FRETILIN husu atu Interpol kaer arguida Emilia Pires

.

Lian Bankada Fretilin - Facebook - 22 de novembro 2016

Vice Prezidenti Partidu FRETILIN, atual Xefe Bankada FRETILIN iha Parlamentu Nasionál Deputadu Aniceto Guterres husu atu Interpol kaer arguida Emilia Pires tanba laiha dalan legál ida atu kazu Emilia Pires julga iha Tribunál Portugal.

Aniceto Guterres dehan, Emilia Pires nudar sidadaun TL no kazu ne’ebé nia komete akontese iha Timór Leste tanba ne’e Tribunál TL iha kompetensia tomak atu julga nia.

“Pais ida ne’ebé no fatin ne’ebé sira (kriminozu) sira komete krimi ba, sira (Tribunál) iha kompetensia tomak, iha autoridade tomak atu julga sese deit, ate sidadaun estrangeiru mos kuandu komete krime iha Timór julga iha Timór , tanba ne’e soberania , kompetensia esklusiva tribunais Timór ninian,” dehan Aniceto ba Jornalista iha PN (22/11/2016).

Kodiku penal TL, Aniceto dehan, klaru tiha ona tanba saida mak Emilia Pires husu ba Julga iha Portugal se nia sidadaun TL no komete krimi iha TL.

“Tribunál Portugal ho Australia laiha kompetensia atu julga, se nia sidadaun Australia karik? Iha parte seluk nia sidadaun TL no krime ne’e akontese iha TL, laiha dalan seluk, tenki julga iha TL, Tribunál Timór mak tenki julga,” dehan Aniceto.

Aniceto dehan, laiha razaun Emilia dehan Tribunál TL fraku, purque kazu balun bo’ot no difisíl liu kazu Emilia Pires nian Tribunál TL julga.

Razaun Arguida Emilia Pires, tuir Aniceto katak, buka razaun politika para atu salva an mais laiha dalan.

“Mesmu Tribunál ne’e fraku, iha momentu mais difisíl mos Tribunál TL iha kompetensia halo julgamentu,” dehan Aniceto.

Aniceto dehan, arguida Emilia Pires eis membru governu ida durante tinan 7 ou 8 , to’o ikus prosesu kona, depois dehan Tribunál la kompetente, Tribunál fraku, labele julga, enkuantu sidadaun seluk, (povu kiik) sira ne’e loloron atende Tribunál.

“Kodiku penál klaru tiha ona iha ne’eba, krimi saida deit, sese deit mak komete krimi iha teritori Timór Leste tenki julga iha Timór Leste,” dehan Aniceto.

Aniceto dehan laiha dalan ba extradisaun tanba arguida Emilia Pires nudar sidadaun Timor Leste.

“Labele halo extradisaun, dalan mak ne’e (julga iha TL) , seluk laiha, selae ita viola lei hotu, komesa husi kodiku penál, satan pratika tiha krimi,” dehan Aniceto.

Razaun ne’ebé arguida Emilia Pires foti nudar razaun atu salva an no la divia akontese iha TL, satan ema ida eis membru governu, eis membru orgaun soberania ne’ebé asegura soberania rai ida ne’e.

.

“Nusa la husu kedas iha ne’e (TL) , sai tiha ba liur lakohi fila ona depois husu hakarak halo julgamentu iha fatin seluk, entaun Portugal ne’e Timór nia rohan, TL ne’e sei kolonia Portugues nian ka halo nusa?,” dehan Aniceto.

Tanba ne’e tenki kaer Arguida Emilia Pires atu prosesu iha Timór Leste tenki kontinua, tanba prosesu ne’e lao tiha ona, tenki kontinua too remata para hetan liberdade ou hetan kondenasaun.

.