Jornalista Oki Ameasa Tama Prizaun Tinan Ida

.

 Martinha Gusmao - Independente, 18 de maio de 2017

Díli - Kazu publikasaun diáriu Timor Post hasoru lezada Rui Maria de Araújo, Ministériu Públiku akuza arguidu Raimundus Oki tama prizaun tinan ida efetivu no Lourenço Vicente Martins pena prizaun tinan ida no suspende ba tinan rua.

Ministériu públiku alega arguidu sira tanba komete krime denúnsia kalunioza ne’ebé previstu iha artigu 285 kódigu penál Timor-leste nian.

Tuir Ministériu Públiku, ba arguidu Lourenço iha kontestasaun kona-ba informasaun arguidu haruka jornalista ba konfirma notísia ne’ebé públika iha média Timor Post, tanba ne’e ministériu públiku konsidera faktu ne’e prova hotu.

Kona-ba arguidu Raimundus Oki ne’ebé hakerek iha jornál ho títulu “Deskonfia eis asesór Ministériu Finansas atuál Primeiru Ministru fó projetu ba kompañia PT Packet Sistem Indonesia”.

Tuir lezadu nia deklarasaun ne’ebé Ministériu Públiku lee sai iha julgamentu katak, loos duni iha altura ne'ebá lezadu atuál Primeiru Ministru asina duni, maibé arguidu sira produs ba kompañia nia naran ne’e sala.

Nune’e, bainhira arguidu atu konfirma kazu ne’e, lezadu Rui Araújo hi'it liman iha momentu ne’e tanba lezadu la hatene problema saida mak arguidu atu ko'alia. Tanba ne’e, lezadu dehan la hatene interese saida mak hodi públiku sai nia naran iha jornál no arguidu sira la ko'alia iha provas ne’e.

Aleinde ne’e, iha asinatura ne’e la’ós lezadu Rui Araújo mesak mak asina, maibé iha mós ema seluk, maibé arguidu sira la temi iha publikasaun jornál ne’e, nune’e lezadu dehan faktu ne’e falsu.

Entretantu, tuir testemuña Virgílio da Silva deklara ba Tribunál katak, jornalista nia servisu ba rekolla dadus iha terrenu no rona voice hakerek, bainhira hakerek hotu entrega ba editór depois notísia ne’e tun ka la tun ne’e desizaun husi xefe redasaun nia mak deside.

Iha parte ida mós tuir testemuña katak, kona-ba títulu notísia ne’e atu atrai ema hodi sosa jornál ne’e la’ós atu hafo'er lezadu nia naran.

Nune’e, husi parte husi defeza husu ba Tribunál katak, faktu ne’e defeza konsidera la vale hotu, tanba ne’e mak husu ba Tribunál arguidu Lourenço atu absolve nia husi kazu ne’e, tanba arguidu sira la komete krime denunsia kalunioza.

Nune’e mós defeza husi arguidu Raimundus Oki husu ba Tribunál atu fó pena ne’ebé mak justu ba arguidu tanba sira la fó prejuizu ba lezadu no notísia ne’e la prezudika ba lezadu intermus materiál no morál.

Hafoin rona tiha deklarasaun husi Advogadu arguidu ho Ministériu Públiku, Tribunál deside hodi adia fali julgamentu ne’e ba loron 1 fulan Juñu tinan 2017 tuku 17:00 lokraik, hodi rona desizaun final.

Iha audiénsia julgamentu ne’e prezide husi singulár Ivan Suritay, Ministériu Públiku reprezenta husi Prokuradora Lídia Soares, arguidu Lourenço Vicente Martins hetan legál husi advogadu privadu José Pedro Camões, Raimundus Oki hetan asisténsia legál husi advogadu, Arlindo Sanches.

.