Taur-Mari no Kalbuadi Poténsia ba Xefe Governu

.

Timor Post - 26 de Maio de 2017 -  Transcrição  de José Salvação para o Timor Hau Nian Doben

Dili - Observador politika hosi Universidade Nasional Timor Lorosa'e (UNTL) Camilio Ximenes hatete, iha posibilidade bo'ot Taur Matan Ruak, Mari Alkatiri, Francisco Kalbualdi Lay maka sei sai Primeiru Ministru Governo foun tuir mai.

Camilio hatete, maske iha partidu barak maka sei kompete iha eleisaun Parlamentar tinan ne'e, maibé partidu boot tolu hanesan CNRT, FRETILIN no PLP maka sei hadau malu hodi sai vensedor.

Haree ba estrutura partidu tolu ninian, iha posibilidade figura tolu ne'e sei hadau malu kargu Primeiru Ministru. Figura tolu ne'e iha posibilidade boot tanba mesak ema ne'ebé iha esperiensia di'ak.

"Ha'u hanoin sira nain tolu ne'e sem duvida maibé konforme manual politika partidu ninian, maibé atu sa'e ba Primeiru Ministru ne'e primeiru maka partidu ne'e tenke manán, tanba ita nia Konstituisaun ne'e ko'alia hanesan ne'e, "dehan Camilo ba Timor Post iha UNTL, Kaikoli, Díli, Kuarta (24-05).

Nia hatutan, partidu ne'ebé naka forma governu ne'e partidu ida ne'ebe maka ne'ebé maka aliansa ou partidu ida ne'ebé maka manán, pur exemplu persiza hetan kadeira 33 iha Parlamentu atu garante pezu politiku iha Parlamentu,

Nia sublinã, ema hotu hatete katak Alkatiri ema ne'ebé matenek, iha tan Francisco Kalbuadi ne'ebé maka periodu rua ka'er pasta Minstru, Taur Matan Ruak ne'ebé maka durante tinan 24 iha ai laran, tinan 10 lidera F-FDTL no tinan lima Prezidente Repúblika agora ba Prezidente Partidu,

"Tanba ne'e ha'u hanoin posibilidade iha hotu, ita sosiedade bele iha hanoin oin-oin kona ba sira nain tolu ne'e, maibé buat hotu deside iha eleisaun, tanba eleisaun hanesan eventu importante ida ne'ebé ita hatebe se maka meilor entre sira nain tolu ne'e, " katak nia.

Nia dehan, se to'o iha eleisaun maka sosiedade hotu hanoin katak figura ne'ebé maka agora foin mosu ne'e maka di'ak liu pronto, mas ita la vota ba figura ne'e ninia individual maibé ita mos tenke vota ba ninia partidu," tenik nia.

Nia dehan, kompara ho futebol karik nain tolu ne'e iha posibilidade ba tama ba final, maibé lolos ne'e sira nain haat parese ba semi-final, ruaba final tanba tenke sura ho PD tanba iha PD laran ne'e ema ne'ebá mesak potensial no sira mos inklina an ba kuartu governu to'o mai sestu governu.

FORMA PARTIDU 

Portanto relasiona ho deklarasaun Xanana Gusmão ne'ebé hatete jerasaun foun seidauk bele ka'er ukun, tuir Camilo, ida la'os kestaun, tanba agora ne'e se maka atu ka'er ukun tenke forma nia partidu.

Partidu maka hanesan instrumentu ida, se nia partidu maka manán maka bele ka'er ukun, ida ne'e refleta ba sistema governasaun ne'ebé maka aplika iha nasaun demokratiku.

"Ha'u hanoin ne'e hanoin di'ak hosi maun boot maibé maun boot tenke hateke ba kotuk, sistema governasaun monarkia ka demokrasia, tanba se maka atu ka'er ukun tenke forma partidu hanesan instrumentu ka eskada ida para ema sa'e, se jerasaun foun maibé nia tama iha partido politiku ninia partidu maka manán, klaru nia tenke forma governu," dehan Camilio.

Tanba ne'e tuir Camilio jerasaun foun ho tuan iha direitu hanesan tanba Timor-Leste la'os implementa sistema Monarkia.

Demokrasia katak se maka ka'er ukun hetan poder politiko, tenke forma partido. Depois nia partidu manán forma governu klaru ona lei Konstituisaun garante ne'ebé lalika tau kestaun maun boot ninian.

Tanba ne'e tuir nia hanoin, lider sira naka sala tanba distingui jerasaun foun ne'e hahu iha sa tinan, depois jerasaun tuan ne'e iha sa tinan, tanba momentu referendum ema hotu tantu jerasaun tuan no foun hotu hotu ba vota ba referendum.

Camilio konsidera ohin loron ukun aan maibé hasoru limitasaun rekursu tanba ita haboot tiha estrutura governu inklui partidu nian nune'e fahe poder ba malu enkuantu dezenvolvimentu la'o la di'ak.

Hanoin jerasaun tuan persiza tenke kompreende didi'ak liuliu dala barak ko'alia unidade maibé sobu malu. 

Labele rauikultura ne'ebé a'at ba ninia jerasaun foun sira tanba rai kultura a'at hanorin jerasaun foun sira atu halo tuir nafatin kultura a'at ne'ebé kuda metin ona.

Entaun komportamentu no hahalok a'at sira tenke so'e. Tenke fo oportunidade ba jerasaun foun sira atu aprende hamutuk ho jerasaun tuan sira. (mj3)
.