Lere : “Hau la kandidata-an ba PR”

.

Jornal Nacional Diário - 20 de janeiro de 2017

Xefi Estadu Maior Jeneral FALINTIL-Forsa Defesa Timor Leste, Major Jeneral Lere Anan Timur, sei la kandidata-an ba Prezidenti Republika (PR) iha eleisaun prezidensiál 20 Marsu 2017 ne’e.

Lere Anan Timur hateten nia la kandidata an tamba hakarak kontinua tau prioridade ba estabilidade Timor Leste, nu’udar preokupasaun boot no importante tebes ba dezenvolvimentu nasional.

“Ha’u la kandidata-an. Maibé, ha’u nia prioriedade mak establidade nasional ba Timor Leste,” afirma Lere Anan Timur ba Jornalista sira hafoin hasoru malu ho Prezidenti Republika (PR), Taur Matan Ruak, iha Palásiu Prezidensiál, Aitarak Laran-Díli, Kuarta (18/01/2017).

Lere fundamenta katak, ukun-an ne’e la’os monu husi Lalehan deit mak mai, maibé liu husi sakrifísiu boot ne’ebé ema wa’in mate no sofre. Tanba ne’e, estabilidade nasional fundamentu teb-tebes atu nia asegura no hametin iha territóriu Timor Leste (TL).

Nia hatutan tan katak, povu barak no aswain FALINTIL  barak sakrifika sira nia vida ba ukun rasik-an ne’e, tanba ne’e, tenki kaer metin nafatin estabilidade nasaun nian.

Prontu asegura eleisaun

Iha biban ne’e, Maijor Jeneral Lere Anan Timur mos sublinha katak, F-FDTL ho Polisi Nasional Timor Leste (PNTL) prontu atu fó seguransa ba lala’ok eleisaun prezidensiál no eleisaun jeral iha 2017 ne’e.

“Zona krítiku ba eleisaun nian ami identifika ona, maibé wainhira situasaun deskontroladu mosu iha eleisaun, maka forsa F-FDTL ho PNTL prontu asegura situasaun,”  afirma Lere Anan Timur.eus

.