Lu-Olo vs Ramos-Horta, ha’u la’os beik, ha’u vota Maun Lu-Olo

.

Oan Kiak

Ha’u lee malae jornalista nia hakerek kona ba Maun Ramos-Horta ninia kandidatura hodi salva ita nia rai no ha’u iha duvidas kona ba salvasaun ke Maun Ramos sei halo, tanba ita haluha tiha ona uainhira Maun boot ne’e ukun, saida lolos maka nia halo hodi salva Maubere Oan hosi kiak no mukit nomos lori ita nia rai ba dezenvolvimentu?

Ramos-Horta hanesan Premiu Nobel da Paz nia sei la konsegue inplementa dame iha ita nia rai, aat liu tan, promove odio iha Maubere Oan nia leet, ita haluha tiha ona uainhira konflitu mosu ho Pai Mauk, tanba sa Ramos-Horta dehan katak iha rai liur nia nunka hare Pai Mauk nia espiritu santo, ke nunka koalia ho nia, tanba sa bosok ita? Bosok duni tanba ita hotu hare letratu Pai Mauk nian ho Ramos-Horta tur hamutuk ho lider sira seluk iha Portugal nomos iha fatin seluk.

Tanba sa bosok? Tanba sa hatun luta nain seluk? Ramos-Horta garganta mak barak, uainhira nia ukun hamutuk ho AMP koruptor sira, nia mos hakiak koruptor sira tanba ita nunka rona nia lian hasoru korupsaun, koluzaun no nepotizmu, Ramos-Horta nonok deit no aproba millaun ba millaun orsamentu nian hodi hariku malae sira, ema ho pasaporte rua no koruptor sira. Ema hanesan ne’e maka ita hakarak ba tur iha palasiu Aitarak?

Se maka autor ba Maternus Bere nia livertasaun? Se maka halo rekonsiliasaun sein justisa ba ita nia rai? Ramos-Horta.

Dala barak ha’u hakerek aat kona ba FRETILIN nia lideransa tanba Pensaun Vitalisia maibe ita haluha tiha ona katak Ramos-Horta mos autor ba Pensaun Vitalisia. Ita hakerek aat ba Maum Mari tanba nia ba  tribunal hodi sai testemuna defeza ba Emilia Pires maibe ita haluha katak Ramos-Horta mos ba tribunal hodi defende senora Emilia Pires. Ita tenki justu ba ema hotu, la bele hare de’it sala hosi ema balun no haluha seluk. Ita hanoin katak Mari sala antaun Ramos-Horta mos sala.

Ramos-Horta la ba salva ita, nia ba salva maka malae sira tanba nia ba tau asesor barak hosi rai liur hanesan nia halo uluk no sei haluha povu nia terus no halerik, ida ne’e mak realidade. Ha’u nia kandidatu maka ita nia Maun Boot Lere, ha’u fiar katak Maun Lere no Maun Taur maka tenki ukun iha tinan 2017 hodi salva ita nia rai, sira rua hamutuk maka bele lori ita nia nasaun no povu hetan prospridade maibe karik Maun Lere lakohi sai Prezidenti ha’u nia votu ba Maun Lu, tanba Maun Lu mos iha direitu hodi ukun ita, Maun Lu mos aman ba nasaun ida ne’e no ha’u fiar katak hanesan Prezidenti nia sei tau matan ba Maubere hot-hotu, Maun Horta lae, tanba uainhira nia ukun Maubere Oan la hetan benefisiu, koruptor, malae sira no dupla sidadania maka goza ita nia rikusoin.

Ema bele dehan katak Maun Mari maka volante Maun Lu maibe volante to’o uainhira? Karik Maun Lu sai Prezidenti nia iha serteza katak povu fiar nia, nia tenki sai Prezidenti ba ema hotu la bele sai Prezidenti ba CCF de’it no Maun Lu sei onra diak liu Maun Horta ninia knaar hanesan Prezidenti.Ema mos dehan katak Maun Xanana maka ba volante Maun Taur maibe la dun akontese.

Maun Horta diplomata di’ak tebes maibe hanesan Prezidenti, malae sira, asesor internasional sira, ema sidadania rua sira mak sei volante nia hodi sira goza Maubere Oan nia riku.

Lu-Olo vs Ramos-Horta iha eleisaun prezidensial, ha’u la’os beik, ha’u vota Maun Lu-Olo.

Nota hosi Timor Hau Nian Doben: Opiniaun ida ne'e reflete opiniaun pesoal hosi Oan Kiak, la reflete hanoin hosi membru hotu iha blogue ida ne'e. Iha tempu badak ami sei esplika ba leitor sira ami nia pozisaun kona ba eleisaun prezidensial no lejislativa iha tinan 2017. Obrigada barak. Zizi Pedruco

.