Kongresu CNRT la serteza, Vicente Guterres posivel ba Sekjer

.

Jornal Nacional Diário - 06 de janeiro de 2017

Lideres partidu Congresu Nacional Reconstrucção Timor-Leste (CNRT) sei okupadu ho servisu Estadu nian, tanba ne’e seidauk halao kongresu nasional partidu nian.

Sekretario Jeral Partidu CNRT, Dionisio Babo Soares, argumenta katak, to’o ohin loron CNRT seidauk bele halo kongresu nasional tanba lideres partidu nian sei okupadu ho serbisu Estado nian.

“Hau hakarak hateten katak, tuir lolos CNRT atu halo kongresu iha  Setembro 2016, maibe muda ba Outubro, kuaze muda ba dala hat, preparasaun halo hotu ona, maibe lideres partidu nian okupadu, hanesan prezidente partidu, Xanana Gusmão hanesan negosiador principal ba kazu tasi Timor, nune’e mos lideres sira seluk,” hateten Dionisio Babo Soares, hodi responde jornalista sira, Kuarta (04/01/2017).

Nia hatutan, desizaun atu deside ba kongresu tenke mai husi lideransa hotu partidu nian. Infelizmente, haree liu mos ba tempu prezidenti CNRT nian ne’ebe konsentradu maka’as ba kestaun disputa fronteira martiima ho Australia.

Dionisio mos argument katak, partidu CNRT rasik mos seidauk deside ninia figura no seidauk hola pozisaun apoiu figura ba eleisaun prezidensial 2017 nian tanba seidauk iha kongresu nasional.

“CNRT sei deside atu kandidata ema ka laiha ne’e iha kongresu, uniku liu husi kongresu mak foin hatene atu kandidata ema ruma, ka apoia kandidatura ruma ka lae ne’e hein desizaun kongresu, mas haree ba prespetiva interese nasional, tanba ita iha faze konstrusaun Estado husi agora to’o 2030, ne’ebe hanesan uma ida karik foin tau nia elersese entaun tenke tau ai rin metin,” hateten Dionisio Babo.

Husi sorin seluk, informasaun iha internal CNRT nian katak, iha kongresu nasional CNRT nian mai ne’e sei mantein prezidenti CNRT Kay Rala Xanana Gusmão, maibe nia estrutura husi kargu Sekretariu Jeral (Sekjer) to’o Komisaun Politika Nasional (KPN) iha mudansa.

Kona-ba kandidatu Sekjer CNRT nian iha naran no figura lubuk ida maka potensial tebes, hanesan Dionisio Babo, Aderito Hugo da Costa, atual Prezidenti Parlamentu Nasional (PN), Miguel Manitelo, atual Vise Ministru Solidariedade Sosial (MSS), Francisco Kalbuadi Lay, atual Ministru Turismu Arte no Kultura ho mos Vicente Guterres, atual membru PN.

Husi figura potensia CNRT nian ne’e, informasaun seluk mos hateten katak, Vicente Guterres maka iha potensia boot atu bele okupa kargu Sekjen ba periodu 2016-2022.

Ba novidade Vicenti Guterres nian ne’e koko halo konfirmasaun ba lidera partidu CNRT lubuk ida, inklui balun iha Bankada CNRT PN ho mos membru CPN CNRT balun, maibe sira hotu dezmente atu fo komentariu.mia

.