Ramos Horta:“Ita tenke hakruk ba desizaun PR Taur” – Xanana la fo komentariu

.

Jornal Nacional Diário - 20 de abril de 2016

Eis Prezidente Republika, José Ramos Horta, husu  Timor oan  hotu atu hakruk ba desizaun Prezidente Republika, Taur Matan Ruak ba nomeasaun Pedro Klamar Fuik ba Xefi Estadu Maior Falintil Forsa Defesa Timor Leste (F-FDTL) ho Coliati ba Vise.

“Se Prezidente halo ona nomeasaun  ne’e ita hot-hotu tenke hakruk ba desizaun Prezidente nian,  ne’e normal. Balun simu balun la simu,”esplika José Ramos Horta hafoin fila husi Inglatera ho aviaun Silk Air  iha Aeroportu Internasional Nicolau Lobato Dili Tersa (19/04).

José Ramos Horta  relembra katak,  uluk eleisaun ba  Prezidente Republika nia manan deit 70%, 30% la simu, maibe buka servisu ho deit 30%,  portantu ne’e mak lalaok Estadu.

“Entaun se nomeia ema ida ba Xefi Estadu Maior balun la simu ne’e normal,   ne’e ita país livre demokrasia, tantu sira la simu tanbasa  ne’e maka ha’u  la hatene,  ne’e normal iha situasaun demokratiku  sira bele kritika,”tenik Ramos Horta.

Ramos Horta rasik simu nomeasaun husi Prezidente Republika ba Pedro Klamar Fuik ba Xefi Estadu Maior F-FDTL no Coliati ba nia Vise.

“Ha’u ema  ne’ebe Prezidente Republika halo desizaun ruma  ha’u simu, ha’u  laos la hateten fali la simu. Portantu Prezidente Republika halo nomeasaun nia sukat buat hot-hotu maka halo  nomeasaun ne’e, la’os deit kriteriu ida rua, maibe nia sukat buat hot-hotu tane  buat hotu halo desizaun ida,”haklaken Ramos Horta.

Nune’e, Ramos Horta, mos husu ba Pedro Klamar Fuik ho nia Vise Coliati atu garante konfiansa  ne’ebe maka Prezidente Republika fo ona.

 Relasiona ho kargu xefia Xefi Estadu Maior F-FDTL Pedro Klamar Fuik  ne’e, Jose Ramos Horta mos sei buka koalia ho Jeneral Lere Anan Timur.

“Ha’u sei koalia ho tiu Jeneral Lere para  nia  hatudu sentidu  nudar  veteranu, nudar ema Estadu, sentidu Estadu para  kolobora nafatin para hametin dame estabilidade  iha  forsas armadas nia laran, iha nasaun nian laran.  Lere ne’e ha’u konhese nia diak uluk kedas ha’u hatene nia halo  buat hotu para Estadu ne’e iha estabilidade,”haktuir premiadu nobel da paz 1996 ne’e.

Alende ne’e mos, eis Prezidente Republika  Jose Ramos Horta mos promete  sei buka koalia ho Amu Bispu  no Sosiedade Sivil para haree halo dialogu ho lider politika sira ba jogada politika  ne’ebe agora akontese iha nasaun ne’e, hanesan iha Bloku Koligasaun rahun no hasai Vicente Guterres husi Prezidente Parlamentu Nasional tanba la obedese ona ba Partidu CNRT.

“Ha’u hanoin konfiansa la iha problema, importante maka bele halo jogada politika, maibe keta  haluha fali Governasaun no ezekusuan orsmental, se lae lakon tempu deit ho joga karta politika  depois la halo Governasaun, mas  Primeiru Minstru Rui Araújo nia la halo jogu politika nia ne’e ema teknokrata, ha’u fiar sel-seluk halo jogu politika bai-bain maibe nia halo Governasaun ne’e maka diak,”dehan Ramos Horta.

Xanana la fo komentariu

Iha oportunidade  ne’e, Jornalista sira husi Media Imprensa no elektroniku ne’ebé ezisti iha Timor-Leste hein hela eis Komandante Em Xefi Falintil  aktual Ministru Planeamentu  Investimentu Estratejiku (MPIE), Kay Rala Xanana Gusmão, iha Aeroportu Internasional Nicolau Lobato Comoro, ho objetivu atu enterevista kona  ba asuntu Kargu xefia   Xefi Estadu Maior F-FDTL ne’e, hafoin fila husi Nasoens Unidas,   maibe  Xanana tun husi Aviaun Silk Air,  tuku 02:00 OTL ba sae kedas kareta privadu  ne’ebe maka eskoltu sira  lori no  hodi kedan Xanana ba nia rezidensia.avi

.