Eis-ministra hakarak delegasaun hosi prosesu judisiál Timor-Leste nian ba Portugal

.

Eis-ministra Emília Pires, ne’ebé sei atu halo julgamentu iha Timor-Leste, husu ba tribunál Portugal delegasaun hosi ninia prosesu, tanba deskunfia sistema judisiál timor-oan ladun iha kapasidade ka vontade atu asegura justisa.

Rekerimentu ne’ebé Lusa hetan asesu ba, eis-ministra Finansa ne’e lakohi atu impede Tribunál Dili foti desizaun – kona-ba sentensa ne’ebé sei bele hatene to’o finál tinan ne’e – maibé dehan rekursu hirak ne’e sei julga iha tribunál portugés.

Alénde konsidera katak, kumpri duni kondisaun hothotu ne’ebé haktuir ona iha lei ba transmisaun prosesu penál, maibé rekerimentu fó sai deklarasaun Emília Pires nian, iha duni tribunál laran no liur katak, ninia prosesu krimi marka ona ho violasaun sistemátika hosi ninia direitu fundamentál.

Hanesan buat ne’ebé tuir testu hatudu katak sistema judisiál Timor-Leste laiha “kapasidade ka vontade atu asegura iha duni justisa”.

Objetivu maka hafoin Tribunál Dili lee sai tiha desizaun maka rekursu hothotu sei julga iha instánsia judisiál portugés nian, tanba tuir rekerimentu, Emília Pires hala’o hela tratamentu iha Portugal no ladauk bele determina loron atu nia fila hikas mai Dili.

Rekerimenru ne’e, aprezenta ona ba Embaixada Timor-Leste nian iha Lisboa, tersa-feira liu ba, no agora embaixada maka sei responsabiliza atu hato’o mai Tribunál Dili kona-ba audiénsia fun ba iha prosesu refere, ne’ebé marka ona ba 25-novembru.

Haktuir hikas katak Emília Pires ho eis-visi-ministra Saúde, Madalena Hanjam hetan akuzasaun tanba iregularidade hosi sosa kama ospitál nian ne’ebé halo fali kontratu ho empreza hosi Emília ninia laen nian, hodi ikus mai sira na’in tolu bele fahe malu osan dolár rihun ualu, hosi negósiu refere.

Tuir lolos julgamentu ne’e hala’o hodi rona ninia sentensa, maibé adiamentu hosi juis koletivu sira maka halo, hodi larona deklarasaun ikus hosi Emília nian, tanba nia halo viajen bá rai liur.

Defeza fó sai ona direitu atu marka prezensa hodi hato’o deklarasaun ikus – hanesan buat ne’ebé to’o oras ne’e Tribunál Dili kontinua insisti – hodi husu atu laatraza tan leitura sentensa nian, tanba kontinua marka data.

Emília Pires, ne’ebé hala’o operasaun iha Austrália 5-novembru, oras ne’e daudaun iha hela Portugal hodi hala’o tratamentu médiku adisionál – faktu ne’ebé Tribunál mos hatene ona, hanesan fonte defeza hosi Emília nian dehan ba Lusa.

Pedidu “transmisaun hosi pedidu penál” ne’e define ona iha lei timor-oan 15-2011, kona-ba Koperasaun Judisiária Internasionál Penál, ne’ebé prevé katak prosesu krimi iha Timor-Leste “bele delegada iha Estadu estranjeiru ida ne’ebé sira aseita”.

Hosi kondisaun hothotu ne’ebé ezizi ba ida ne’e, konta mos ho aspetu sira hanesan tempu ba pena nian ho másimu posivel ka arguidu iha nasionalidade hosi Estadu estranjeiru _ Emília Pires iha nasionalidade portugeza, alénde hanesan timor-oan ida.

Fó hanoin fali katak iha marsu-2015, molok hala’o julgamentu – ne’ebé hahú iha outubru tinan kotuk – Emília Pires asumi ninia direitu petisaun hodi haktuir ba autoridade Timor-Leste sira katak nia hanesan alvu hosi “violasaun sistemátika no grave” hosi ninia direitu hotu no “desizaun arbitrária nomós imkompriensivel” ba prosesu ne’e.

Direitu petisaun ne’ebé Lusa hetan asesu iha tempu ne’ebá, Emília Pires dehan katak nia tauk “ho patente inkapasidade ka laiha vontade hosi sistema judisiál nian” hodi impede hetan prosesu ne’ebé justu no ekilibradu, tanba politiza kazu “hodi hatauk” hanesan “dalan simbólika ba afirmasaun poder hosi tribunál sira.

Akuza mos komunikasaun sosiál sira, halo violasaun ba segredu justisa nian, lahalo kobertura objetivu kona-ba prosesu hothotu.

“Ema ne’ebé asumi no asumi ona kargu públiku sei bele hasoru agresaun hosi sistema judisiál hanesan hamo’e no insulta iha media, maski hatene katak iha Timor-Leste laiha krimi difamasaun, akuza beibeik, distorse no halo manipulasaun ba faktu lolos ne’ebé iha ho propózitu úniku hodi estraga ema ninia onra no lafó sai ba públiku”, tuir saida maka hakerek.

Iha duni fulan marsu ne’e mos, durante entrevista ida ba Lusa fulan hitu antes, hala’o julgamentu, Emília Pires dehan katak tribunál hothotu hakarak uza hanesan “vingansa” kontra Governu no sira dehan katak sei kondena ho prizaun tinan 10.

Iha delegasaun ikus, iha 20-setembru ikus ne’e, Ministériu Públiku fó sai ona buat hotu hanesan prova no husu pena prizaun tinan sanulu ba eis-ministra rua ne’e.

SAPO TL ho Lusa

.