Alkatiri amiasa lori PDHJ ba tribunal tanba kritika ZEESM

.

Timor Hau Nian Doben - 01 de junho de 2016

Sekretariu-Jeral Fretilin, Mari Alkatiri, horiseik iha ninia pajina Facebook amiasa lori Provedor Justisa Silvério Pinto ba tribunal,  tanba relatoriu ida kona ba Projetu Ekonomia Especial Merkadu Sosial (ZEESM) “konkluzaun aprezenta ba Publiku antes atu rona esplikakasaun Autoridade nian.”

Tuir media lokal relatoriu hosi monitorizasaum ke Provedoria dos Direitos Humanos no Justiça (PDHJ) halo hateten katak, “Rezultadu hosi monitorizasaun ne’ebe PDHJ halo ba mega projetu ZEESM, Oecusse, identifika povu barak nia direitu ekonomia, sosial no kultural hetan violasaun mega projeto ne’e”. Relatoriu ida ne’e mos dehan katak, “Material projetu ZEESM laiha kualidade”.

Lider Fretilin nian iha Facebook akuza Silvério Pinto ho“imparsialidade (...) tanba interesse políticos”.

“Provedor Silverio Pinto viola principios Direito (Hukum) iha procedimento halo relatorio no konkluzaun aprezenta ba Publiku antes atu rona esplikakasaun Autoridade nian. Ne'e viola principio de direito ao CONTRADITORIO principio ida sagrado bainhira it buka duni Justiça. Iha sorin fali relatorio ne'e hatudu parsialidade (defende interesse ruma que dok husi interesse Justiça) atu ho tendênsia fo fiar ba informasau nebe'e tendências politikas balu domina sira nebe'e la iha simpatia ba programa ZEESM, tanbba interesse politika deit”, hakerek Alkatiri.

Mari Alkatiri mos dehan katak Provedor Justiça halo “propaganda politika barata nian”.

"Hare ba kazus concretos PDHJ fo informasaun nebe'e halo konfuzaun bot tanba la iha kapasidade atu analiza programa foun no la buka hatene Projetu sira ida2 nia origem. Kollia la ho faktus maibe'e ho informasaun propaganda politika barata nian. Autoridade Regional sei apresenta caso ne'e balu ba Ministerio Publiku atu husu Ministerio Publiku mai investiga no mos sei apresenta ba Parlamebto Nasional atu husu Parlamento nia Comissoões espesializadas atu mai halo fiscalizasaun. Ikus mai maka iha materia karik, Autoridade Regional sei lori kazu ne'e ba Tribunal”, ramata.

Timor Hau Nian Doben koalia ho membru hosi Non Governmental Organization (NGO)  ida no nia dehan katak, “Fretilin la hatene ona prinsipiu rasik Fretilin nian, kritika no auto-kritika. Se-se deit mak koalia no la tuir sira nia hakarak ka sira nia jogu politiku sira amiasa kedas ho tribunal. Oinsa ita bele fiar katak PN ba halo monitorizasaun imparsial ida? Sira rasik mak aprova osan no defende makaas mega projetu ida  ne’e. Ohin loron ami tenki suku deit ami nia ibun tanba boot sira alerjia tebes ba kritika no bainhira ami koalia boot sira sama ami kedas ho amiasa tribunal. Ida ne’e estratejia ida hodi hatauk povu”.

Membru NGO refere dehan tan katak, “ PDHJ mos tenki ba halo monitorizasaun ida ba uzu aviaun ZEESM nian, ami hahu rona katak aviaun ZEESM nian,  Mari no Fretilin uza hodi kalo kampanha iha Munisipiu seluk. Aviaun ida ne’e laos Mari ka Fretilin nia kusta, povu nia osan mak sira uza hodi hola. Osan boot Governu fakar ba mega projetu ida ne’e povu nian, ami iha direitu hodi deskonfia ka kestiona projetu ne’e. Karik Mari la hatene simu kritika hosi povu antaun diak liu la kaer osan povu nian no diak liu rezigna ninia aan hosi projetu ida ne’e”.

Ikusikus mai partidu Fretilin iha tendensia hodi amiasa lori ema ba tribunal bainhira sira koalia buat ruma ke la kona ba sira nia vontade ka kona ba sira nia jogu politiku. Loron balun liu ba, deputadu Fretilin, Eládio Faculto, amiasa lori ba tribunal Padre Martinho Gusmão tanba representante povu  ida ne’e ninia partidu hetan kritika balun iha artigu ida ke Amu Martinho hakerek. Primeiru-ministru de facto, Rui Araújo, mos lori ona jornal no jornalista ida, Raimundu Oki no Timor Post hodi ba hatan iha Tribunal tanba alegadamente halo difamasaun hasoru primeiru-ministru de facto.

Iha Facebook, STL Media Grupo, ema ida (AG) hakerek: “ Mari Alkatiri dehan ZEEMS iha Oecusse sai Isemplo ba Dezenvolvimentu maibe iha rejultado Monitorizasaun PDHJ dehan povu barak mak sai vitima ba ZEEMS. iha sorin seluk Mari Alkatiri Lori osan Estado sosa Ro no Aviao hodi fasilita aktividade FAMILIAR ALKATIRI NIAN NO AKTIVIDADE PARTIDO FRETILIN NIAN IHA RAI LARAN.”

Mega Projetu ZEESM hetan kritika barak hosi sosiedade sivil balun, povu nomos orgaun soberania ida, maibe to’o agora primeiru-ministru de facto sei la rona ka hatan preokupasaun sira ne’e no nafatin fakar osan barak ba projetu ida ne’e no hatun osan iha Orsamentu Jeral Estadu 2016 nian, osan ba areas importante tebes hanesan: Edukasaun, Saude no Agrikultura.
.