferreira, deside iha eleisaun segunda volta ne’e sei fo'o apoiu ba kandidatura, José Ramos Horta ho númeru ho sorteiu 14.Hanesan kandidata indepedente no ativista ida, ha’u hanoin ha’u ho votante sira ne’ebé mai hamutuk ho ha’u, sei fó ami-nia votu apoiu ba Ramos Horta ba segunda volta,” Isabel Ferreira hateten ba Agência TATOLI.

Ha’u admira tebes Mana Isabel nia posisaun tanba ita hotu rona Maun Horta nia promessa katak sei hamonu TMR nia governu hodi rekupera orden konstitucional iha ita nia rain. Ha’u hanoin katak difisil tebes hodi Ramos Horta hamonu Governu Maun Taur nian, tanba ita nia Konstituisaun la fo’o dalan, maibe ita hein de’it.

Mana Isabel hatene ona Maun Ramos-Horta nia intensaun hodi hamonu nia laen nia Governu no ha'u la percebe tanba saida nia fo apoiu ba ema ida ke sei hamonu Mana Isabel nia laen rasik. 

Mana Isabel halo vingansa ba PLP tanba la hetan apoiu husi partidu ba nia candidatura atu sai Prezidente ka Maun Taur mos ba fo’o apoiu ba Ramos Horta? Komiku oituan situasaun ida ne’e tanba Mana Isabel rasik sei kria instabilidade familiar bainhira fo’o apoiu ba Maun Ramos, maibe hau sei hanoin katak Mana Isabel brani tebes tanba nia rasik ho nia apoiu ba Maun Ramos nia konsequensia rasik maka bele hamonu nia laen nia kadeira. Ironiku teb-tebes.

Isabel Ferreira koalia beibeik katak família forte nasaun forte maibe nia rasik sei hafraku nia família bainhira Maun Ramos manan no hamonu governu nia laen nian, saída maka ita bo’ot hanoin, Mana Isabel? Ema barak dehan katak apoiu ne’e tanba Mana Isabel buka kadeira, tebes Mana? 

Saida de’it maka akontese ita hakarak katak kampana no eleisaun tur mai bele lao ho dame no demokrasia nia laran. Maun Lu ho Maun Horta sira nain rua merese ita nia respeito maibe husu ida idak nia apoiante hodi la hafoer sira nia naran ho provokasaun no insultu iha media social hanesan iha tempu uluk. 

Dame ba ita hotu, dame ba ita nia rain doben, Timor Lorosae.