PR Taur: “La fa’an ha’u nia dignidade atu hetan patrimónia Estadu”

.

Jornal Nacional Diário- 30 de novembro de 2016

Prezidenti Repúblika (PR), Taur Matan Ruak hateten, ninia luta durante tinan 24 iha ailaran, la’os atu fa’an nia dignidade hodi hetan patrimónia hanesan osan, uma no kareta Estadu, maibé nia luta hodi liberta povu no rai ida ne’e atu hetan moris di’ak.

“Ha’u la fa’an ha’u nia diginidade atu hetan osan, hetan uma Estadu no kareta Estadu, ha’u faan ha’u nia dignidade hodi hetan independénsia no moris di’ak,” dehan PR Taur Matan Ruak iha nia intervensaun bainhira diálogu ho komunidade iha Suku Iliomar II, Postu Administrativu Iliomar, Munisípiu Lautem, Tersa (29/11).

Xefi Estadu hatutan katak, rai ida ne’e sosa ho ran no isin, tanba Timoroan rihun ba rihun mak sakrifika sira nia-an hodi liberta rai no povu Timor Leste (TL).

“Jeneral iha mundu ne’e, jeneral beik liu mak Taur Matan Ruak, tanba halo funu durante tinan 24, funu hotu tiha hetan fitun ida de’it, maibé kabun tek sira ne’ebé lahalo buat ida, hetan fitun hat, iha uma no kareta rasik, ha’u funu tinan rua nulu resin hat, funu hotu tiha, hela iha uma Estadu, no sa’e kareta Estadu,” katak Taur Matan Ruak.

Taur Matan Ruak dehan tan, riku ne’ebé iha nia rai TL, tenki fó ba hot-hotu, labele ema ida deit mak goza.

“La’e aban bainrua ita hanesan asu, ema so’e nia ruin mai ita han, sira han tiha isin. Tanba ne’e, tenki hamutuk, partidu bele ketak-ketak, lisan ketak-ketak, maibé ita tenki ida deit, hamutuk atu luta dala ida tan hodi hasai tiha kiak no mukit husi ita nia uma laran no ita nia nasaun,” dehan Taur Matan Ruak.

Taur Matan Ruak mós esplika katak, moris di’ak la’os tugas Prezidenti Repúblika nian de’it, la’os Xefi Suku nian deit, la’os administrador nian deit, maibé servisu Timor-oan hotu nian.

Maibé tenik Xefi Estadu ne’e katak, TL ukun-an tinan 14 ona, tinan oin tinan 15, buat barak mak Estadu halo ona, no buat balu mak seida’uk.

“Uluk krize 2006 mosu, ha’u ho maun Lere mak ladi’ak, tanba dehan ami mak halo porblema, tanba ne’e mak ha’u sai ba kandidata-an ba Prezidenti Repúblika,” afirma Taur Matan Ruak.

Maibé eis Jeneral ho fitun rua ne’e dehan, to’o ikus Timoroan sira matan moos katak, ema sira ne’ebé mak la koñese Timor mak hakarak mai fahe Timoroan sira.cos

.