MP hasa’e Pena Emilia Pires ba tinan 10

.

Jornal Nacional Diário - 19 de janeiro de 2017

Kondenada Emilia Pires hakfodak bainhira rona katak Ministeriu Publiku (MP) halo rekursu ba Tribunal de Recurso hodi aumenta pena prizaun ba tinan 10 husi tinan 7 no kondenada Madalena Hanjam tinan 4 aumenta ba tinan 7.

Ho informasaun ne’e, kondenada Emilia Pires husu ninia ekipa advogadus privadu atu servisu maka’as ba ninia kazu ne’e.

Advogadu privadu José Pedro Camões informa, Ministeriu Publiku (MP) foin lalais ne’e hato’o rekursu hasae ninia kliente ninia kondensaun, tanba lamenta ho desizaun tribunal primeira instansia nian.

“Ami simu recurso ida husi Ministériu Publiku iha loron Tersa (17/1) tuku 17:00 loraik, mas sira nian ho ami nia rekursu nia kestaun lahanesan. Ministeriu Publiku konklui katak, Tribunal Distrital Dili mos halo desizaun la dun los tanba ne’e MP husu atu Emilia hetan kondenasaun tinan 10 no Madalena hetan pena tinan 7 ho indeminizasaun. Hau le hela depois sei koalia ho ekipa advogadu hodi fo resposta iha loron 15 nia laran no hau mos informa kedas ba ami nia kliente Emilia no nia hakfodak oituan hodi dehan, entaun imi tenki servisu makas liu tan,’’haktuir José Pedro Camões ba jornalista sira iha TDD, Kuarta (18/01).

Antes ne’e, iha loron 4 fulan Janeiro ekipa advogadus halo ona rekursu ne’ebé hamutuk folla 180 ba tribunal de recurso. Kontinudu husi rekursu ne’e mak konsidera tribunal distrital dili liu husi juiz koletivu halo desizaun desliga an husi realidade ne’ebé akontese iha akuzasaun no realidade kontestasaun iha audensia julgamentu. Tanba ne’e tuir parte defeza nia hare katak, tuir lolos juiz TDD ne’e tenki fundamentu nia desizaun bazeia ba akuzasaun no mos kontestasaun, inkluindu deklarasaun testamunhas durante iha julgamentu nia laran.

“Provas ne’e tenki hare tuir dokumentus, tanba atu hetan osan ba sosa kama ne’e kompotensia Primeiru Ministru (PM) ne’ebé momentu ne’eba asumi husi Kay Rala Xanana Gusmão, ema ne’ebé halo pedidu ne’e Ministeriu Saude depois mak halo aprovasaun ba osan ne’e, agora tuir lei kompotensia PM nian, la iha involvimentu Emilia ba kestaun pedidu osan ne’e, entaun nia partisipa iha ekonomia ida ne’ebé,’’koalia José.

Nia hatutan konaba aprovizionamentu loke surat, bandin, dokuemntos ne’e mai husi MS no MF ne’e la halo buat ida kuando prosesu administrasaun lao hotu iha ne’eba se sala tenki ba ema ne’ebé ida ne’e mak halo desizaun no iha kompotensia ne’e laos desliga an husi realidade ne’e.

Hare ba kestaun sira ne’e mak kondenada Emilia espera liu husi rekursu ne’e pelumenus tribunal bele hola desizaun ho justu ema ne’ebé mak hein hela jusitsa i prosesu sira ne’e hotu intrega ona ba parte tribunal agora defeaza hein deit nia rezultadu.

Antes ne’e iha desizaun leitura akordaun TDD liu husi juiz koletivu kondena arguida Emilia Pires ho pena prizaun tinan 7 no arguida Madalena Hanjam ho tinan 4, tanba tuir tribunal provadu sira involve an duni iha projetu sosa kama ba Hospital Nasional Guidu Valadares ne’ebé mak fo deit ba arguida Emilia nia kaben.nia

.