Extradisaun laiha, Emilia halai Estadu tenki responsabiliza

.

Jornal Nacional Diário - 22 de novembro de 2016

Prezidenti Parlamentu Nasionál (PN), Aderito Hugo da Costa hateten katak, Timor Leste (TL) seida’uk iha akoordu duni ba kooperasaun extradisaun ho nasaun ida, maibé kuandu eis Ministra Finansas (MF), Emilia Pires maka koko atu halai husi Justisa, Estadu tenki responsabiliza situasaun ida ne’e.

“Prosesu la’o nafatin, ita nia situasaun mak hanesan ne’e entermus de lei, ita hein katak, kestaun sira hanesan ne’e, ita bele rezolve iha tempu badak. Estadu mak responsabiliza, i Estadu nia situasaun agora hanesan ne’e, ita labele hakat liu, tanba Estadu nia funsionamentu ba tinan 14 ukun-an ne’e, ita to’o iha nivel ida ne’e,” dehan Aderito Hugo da Costa ba jornalista sira iha edifísiu CNE Caicoli Díli, Segunda (21/11), hodi responde ba pergunta jornalista nian ne’ebé husu konaba, espekulasaun ne’ebé mosu iha públiku katak, arguida eis Ministra Finansas Emilia Pires halai husi justisa.

Aderito da Costa esplika katak, TL seida’uk iha lei extradisaun, nune’e mak hamosu deskonfia katak, Emilia Pires koko atu halai husi TL, maibé tuir Prezidenti PN ne’e katak, TL tenki la’o lai hanesan ne’e, tanba TL foin mak ukun-an tinan 14.

“Ita agora seida’uk iha akordu extradisaun ho nasaun ida, ita sei priense hela rekezitus lubuk ida oinsa atu to’o ba nivel ida ne’e, i presiza mós kooperasaun ho nasaun viziñu sira ne’ebé ke ita iha relasaun bilateral atu tama to’o iha ne’e,” katak Aderito Hugo da Costa.

Eis Segundu Vise Prezidenti Parlamentu Nasionál (PN) ne’e hatutan katak, atu tama to’o iha akordu extradisaun ne’e, presiza rekezitus lubuk ida, i Governu la’o hela ba asuntu ne’e, li-liu kona-ba oinsa atu tama to’o akordu extradisaun.

Aderito afirma mós katak, nasaun barak iha mundu mós, seida’uk tama to’o iha nivel extradisaun ne’e ho rápidamente, tanba presiza negosiasaun no tempu atu iha hanoin ida de’it kona-ba benefísiu ida ne’e.

“Maibé ita nia relasaun bilateral la’o nafatin ho nasaun hotu iha mundu ho hanoin ida katak, to’o loron ida bele tama to’o iha akordu extradisaun ne’e. Ita mós tama iha régras internasionál entaun ita atu tama iha ne’e, ita mós presiza ema seluk nia kooperasaun,” tenik Aderito Hugo da Costa.

To’o nutísia ne’e fó sai, Jornalista ne’e husi Jornal ne’e seidauk hetan konfirmasaun husi advogadu Emilia Pires nian, konaba Emilia nia kondisaun iha loron hirak liu ba kotuk ne’e.cos

.