FRETILIN/MARI ALKATIRI APROVEITA FALTA ARMONIA ENTRE XANANA VS TAUR

.

Opiniaun hosi :Timoroan Maubere Foho

Notas kiik relasaun entre Xanana Gusmão ho  Taur Matan Ruak.

Xanana Gusmão hanesan eis Komandante em Xefe das FALINTIL no Taur Matan Ruak hanesan Vise em Xefe das FALINTIL durante tempu gerilla. Xanana Gusmão ho Taur Matan Ruak konsideradu maun ho alin iha funu laran (ema ho nia latatak ne’ebe labele haketak),katak ema na’in rua ne’e hanesan figura importante durante  tempu rezistensia nia laran.

Tuir sasin Lere Anan Timur atual Xefe Estadu Major Jeneral  F-FDTL ne’ebé uluk luta hamutuk ho Xanana no Taur iha ai-laran hateten, Xanana Gusmão ho Taur Matan Ruak la’os foin ukun an mak hirus malu maibe hirus malu kedas iha ai-laran ne’eba  i pior liu ida agora ne’e.

Xanana Gusmão ho Taur Matan Ruak, ema na’in rua ne’e ho personalidade ida ke kuandu  hirus ona ema ema ka hirus malu lori tempu naruk mak foin rekopera fila fali ou presiza ema intermediariu maibe intermediariu ne’e mós tenke hatene tuir ema na’in rua ne’e nia karakter.

Xanana Gusmão ho Taur Matan Ruak hahuu ho relasaun ladun di’ak wainhira iha tinan daruak mandatu Taur Matan Ruak nian hanesan Xefe Estadu iha 2015. Taur komesa kritika governasaun Xanana nian iha tempu ne’eba, liuliu kona-ba uma MDG’s ne’ebe halo iha Timor laran tomak, tanba tuir Taur katak uma ne’e kondisaun la kondis ho realidade povu Timor nian no klot i Taur konsidera projetu ne’e hanesan fakar masin ba tasi laran.

Xanana mós sente la gosta ona Taur nia lideransa tanba Taur sai fali hanesan obstaklu ba nia governasaun.

Iha momentu ida enkontru semanal ho Taur, Xanana hamosu idea atu rezigna-an hosi nia kargu hanesan Primeiru Ministru ba Taur Matan Ruak. Xanana sente hakfodak tanba  resposta hosi Taur nian la’os atu fo motivasaun Xanana para atu kaer pasta Xefe Governu to’o hotu, maibe Taur dehan ba Xanana “ Se maun hakarak rezigna an halo favor tanba Timor la depende ba maun mesak de’it, la depende ba ha’u nein depende ba Alkatiri, hanesan mos uluk ita funu iha ai-laran, Nicolau mate maun hamrik lidera funu, Bapa kaer maun Xanana  ami kontinua lidera funu to’o iha 99 ita manan ukun rasik an. Timor ne’e  la depende ba ita lider sira ne’e, maske ita na’in hira ne’e mate hotu mós nasaun ne’e sei  kontinua lao ba oin nafatin”.

Tensaun mosu liu tan entre Xanana Gusmão ho Taur Matan Ruak, wainhira Taur Matan Ruak ba hala’o diskursu ida iha Parlamentu Nasional loron 25 fulan Febereiru 2016  kona-ba ezonerasaun Major Jeneral Lere Anan Timur nian.

Xanana la simu tanba liafuan  ida Soeharto ne’ebe Taur Matan Ruak indika ba nia ho Mari Alkatiri tanba de’it Taur hateten “Soharto, nia familia sira mak hatun nia”.

Tanba ne’e liu tiha semana balun Xanana intrega fila-fali kedas medalla Ordem Gerilla ne’ebe atribui ba nia iha loron FALINTIL nian iha 2015, i hosi ne’e to’o mai mandatu remata Xanana Gusmão buka hasees an hosi Taur Matan Ruak. Xanana Gusmão nein partisipa  serimonia sira estadu nian ka ofisial ne’ebe Taur Matan Ruak mak marka prezensa ka dirije.

Falta armonia ema na’in rua nian ne’e, halo FRETILIN/Mari Alkatiri hahuu buka aproveita situasaun refere, Mari Alkatiri ho nia grupu sira komesa ataka Taur Matan Ruak ho liafuan oioin  iha media sosial facebook nu’udar meius ida atu desakredita Taur Matan Ruak  hodi buka simpatia Xanana Gusmão nian atu apoiu nafatin  FRETILIN.I Mari Alkatiri hakarak Xanana Gusmão atu ataka  nafatin nia alin Taur Matan Ruak.

FRETILIN/Mari Alkatiri hakarak relasaun Xanana ho Taur Matan Ruak kontinua at atu nune’e FRETILIN/Mari Alkatiri aproveita buka koligasaun ho CNRT hodi bele halo aliadu iha governasaun tuir mai  ne’e, tanba FRETILIN la auguenta ona hanesan opozisaun durante  tinan 10 nia laran.

FRETILIN liliu Mari Alkatiri preokupa karik relasaun Xanana ho Taur Matan Ruak mak diak fila fali, bele ameasa fila fali ba nia relasaun diak ho Xanana, Mari tauk Xanana divorsiu nia  hodi kaben fali ho nia alin Taur Matan Ruak, i ne’e  hanesan mehi at ba Mari Alkatiri no FRETILIN atu ba ukun fila fali.

Tanba Mari Alkatiri/FRETILIN sente atrapalla oituan ho Taur Matan Ruak ho nia Partidu PLP  ne’ebe hetan  apoia maka’as hosi  povu i satan Taur Matan Ruak deklara ona hakarak atu sai Primeiru Ministru.

Iha tersa semana ne’e FRETILIN/Mari Alkatiri sira halo festa tanba sira sente hetan vitoria kiik ida relasiona ho intervizta Xanana nian iha Aeroportu  Nicolau Lobato hafoin fila hosi negosisaun fronteira maritima, iha ne’ebe Xanana desmente atu apoiu nia Taur Matan Ruak ba Primeiru Ministru hanesan nia alin tanba seidauk simu liafuan Soeharto ne’ebe Taur ko’alia iha 25 Febreiru 2016.

Vidio sira kona-ba intervista Xanana  nian ne’e hetan sahre/fahe barak liu iha media sosial Facebook liuliu hosi militante FRETILIN ho liafuan mesak azitasaun oioin de’it, dehan Taur mimpi di siang bolong, Taur nia mehi ba PM  mohut ona no ect.

FRETILIN/Mari Alkatiri nia mehi mak ida de’it hakarak Xanana ho Taur Matan Ruak selok malu hodi sira  aproveita ba ukun.
.