DOM NORBERTO DÚVIDA HO ORSAMENTU RETIFIKATIVU

.

Jornal Nacional Diário - 21 de julho de 2016

Bispu Dioseze Maliana Dom Norberto do Amaral, senti dúvida ho Orsamentu Retifikativu (OR) ne’ebé Parlamentu Nasional aprova foin lalais ne’e, tamba Orsamentu Jeral Estadu seidauk ezekuta hotu.

“Ba ha’u pesoalmente, orsamentu rektifikativu ne’e kauza ne’ebé justu  bele halo, maibé hau hare buat ne’e iha hela de’it ratifikativu, maibé  Orsamentu  Jeral  do  Estadu  balun  ezekuta  la  hotu  tan,  nune’e  ratifika  osan  ne’e  ba  halo  saida, ne’e  la  tama  ita nia kakutak  no  halo  ita  ulun  moras,” dehan Bispu Dioseze Maliana Dom  Norberto  do  Amaral ba  JN-Diário  iha  Seminário  Minor  Balide,  Kuarta  (20/7).

Amo Bispu hatutan, tinan-tinan  Parlamentu  Nasional  aprova  Orsamentu  Jeral  do  Estadu  (OJE)  ho  montante  ida  ne’ebé  bo’ot, maibe ninia  benefisiu  ba  povu  laiha  nafatin.

“Ba  hau  nia  hare  konaba  progresu  dezenvolvimentu  iha  rai  ne’e  “tata  rai”mak  ne’e  de’it  ami  ba  iha  Zona  Espesial  Ekonomia  iha  Ambeno  Oe-cusse  ne’e  diak, nune’e  aban  bairua  projetu  ne’e  remata  allahamdulilah  sei lori  povu  Oe-cusse  ba  diak,  maibé  povu  tomak  oinsa,”tenik Dom Norberto.

Dom Norberto mos haktuir katak, uluk Prezidente  da  Repúblika  Taur  Matan  Ruak  nia liafuan dehan iha  Parlamentu  Nasional katak, Governu gasta osan arbiru ne’e iha  razaun, tamba  ita  soe  osan  arbiru  depois  ita  husu  osan  ratifikativu, osan  ne’e  povu  nian, maibé  gasta  la  ho  responsabilidade.

Tan ne’e nia sujere ba Governu, diak liu lalika iha projetu emerjensia, tanba halo ho ansi no laiha kualidade to’o ikus soe no abandonadu.

Iha parte seluk, reitor Unversidade Dili (UNDIL) Estevão da Costa Belo dehan, lolos Governu tenki tau orsamentu retifikativu bo’ot ba setor saude no edukasaun, tanba setor rua ne’e mak importante.

“Governu tenke aprova orsamentu ratifikativu barak liu ba area saude ho edukasaun, tanba setor ne’e mak importante, basa edukasaun mak xave dezenvolvimentu nasaun no saude diak mak nasaun forti,”dehan Estevão.

Tuir reitor ne’e katak, kuandu iha nasaun ida mak ema matenek menus, dezenvolvimentu lalao ba oin, tanba ne’e Governu tenke aprova OR barak ba setor refere. Nune’e kapasita dosente no profesores atu produs jerasaun ne’ebe kualidade.Tos/Eti

.