Espoza Mauk Moruk Hakotu Is Iha Olanda

.

Timor Post - 15 de setembro de 2016

DILI----Matebian Paulino Gama (Mauk Moruk) nia ferik oan Joana de Sousa Gama ho naran istimadu Lola hakotu ona is iha Olanda, Tersa, (13/09) iha tuku 03:00. Parte família  husu apoiu ba governu liuhosi Ministériu Negósiu Estranjeirus no Kooperasaun (MNEK) atu hodi fila mai Timor Leste nune’e bele halo serimónia funerál.

“Ha’u mai iha ne’e atu husu apoiu ba governu para ajuda lori fila ha’u nia alin Mauk Moruk nia ferik oan mate iha Olanda atu hodi fila mai hakoi iha Timor Leste,” haktuir Cornelio Gama (L-7) ba jornalista iha Ministériu Negósiu Estranjeiru no Kooperasaun (MNEK), Praia dos Coqueirus Kuarta, (14/09).

L7 hatete, matebian Mauk Moruk nia kaben Lola hakotu is tanba sofre moras susar dada iis, no matebian husik hela oan nain tolu, mane rua feto ida maka oras ne’e eskola hela iha Olanda.

Tanba ne’e família  sira iha hanoin ona atu lori fila matebian Mauk Moruk nia ferik oan nia isin mate no nia oan nain tolu ne’ebé maka eskola hela iha Olanda atu fila mai Timor Leste hodi hamutuk ho família  sira.

L7 husu governu atu halo despaisu ida atu hatun hodi ba foti Mauk Moruk nia ferik oan iha Olanda atu fila mai halo seremonia funerál iha Timor Leste.

“Ami família  husu governu atu hatun despaisu ida ba família  atu trata Mauk Moruk nia ferik oan nia isin mate mai Timor Leste,”hatete L-7.

Maske família  matebian hakat ona ba iha odamatan MNEK nian, maibé Ministru Negosiu Estranjeirus no Kooperasaun (MNEK) Hernani Colho laiha fatin.

Tuir L-7 katak, Gabinete Ministru MNEK nian foin maka halo kontaktu ba Ministru, tanba ne’e maka seidauk simu informasaun ida klaru kona-ba karta despaisu ne’ebé maka família  sira husu.

Nia dehan, Mauk Moruk nia ferik oan ema Timor Leste, tanba ne’e sei la hakoi iha ema nia rai, tanba rai iha ne’eba la iha atu hakoi Mauk MOruk nia ferik oan nia mate isin.

Entretantu governu liu hosi Ministru Negósiu Estranjeiru (MNEK) Hernani Coelho seidauk responde ba pedidu ne’ebé maka família  matebian husu, tanba ministru sai ba rai liur no nia vice Roberto Soares sei moras hela. (gus)

.

Taur Matan Ruak:“Hanesan Presidente, ha’u laiha partidu maibé hanesan sidadaun, se ha’u hili partidu ha’u se ba hamutuk ho partidu foun”

.

Arsenio B Maubere

Públiku, liu-liu polítiku balun iha rai laran hahú fó komentáriu no kontente bainhira Primeira Dama Timor-Leste – Sra. Isabel Ferreira iha nia deklarasaun publikadu iha jornál iha semana kotuk ho títulu “Primeira Dama la konkorda Taur Matan Ruak nu’udar Presidente atu involve iha PLP - Partidu Libertasaun Popular."

Deklarasaun Sra. Isabel Ferreira hanesan Primeira Dama Presidente Repúblika automátikamente hetan responde ne’ebé oin-oin iha públiku, resposta ne’ebé barak mak negativu no mós pozitivu. Husi aspetu resposta ne’ebé mak oin-oin husi públiku, ita bele foti supozisaun ida katak ema ou polítiku barak mak preokupa envolvimentu atuál Presidente Repúblika – Sr. Taur Matan Ruak iha Partidu PLP. Partidu PLP hanesan partidu ida foun maibé nia lideransa la’ós foun.

Deklarasaun Sra. Isabel Ferreira nu’udar fen kaben husi atuál Presidente Repúblika la’ós buat foun ida e liu tan atu reforsa de’it deklarasaun ne’ebé mak beibeik ona hato’o husi Sr. Taur Matan Ruak katak nia se hakru’uk ba nia knar no fiar ne’ebé povu kuda ba nia nu’udar Presidente Repúblika no se serve nia mandatu to remata nune se la sadere ou afilia ba partidu ruma. Husi aspetu ida ne’e, ita bele hare momoos katak nu’udar fen no la’en, Sra. Isabel Ferreira no Taur Matan Ruak kuidadu no tau matan ba malun duni hodi hamosu deklarasaun ne’ebé hanesan katak Taur Matan Ruak se la involve iha partidu Polítiku ruma bainhira nia se asume nia kna’ar nu’udar Presidente Republika.

Iha diálogu komunitária ne’ebé mak halo iha Suku Ahik-Viqueque, komunidade liu husi Padre Pároku ida husi Diloor preokupa kona ba pozisaun atuál Presidente Repúblika liu-liu kona ba persesaun ne’ebé mak mosu iha komunidade nia let katak Sr. Taur Matan Ruak mak hanesan fundadór PLP. Padre refere hahú husu ba Presidente Repúblika ho nia pergunta “Tebes ka ita bo’ot mak hari ’i PLP?” Taur Matan Ruak hatán ba pergunta husi Padre refere hodi dehan” Agora hanesan Presidente Repúblika, ha’u laiha Partidu maibé, hanesan sidadaun, se ha’u hili partidu, ha’u se la ba hamutuk ho Partidu Tuan, ha’u se ba hamutuk ho partidu foun”.

Taur Matan Ruak hakarak hateten loloos no momoos ba públiku katak nia se la tama ou afilia ba kualkér partidu bainhira nia sei nu’udar Presidente Repúblika, maibé, bainhira nia remata nia kargu nu’udar Presidente Repúblika ofisialmente iha 20 Maiu kalan bo’ot, hanesan sidadaun bain-bain ida, asegura tuir ita nia konstituisaun RDTL, Taur Matan Ruak se uza nia liberdade tomak atu hola parte iha vida Partidu Polítiku. Klaru mós atu nota katak bazeia ba Taur Matan Ruak nia deklarasaun ne’ebé mak nia hato’o durante nia vizita iha Suku sira, hato’o katak nia lakohi tan ona atu asume tan kargu hanesan Presidente Repúblika ba segundu termu.

Nune’e, laiha duvida atu halo espekulasaun katak Taur Matan Ruak hanesan pesoál ou sidadaun ida, se hamutuk ho Partidu Polítiku hodi dala ida tan lori povu Timor-Leste atu bele luta hamutuk hodi kore an husi kiak no mukit. Pergunta mak ne’e, Taur Matan Ruak se forma Partidu foun ou la’o ho partidu Seluk? Taur Matan Ruak rasik hatán katak nia se la hili partidu tuan, maibé nia se ba hamutuk ho Partidu Foun. Laiha duvida atu siik katak depois remata nia mandatu iha 20 Maiu 2017, Taur Matan Ruak se la’o hamutuk ho Partidu Libertasaun Popular hanesan partidu foun ida ho kompozisaun kuaze joven de’it no maioria joven sira ne’e mai husi nia ekipa rasik ne’ebé nia forma no hahú prepara iha 2012 bainhira kandidata nia an ba Presidente Repúblika. Taur Matan Ruak mós fó apoiu tomak ba transformasaun jerasional, Nia prepara duni joven sira ne’ebé durante ne’e la’o no servisu ho nia.

Taur rasik hateten, uluk iha ai-laran bainhira komandante ida mate mak foin bele troka, maibé iha era depois de funu – ita la kohi hein no hare lider ida ukun to mate tia mak ita troka, nune’e tenke prepara joven sira hodi bele lidera Timor iha futuru. Liu tan, nia rasik dehan, hanesan nasaun, ita lakohi ukun na’in sira ukun hanesan estadu de Homem (nasaun ne’ebé depende ba individu ou figura ida de’it) maibé tenke bazeia ba sistema ida ne’ebé prepara kondisaun tomak hodi entrega podér ba lideransa foun sira ne’ebé se tuir mai.

Nune, ba simpatizante, militante Partidu Libertasaun Popular iha Timor tomak atu firmi iha posizaun no labele monu ba kualker informasaun ne’ebe la los no atu tau iha ulun no no laran katak Loriku nain iha tinan oin mak se lidera no hatudu dalan ba loriku oan sira iha Timor-Leste hodi dala ida tan luta nudar nasaun, nudar povu,  servisu hamutuk, hisik kosar ba ita hotu nia moris diak – Moris diak ba o, hau no ita hotu.

.

Australia laiha juridisaun diskuti fronteira marítima – TL lakohi hakiduk

.

Jornal Nacional Diário - 02 de setembro de 2016

Nasaun viziñu Australia deklara ona katak, sira laiha juridisaun atu diskuti fronteira marítima ho Timor Leste. Tanba ne’e, sira seida’uk fó ulun atu diskuti fronteira marítima ho Timor Leste.

Hatan ba deklarasaun ida ne’e, Primeiru Ministru (PM), Rui Araújo hatete katak, Timor Leste avansa nafatin ho nia pozisaun.

“Se Australia argumenta katak, komisaun de konsiliasaun laiha juridisaun, depois komisaun negosiasaun konsiliasaun ne’e rasik sei rona argumentu sira ne’e hotu, depois ita deside,”dehan PM Rui Araújo ba jornalista sira iha Palacio Prezidensia Repúblika Aitarak Laran Dili, Kinta (01/09).

Nia hatutan, Timor Leste nia pozisaun katak, komisaun ne’e, legalmente konstituidu tuir tratadu ne’ebé iha, entaun iha mós kompetensia atu rona kestoens ne’ebé relasionadu ho disputa ne’ebé iha entre Australia ho Timor Leste.

“Ita nia pozisaun klaru, Xefi negosiador lidera hela ekipa ida konsiliasaun obrigatória, tanba ita nia posisaun katak, tanba Australia lakohi atu halo negosiasaun ho Timor Leste, entaun ita rekore ba mekanismu konvensaun interansionál ba direitu tasi ninian preve ona halo konsiliasaun,” katak Rui Araújo.

Alende ne’e, Xefi Governu ne’e mós informa katak, enkontru ne’ebé nia halo ho Prezidenti Repúblika (PR), Taur Matan Ruak ne’e, enkontru rutina hanesan bai-bain, hodi haree ba situasaun jeral nasaun ninian.

Rui Araújo haktuir, iha sorumutu ne’e mós,  nia  aprezenta ba Prezidenti Repúblika kona-ba preparasaun orsamentu ba 2017.

Xefi Governu ne’e hatutan, nia esplika detaillas uit oan kona-ba kalendáriu aprovasaun orsamentu jeral Estadu ninian, hodi ajusta ho Prezidenti Repúblika ninia kalendáriu, hodi nune’e to’o fulan Desembru, orsamentu 2017 nian bele aprovadu ona.

“Tanba ita hotu hatene katak, iha 2017 ita se iha eleisaun bo’ot rua, no Prezidenti Repúblika mós informa ba Governu katak, inprinsipiu sei laiha mudansa ba kalendáriu eleitoral,” relata Rui Araújo.

Nia afirma, buat sira ne’e sei halo tuir saida make eis Prezidenti Repúblika, Ramos Horta halo iha tinan 2012, mais i menus eleisaun sei hala’o iha fulan Marsu ou Juñu.

Alende ne’e, sira mós ko’alia kona-ba partisipasaun Timor Leste ninian iha Asembleia Jeral Nasoens Unidas nian ne’ebé sei hala’o iha fulan Setembru agora ne’e, nomós ko’alia kona-ba Prezidensia CPLP ne’ebé atu entrega ba Brazil.

Argumentu Australia laforte okupa tasi Timor

Organização Não Governamental (ONG), Lao Hamutuk, haree katak, argumentu Australia la forte atu okupa tasi Timor, liu husi prosesu delimitasaun fronteira marítima ne’ebé hala’o iha Tribunal Arbitrajen Haia, Holanda, foin lalais ne’e.

“Ami akompaña argumentu  ne’ebé maka  Australia  fo,  argumentu ne’ebé tuir ami Sosiedade Sivil Lao Hamutuk hanoin katak,  argumentu Australia ladun forte atu okupa tasi Timor,”esplika Juvinal Diaz, ba  jornalista iha ninia kna’ar fatin Bebora Dili, Kinta (01/08).

Tuir Juvinal Diaz,  Advogadu Australia ninian  estatementu   ne’ebé hanoin   katak,  konsiliasaun laiha jurisdisaun atu julga kazu disputa ida  ne’e, nia mos dehan katak, se karik,  desizaun ne’e sai mos laiha legal banding.

“Ami haree sstatementu sira hanesan  ne’e hatudu katak, Australia rasik laiha vontade diak atu negosia, defini fronteira marítima. Estatementu ne’ebé advogadu sira hato’o iha Den Haag reprezenta karakter Australia nian  ne’ebé hakarak okupa ema seluk ninia teritoriu,”dehan Juvinal Diaz.

“Advogado Australia ninia estatementu hanesan, Estadu  ne’ebé maka pecundang,  tanbasa maka ami  bolu  pecundang,  ita hatene Australia nasaun ne’ebé sempre koalia kona-ba demokratizasaun,  sempre koalia kona-ba respeita e prensipiu lei internasional, mas sira  ne’ebé maka iha ne’e hatudu katak, Australia laiha intensaun diak atu respeita mekanismu internasional,”dehan nia.

Husi prosesu delimitasaun fronteira marítima  ne’ebé maka hala’o foin lalais iha Haia, Holanda ne’e,   husi  Estadu Timor Leste ninian, lidera husi  Xefi Negosiadador  prinsipal delimitasaun fronteira Maritima, Kay Rala Xanana Gusmão, akompanha Ministru Estadu Prezidensia Konselhu Minsitru, Agio Pereira no Adjunta Elisabeth  Expostu.

Durante prosesu ne’e  hala’o lidera husi Prezidente meza Taksoe- Jensen  no advogado  husi Timor Leste ninian ne’ebé maka Estadu fo kontratu,   professor  Voluchan Lowe no Michel Wood Koong.

Iha aprezentasaun Kay Rala Xanana Gusmão nian ba Tribunal Haia, Holanda, hatete katak, Timor-Leste sei la hakiduk atu koalia kona ba delimitasaun FM ho Australia, tanba ne’e direitu TL nian.

“Ami la hakiduk. Timor sei luta. Ami la mai hasu favor. Ami mai hodi husu ami nian direitu iha lei internasional,”dehan Xanana Gusmão iha Tribunal Arbitrajen, Haia, Holanda, Segunda (29/08/16).cos/avi

.

PR Taur lakohi Governu atrapalla servisu RTTL – Haruka ona karta ba Governu

.

Jornal Nacional Diário - 02 de setembro de 2016

Prezidenti Repúblika (PR), Taur Matan Ruak lakohi Governu atrapalla servisu jornalista sira nian iha Radio Televizaun Timor Leste (RTTL), tanba servisu jornalista nian la’os hanesan servisu bai-bain.

Relasiona no preokupasaun ida ne’e, PR Taur Matan Ruak haruka karta urjente ida ba Governu hodi buka solusaun lalais ba problema ne’ebé mak oras ne’e dada’uk jornalista sira iha RTTL hasoru.

“Sitausaun ida ne’e desestabilija no atrapalla sira (RTTL) nia servisu, i ne’e halo sira la fó sira nia enerjia 100%, pior liu ema sira ne’ebé tinan barak servisu ona no iha esperensia, tanba ita ko’alia kona-ba rekursus umanus, maibé ida ne’ebé iha ona esperensia, ita duni tiha, ita dada fali ema ne’ebé foun ita hanorin tiha, ita duni tan,” dehan PR Taur Matan Ruak.

Xefi Estadu ne’e afirma,  dalan diak ba funsionáriu sira iha RTTL tenki hetan solusaun ida ne’ebé mak bele motiva, inspira no fó korazen jornalista sira iha RTTL ne’e bele hala’o sira nia servisu ho diak.

 Presidenti Taur iha preokupasaun bo’ot ba situasaun ida ne’e, maibé nia enkoraja nafatin Governu para buka solusaun ida ba problema ida ne’e.

Taur Matan Ruak dehan, Governu iha Sekretáriu Estadu ida ne’ebé mak tau matan de’it ba servisu jornalista sira nian, li-liu RTTL.

 Iha sorin seluk Primeiru Ministru (PM) Rui Maria de Araújo rekuñese katak, nia simu duni karta ida husi Prezidenti Repúblika, mas konteudu karta ne’e, nia labele deskobre sai ba públiku.

“Ha’u konfirma de’it katak, iha karta duni, maibé nia konteudu la’os atu ko’alia iha públiku,” dehan PM Rui Maria de Araújo ba jornalista sira iha Palacio Prezidensia Aitarak Laran Dili, Kinta (01/09).

Xefi Governu ne’e hatutan, Prezidenti Repúblika haruka karta duni ba Governu hodi husu informasaun kona-ba prosesu tranzisaun iha RTTL nia laran halo nusa.

Rui Araújo dehan, karta ninia detaillas ne’e, nia labele ko’alia sai, maibé iha tempu badak Governu sei fó resposta ba Prezidenti Repúblika.cos

.

PN la konkorda halakon total PV

.

Jornal Nacional Diário - 01 de setembro de 2016

Parlamentu Nasionál (PN), la konkorda ho hanoin Prezidenti Repúblika (PR), Taur Matan Ruak, nian ne’ebé hakarak atu halakon total Pensaun Vitalisia (PV). Maibé Prezidenti Parlamentu Nasionál (PN) Aderito Hugo da Costa konkorda  bele hasai buat balun ne’ebé mak la presiza.

Prezidenti Parlamentu Nasionál, Aderito Hugo da Costa hateten katak, pontu devista husi Parlamentu Nasionál ba pensaun vitalisia ne’e, pensamentu Estadu, labele haree ba ida-idak ninia uniforme.

“Redusaun sim, hamenus buat balun ne’ebé ke la presiza, buat ne’ebé mak presiza, Estadu sei halo nafatin, buat ne’ebé mak la presiza hasai,” katak Aderito Hugo ba jornalista sira iha Palácio Prezidensia Repúblika Aitarak Laran Dili, Kuarta (31/08).

Nia afirma, diskusaun pensaun vitalisia ne’e, agora dada’uk Parlamentu kria tiha ona komisaun ida, komisaun ne’e mós halo tiha ona ninia pareser ida ba meza Parlamentu Nasionál atu halo ajenda diskusaun.

 “Hanesan Estadu atu trata ema sira servidor Estadu ne’e ho saida, tanba ema sira ne’e, Estadu bolu atu sai servidor, la interese nia atu mai husi ne’ebé, mas nia hanesan Timor-oan ida prontu atu sai servidor Estadu,” Xefi Órgaun Lejislativu ba terseiru lejislatura ne’e fundamenta.

Aderito Hugo da Costa dehan tan, atu rekoñese servidor Estadu sira ka la rekoñese ne’e reprezentante demokrátiku bazeia ba konstituisaun.

“Kona-ba ejijensia apaga total ne’e, ha’u la fó komentáriu, mas hanesan ha’u dehan, desizaun la’os iha Prezidenti Parlamentu nia liman, desizaun iha Parlamentu ne’e, desizaun koletivu, ita haree tok aspirasaun sira ne’e, bele tama to’o iha reprezentante povu sira nian ka la’e,” tenik Aderito.

Nia haktuir tan katak, kona-ba lei pensaun vitalisia ne’e, Prezidenti Repúblika espresa ona ninia observasaun, maibé prosesu atu halo lejislasaun ne’e, iha ninia dalan rasik.  “Depois mak ita hatene, konteudu husi alterasaun ne’e halo nusa, tanba enprinsípiu opiniaun ne’ebé la’o ba lei rua ne’ebé eziste desde 2007 ne’e mak ne’e, elemina total, la presiza fó kualker buat ida servidor Estadu sira, iha ida dehan katak, Estadu tenki fó rekoñesementu duni ba servidor Estadu sira ne’e, para dignifika sira,” dehan Aderito Hugo da Costa.cos

.