Dalan ba Eleisaun Antesipada Naruk Tebes

.

CNRT MEDIA - Facebook

Hafoin Bloku Partidos Maioria Parlamentár submete no vota afavór ba mosaun rejeisaun ba VII Governu nia programa, espekulasaun no ejijénsia militante sira husi Partidu FRETILIN maka hakarak halo eleisaun antesipada. Husi sorin seluk Sekretariu Jeral Partidu FRETILIN, Dr. Mari Alkatiri, hakarak halo referendum ba programa Governu nian no nia rasik jura no deklara katak sei la fila ba Parlamentu Nasionál atu aprezenta programa ba daruak nian.

Mai ita hare pasu ida-ida kona-ba prosesu sira tuir ejijénsia no mehi husi Partidu FRETILIN nian.

1. La’os kompeténsia partidu FRETILIN nian atu deklara referendu, maibé referendu ne’e kompeténsia Prezidente Repúblika nian no so bele halo kuandu iha aprovasaun 2/3 husi deputadu ativu iha Parlamentu Nasionál. Tanba ne’e Referendu sei la akontese!

2. Eleisaun antesipada mós la’ós Partidu FRETILIN nia kompeténsia atu deklara, so Prezidente Repúblika maka bele deklara Eleisaun Antesipada mezmu Dr. Francisco Lu Olo embora Prezidente Repúblika, nia mós prezidente partidu FRETILIN ne’ebé viola KRDTL artigu 78 kona-ba inkompatibilidade.

3. Bazeia ba juramentu husi Dr. Mari Alkatiri katak nia sei la fila fali ba PN atu aprezenta programa VII Governu nian maka automatikamente programa Governu nia chumba ona tanba bazeia ba KRDTL artigu 108 no 109 katak programa Governu nian tenke aprezenta husi Primeiru Ministru, ida ne’e reforsa husi Rejimentu Parlamentu Nasionál artigu 134-137.

4. Bainhira programa governu la pasa ona iha PN maka bazeia ba KRDTL Artigu 112 (2) Prezidente Repúblika sei hatán ba Parlamentu Nasionál hodi halo demisaun ba Governu hafoin konsulta ho Konsellu Estadu tuir KRDTL Artigu 91. Konsellu estadu ne’e kompostu husi eis prezidente sira, Prezidente atuál, Primeiru Ministru atuál, no Prezidente Parlamentu atuál, inklui sidadaun na’in 10 ne’ebé PN no PR nomeia.

5. Hafoin konsulta ho Konsellu Estadu, Prezidente Repúblika sei demite Governu no fila hikas ba KRDTL Artigu 106 hodi hare se iha partidu ka aliansa partidu sira ne’ebé prienxe kritéria atu forma Governu. Iha situasaun atuál iha ona Bloku Partidos Maioria Parlamentár ne’ebé kompostu husi Partidu CNRT, Partidu PLP, no Partidu KHUNTO. Ho ida ne’e maka Prezidente Repúblika sei nomeia Primeiru Ministru foun hodi forma Governu.

6. Bainhira forma ona Governu, maka Bloku Partidos Maioria Parlamentár sei aprezenta programa ne’ebé 100% sei pasa tanba iha apoiu maioria parlamentár iha Parlamentu Nasionál. Husi ne’e Governu sei aprezenta Orsamentu Jerál Estadu ne’ebé mós sei pasa tanba iha apoiu Maioria Parlamentár.

7. Parlamentu Nasionál sei haruka OJE ne’ebé aprova ona ba iha Gabinete Prezidente Repúblika atu promulga ka veta tuir KRDTL Artigu 88. Se karik PR deside atu veta, maka OJE sei haruka fila fali ba Parlamentu Nasionál atu konfirma fali OJE.

8. Bazeia ba KRDTL Artigu 88 sei presiza 2/3 husi deputadu prezente no iha konfirmasaun maioria absoluta atu bele haruka fali OJE ba PR. Iha ne’e maka sei loke posibilidade ba Eleisaun antesipada se karik deputadu sira husi F-PD la prienxe quorum.

Hare ba situasaun polítika ida ne’e, no tetu ba estabilidade RDTL nian, konsidera mós ba impaktu, vantajen no dezvantajen Eleisaun Antesipada, maka Prezidente sei tetu ho didi’ak atu promulga ka veta OJE ne’ebé VIII Governu husi Bloku Partidos Maioria Parlamentár forma. 

Ita hotu tuur hakmatek no akompaña prosesu demokrátiku ida ne’e, no husu atu prosesu tomak tenke la’o tuir korredór ita nia Lei Inan ka KRDTL nian.

.