LERE:LPV BELE HAMOSU GOLPE MILITÁR

.

Jornal Independente - Husi Artur da Luz - 26 de agosto de 2016

Dili- Lei Pensaun Vitalisia halo ema barak lakon esperansa, hahú husi povu ki’ik to’o lideransa sira. Xefe Estadu Maiór Jenerál F-FDTL, Majór Jenerál Lere Anan Timur, lei ne’e bele hamosu golpe militar hasoru lideransa sira.

Maski lei ne’e diskriminativu hasoru luta na’in sira no la fó benefisu ba povu ki’ik maibá Jenerál Lere seidauk hanoin atu halo golpe militar.

“Ha’u maka lakohi hanoin hanesan ne’e ba nasaun maibé presiza tetu didi’ak,” dehan nia iha Kuartel Jerál F-FDTL, Fatuhada-Díli, horiseik.

Tuir guerrelleiru ne’e deputadu sira iha Uma Fukun Parlamentu Nasionál, egoista tanba hanoin sira ninia-aan de’it maibé haluha tiha povu ki’ik sira ho veteranu sira ne’ebe uluk luta liberta nasaun ne’e.

“Deputadu sira hanoin de’it ba sira-nia kabun, maibé haluha tiha veteranu no eis guerrelleiru sira ne’ebé oras ne’e balun abandona hela,” dehan ho lian makaas, iha Kuartel Jerál F-FDTL, Fatuhada, Díli, horiseik.

Ne’e duni, Jenerál Lere apoiu Prezidente Repúblika, Taur Matan Ruak, hodi veta Lei Pensaun Vitalisia, tanba la fó prioridade ba povu ho veteranu sira ne’ebé uluk vota ba nasaun ne’e.

“Ha’u la’os ema politika, maibé ema veteranu haree lei pensaun vitalisia ne’e injustisa boot,” tenik nia.

Tuir nia, sira ne’ebé hamutuk ho inimigo (Indonézia) sira kontra nasaun ne’e, ne’ebé sai deputadu tuur iha Parlamentu Nasionál tinan lima de’it maibé halo lei ba sira-nia aan hodi simu osan pensaun vitalisia nian.

“Ha’u la’os ema politika maibé ha’u kontra duni,” hateten ho lian makaas.

Lere dehan, ema ne’ebé uluk luta haluha tiha sira-nia esforsu tomak ba rai ne’e, tanba ne’e politiku na’in sira tenke tetu didi’ak maka halo lei ho seriedade, hodi nune’e kondis ba situasaun ne’ebé iha.

Nia hateten, Governu reforma ona veteranu sira hamutuk 20-resin, maibé oras ne’e laiha asisténsia di’ak ba sira. Maibé eis deputadu, eis membru Governu no eis titulár sira hetan pasaporte diplomata no osan viajen ba-mai maibé la halo buat ida.

Antes ne’e Prezidente Repúblika (PR), Taur Matan Ruak, promete sei veta alterasaun Lei Mensál Pensaun Vitalisia ne’ebé prepara ona husi Parlamentu Nasionál. Xefe Estadu hakarak lei ne’e halakon total.

Xefe Estadu hato’o nia desizaun ne’e tanba durante vizita suku, komunidade sira husu atu la’os de’it halo alterasaun, maibé se bele hamoos tiha, halo ema sai baruk-teen no benefisiu ema balun de’it.

“Ha’u apoiu katak, hapus ou hamoos Lei Pensaun Vitalisia no ha’u promete katak, ha’u sei veta lei ida ne’e karik Parlamentu haruka ba ha’u,” dehan PR Taur liu husi diálogu komunitária iha suku Mau-Nuno, Posto Ainaro, sexta (12-8).

Nia dehan, sei veta no propoin ba Parlamentu Nasionál atu halakon regalia sira iha lei ne’e, hanesan direitu ba telefone, karreta no sira seluk tan.

Se lae, tuir nia, ukun na’in sira tinan lima lima ukun tiha la halo buat ida, la’o tun sa’e depois sira simu osan pensaun vitalisia, depois buka tan osan husi parte seluk.

.