Jerasaun Foun Na’in Tolu Ne’e Mak Sei Lidera F-FDTL

.

Timor Post - 03 de dezembro de 2016

DILI—Instituisaun FALINTIL-Forsa Defeza Timor Leste (F-FDTL) prepara ona jerasaun foun nain tolu hodi bele troka Xefe Estadu Maior Jeneral, Maijor Jeneral Lere Anan Timor, Vise Xefe Estadu Maior Jeneral, Brigadeiru Jeneral Filomeno Paixão de Jesus ho Xefe Estadu Maior, Kornel Falur Rate Laek.

Xefe Estadu Maior Jeneral, Maijor Jeneral Lere Anan Timur dehan, instituisaun prepara hela jerasaun foun na’in tolu maka hanesan Kapitaun Mar e Gerra Donasiano Gomes (Pedro Klamar Fuik), Kapitaun Fragata Higino das Neves, ho Kornel Calisto dos Santos (Koliati). 

“Ha’u komesa  prepara ona ida maka Neves veteranu ida, Koliati no Pedro mais depende ema maka atu hili sira ne’e nasionalidade iha ona ne’e maka ami tau ba mais ne’e depende ba politiku sira,” dehan Lere ba Jornalista iha Kuartel Jeneral F-FDTL, Fatuhada, Kinta (01/12). 

Nia hatutan, seidauk husu atu rejigna hosi Jeneral dala ruma Medía maka hanoin hakerek kona ba ida ne’e.

“Ha’u seidauk rejigna-an tanba auto konfiansa ema ida-idak nian seidauk iha, ita la bele depende de’it ba ami katuas sira, ita Timoroan tenke  iha auto konfiansa ba ita nia an se lae ami la iha tiha nasaun mós la iha,” dehan Lere.

Nia hatutan, tanba nasionalismu maka uluk herois sira luta ba too mate ida ne’e maka domin ba nia rai, bainhira nia reforma ne’e dezafius ba jerasaun foun sira.

“Balun dehan ha’u atu ba kandidata sai Presidenti maibé ha’u dehan ha’u nia konsentrasaun ba instituisaun, forsa defeza metin nasaun metin maibé sabraut nasaun mós sabraut, ha’u harii tiha buat ida maka sai sabraut ha’u lakohi,” dehan Lere. 

La fó Oportunidade Otonomista

Entretantu, Maijor Jenerál Lere afirma, sei la fó oportunidade ba otonomi nia oan sira ne’ebé maka tama ona forsa hodi ba tuir tan kursu ruma iha rai liur.

Lere dehan, bainhira nia sei kontinua lidera hela Instituisaun ne’e sei la fó oportunidade ba ema ne’ebé maka uluk lakohi ukun an nia oan sira atu estuda ka tuir tan kursu ruma, tanba ema sira ne’e la iha sentidu nasionalismu ba nia rain.

“Ita koalia kona ba domin ba nasaun no patriotismu ba nia rai, ha’u maka sei lidera nafatin instituisaun ne’e sei la fó oportunidade ba ema ne’ebé maka uluk la kohi ukun an nia oan ba tuir kursu ruma,” dehan Lere ba Jornalista iha Kuartel Jeneral F-FDTL, Fatuhada, Kinta (01/12).

Nia hatutan, agora sei komandante la kohi atu ema ne’ebé maka uluk la kohi ukun an la merese sae ba ofisias, maib’e ema beik halo nusa maibé uluk luta ba rai ida ne’e tenke  dudu ba eskola.

“Dudu ema Otonomi ida nia oan ba eskola fila mai te fali iha instituisaun nia bikan laran ne’e ha’u la simu, ida ne’e kestaun ne’ebé maka ita tenke  tau, ema balun dehan Diskriminasaun uluk funu de’it ema diskrimina ita di’ak,” dehan Lere.

Nia fó ejemplu ema balun inan aman iha hela kupang Atambua Indonézia ne’eba nia oan mai sai Ministru, Sekretariu Estadu, no F-FDTL ne’e Timor demokrasia demais ona.

Nia halo komparasaun hanesan ministeriu Edukasaun la iha nesesidade haruka nia familia tuir bolus estudus ba eskola iha rai liur fila la halo buat ida, ne’e problema boot. (way)

.