Veteranus TL iha oin rua, Lere garante estabilidade eleisaun 2017

.

Jornal Nacional Diário - 23 de junho de 2016

Xefi Estadu Maior das Forsas Armadas Falitil Forsa Defeza Timor Leste (F-FDTL) Maijor Jeneral Lere Anan Timur konsidera, veteranus iha Timor Leste (TL) ne’e iha oin rua mak hanesan, veteranus libertasaun nasionál, no veteranus ne’ebé mosu iha tempu ukun-an nia laran.

“Ema balun uluk lakohi ukun-an mós sai veteranu, sira ne’ebé hakarak ukun-an, la sai fali veteranu, ida ne’e prosesu ida ne’ebé komplikadu,” dehan Lere Anan Timur ba jornalista sira iha Palácio Prezidensia Repúblika Aitarak Laran Dili, Kuarta (22/06).

Maibé Lere Anan Timur dehan, atu rezolve ida ne’e, lei mak tenki funsiona ho di’ak, atu nune’e problema veteranus nian labele sai bo’ot liu tan.

“Sé lei ne’e dehan katak, sé mak falsifika dokumentu tenki ba tribunal, tenki lori ema sira ne’ebé falsifika dokumentus ne’e ba tribunal. Hanesan ita ko’alia korrupsaun, loron kalan ita ko’alia korrupsaun, mas ita la kaer ema koruptor ida,” Lere fundamenta.

Alénde ne’e, Lere Anan Timur mós dehan, papel ba seguransa eleisaun 2017 ninian, tuir loloos Polisia Nasionál Timor Leste (PNTL) ninian, maibé PNTL ho F-FDTL iha akordu ida atu asegura estabilidade nasionál ida ne’e.

“Ba eleisaun jeral 2017, ha’u la’os pesimista, ha’u fiar katak, ita nia komunidade iha ona maturidade no matenek ona, tanba saida mak sira vota, kampaiña oinsa, eleisaun primeiru ne’ebé ita halo iha 2000 mós laiha problema, kuantu mais agora moris ona iha dezenvolvimentu nia laran, atu halo tan problema,” afirma Lere Anan Timur.

Nia hatutan, povu mós lakohi atu la’o ba kotuk ona, tanba sira hatene saida mak di’ak ba nasaun TL atu la’o ba oin.cos

.