FRETILIN nia ema moras mental duni: Sira hakarak soe rai rahun ba povu nia matan. La hetan, boy!

.

Oan Kiak

Horiseik Fretilino 2000 ida, Aniceto Guterres, iha press release ida husu ba polisia internasional kaer Dra. Emilia Pires tanba nia “halai” hosi Timor-Leste no hakarak kontinua nia julgamentu iha Portugal.

FRETILIN 2000 nia ema moras mental duni, sira hakarak soe rai rahun ba povu nia matan. La hetan, boy! FRETILIN nia sekretariu jeral Dr. Mari Alkatiri fulan balun liu ba nia ba tribunal hanesan testemunha defeza nian hodi konfirma ba tribunal katak HNGV presiza duni kamas tanba moras dengue sai maka’as iha ita nia rain. Karik presiza tebes mak aimoruk. Ha’u husu deskulpa ba leitor sira, maibe ha’u tenki dehan katak senor Alkatiri mos karik hetan ona moras mental todan, kuitadu.

Halo nusa mak Fretilino sira husu ba Interpol kaer Emilia Pires se sira nia patraun rasik mak sai testemunha abonatória (defeza nian) ba senora Emília Pires, se sira nia ema, Rui Araujo, mos foo servisu ida ba Emilia representa ita nia estadu iha rai liur no haruka nia ba nasaun oi-oin hodi halao ninia servisu ba Timor-Leste? Foin mak imi hakfodak ka? Foin mak imi hatene katak iha risku bot ida ke Emilia bele la fila ba Timor-Leste hodi hatan iha tribunal? Tanba sa la foo medida koasaun bot liu, prizaun preventiva? Foin mak imi hakilar ba Interpol ba kaer nia? Imi la hatene katak imi laiha tratadu estradisaun no senora Emilia iha pasaporte tolu ka hat? Imi hakarak bosok povu, hodi manan simpatia povu nian tanba eleisaun jeral besik ona, los ka lae? Maibe, lalika kole tanba Emilia ema matenek tebes no nia hatene katak boot balun iha Timor-Leste mak nafatin proteje nia, tanba karik nia loke ninia ibun, ema balun bele hetan atake fuan.

Jornalista malae ida hakerek katak senora Emilia iha ona iha Portugal, tebes ka lae? Governu Timor-Leste buka ona hatene senora Emilia nia hela fatin ka lae? Ha’u dehan ba imi, koko husu ba Timoroan balun ke hela iha Melbourne, senora Emilia iha ne’ebe? Imi bele hetan surprise ida. Ema ida bot  halo investigasaun ida iha Portugal no nia dehan katak tuir ninia hatene Emilia la tama iha Portugal hosi Espaço Schengen. Ne’ebe hodi buka ka kaptura Emilia ita tenki hatene senora nia hela fatin, los ka lae? Ho pasaporte barak senora bele ba mai ba fatin barak. Imi hanoin didiak ba, lalika halo deklarasaun beik iha media tanba hatudu deit imi nia beik no halo ita nia nasaun moe iha mundu nia leet.

Fretilino sira lalika mai soe rai rahun ba povu nia matan ho imi nia liafuan hodi povu fiar katak imi defende povu nia intrese tanba ita povu hatene ona katak imi tur iha uma fukun hodi naok povu nia osan no defendi imi nia patraun Alkateri, besik tinan liman ona no imi la halo tee ida ba povu ida ne’e, maibe imi nia bolsu no kabun nakonu ho povu nia osan, imi muta, mos povu nia osan mak sai. Imi moe laiha ka? Imi nia lagu lama defendi povu maubere ne’e imi mesak mak sei fiar, tanba ita povu uainhira rona ka haree imi koalia hakarak mak muta deit. 

Imi devia mak hasai mandatu kaptura ba ema ke ba defende Emilia iha tribunal, ba imi nia aan rasik nomos ba ema ke foo servisu ba senora Emilia Pires hodi arguida ida iha kazu korupsaun ba reprezenta rain lulik ida ne’e iha rain liur. Ema sira ne’e mak tenki responsabiliza tanba sira mak kulpadu ba situasaun ida ne’e. Karik senora Emilia halai duni, imi hotu mak tenki lori todan, imi, traidor sira ke proteje malu hodi naok povu nia osan! 

.