FRETILIN halo kampanha iha Likisa ba loron dahuluk kaer ukun, FRETILIN Lakohi Kopia Dezenvolvimentu RAEOA

.

Foto, Facebook.

Independente-  Mateus dos Santos - 22 de junho de 2017

DILI:Partidu Frente Revolusionáriu Timor Leste Independente(FRETILIN) garante sei la kopia dezenvolvimentu iha Rejiaun Autónomu Espesiál Oekosi Ambenu (RAEOA)  hodi implementa iha munisípiu 12 iha territóriu Timor-Leste.

Ba loron daruak kampaña FRETILIN ho Tipu Diálogu hamutuk ho juventude no estudante Universitáriu UNPAZ, UNDIL,UNTL, DIT, IOB, ICS, ICR, Institutu Canossa no Juventude FRETILIN sira.

Sekretariu Jerál Partidu FRETILIN, Mari Alkatiri hatete, bainhira hetan fiar husi povu manan iha eleisaun Parlamentár FRETILIN sei hala'o dezenvolvimentu iha munisípiu seluk hanesan hotu ho Rejiaun Autónomu Espesiál Oekosi Ambeno (RAEOA).

Tanba nia dehan, Se dezenvolvimentu iha Munisípiu tomak halo hanesan iha RAEOA entaun ema ba Oekusi ona lakohi ba tan vizita munisípiu Seluk.  

FRETILIN iha programa dezenvolvimentu atu implementa iha munisípiu sira seluk atu ema ba Oekosi, ema mos hakarak no laran kmaan ba haree fali dezenvolvimentu iha munisípiu sira seluk.

“ Ita tenke halo ho iha Kriatividade halo sasan di'ak maibé hot-hotu labele hanesan se ha'u halo ponte ida iha Laklo maka nia modelu hanesan ponte iha Oekusi ema dehan kopia tuir de'it”, dehan nia hafoin dialógu hamutuk ho juventude no estudante universitáriu TL iha UNITAL-Bekora –Dili,horisehik.

Alkatiri dehan, Oekusi  ne’e sai ona hanesan laboratóriu Estadu nian ne’ebé se  bainhira FRETILIN manan sei transforma fali modelu Oekusi ne’e sai fali polítiku nasionál  hodi habelar ba territóriu tomak tanba iha direitu atu hetan ninia dezenvolvimentu Zona espesiál ekonómika Merkadu Sosiál (ZEEMS).  

Marí dehan,  FRETILIN iha ema barak tanba ne’e maka vota ne’e ba FRETILIN la'ós ba ema, ema ne’e ohin moris- aban sei mate, mas  FRETILIN sei moris ba nafatin to’o jerasaun ba jerasaun.

Programa Partidu FRETILIN nian hakarak hasai povu  husi kiak no mukit nia laran liu husi juventude sira hodi liberta rai no povu ida ne’e.

Iha fatin hanesan,Estudante UNITAL Enias Expostu hateten atu liberta povu husi kiak no mukit ne’e presiza hadi'a infraestrutura   báziku tanba realidade orsamentu gasta barak ba estrada ne’ebé laiha kualidade.    

Estudante UNDIL, Maria Udis de Canossa husu atu partidu polítiku ne’ebé maka ukun rai ida ne’e tenke loke kampu traballu ba juventude sira.

Entretantu, Reitór UNITAL Roberto  Jerónimo  dehan, Diálogu ne’e importante tebes ba universitáriu sira atu hatene programa partidu nian ne’ebé sei halo ba juventude sira iha futuru.

Hatan ba preokupasaun ne’e, Alkatiri dehan, atu hadi'a infraestrutura  ho kualidade tenke iha responsabilidade ho onestidade labele sai fali korruptu, iha  dezeñu di’ak ho kalkula saun osan no tenke iha fiskaliza independente.

Ho nune’e, FRETILIN sei fó atensaun ba infra-estrutura hanesan estrada, ponte, uma boboot ho kualidade atu labele loke kuak taka kuak hodi gasta orsamentu de'it.

Tuir observasaun jornalista iha terrenu nota katak,Diálogu ne’e hetan mós partisipasaun masimu husi estudante rihun rua resin no Komisáriu Polítika Nasionál FRETILIN hanesan aktual Primeiru Ministru Rui Maria de Araujo  Deputadu,  David Dias Mandati, Aniceto Guterres, Antonino Bianco inklui Reitór UNITAL Roberto  Jerónimo no hetan seguransa másimu husi Polisia Nasionál Timor-Leste.

.