MANUEL TILMAN AFILIA BA PLP

.

Timor Post -18 de abril de 2016

AINARO—Durante ukun án to’o agora kontinua mosu injustisa iha nasaun ida ne’e, tanba ne’e maka Partidu Libertasaun Populár (PLP) mosu hodi bele liberta povu hosi injustisa sosiál.

 “Ita haree durante ne’e ita ukun án tinan 15 nia laran ona ita kontinua hasoru injustisa sosiál ne’ebé maka kontinua la’o. Katak, espíritu partidarizmu no familiarizmu maka maka’as ne’ebé la hadi’a povu nia moris. Tanba ne’e maka PLP mosu hodi hadi’a sasán hirak ne’e. Sé lae, problema boot ba jerasaun tuir mai,” Vise Prezidente  PLP, Sabino Soares ‘Guntur’ dehan liu-hosi nia deskursu ba seremónia lansamentu estrutura PLP iha Munisípiu Ainaro, Sábadu (16/4).

Nia haktuir katak durante ne’e partidu barak maka manán no kaer governu nunka hadi’a povu nia kondisaun povu maibé hadi’a de’it família no partidu nia di’ak, Tanba ne’e maka PLP hamriik hodi halakon tiha espíritu sira hanesan ne’e.

Iha fatin hanesan, Koordenadór PLP Munisípiu Ainaro, Ernesto da Silva tenik katak eleisaun jerál 2017 mai ne’e PLP sei manán absoluta iha Ainaro. Agora dadauk, foin la’o fulan tolu ami hetan ona kartaun eleitorál apoiantes 3.500 ona. Ne’e hatudu katak PLP sei manán iha Ainaro.

Nia dehan katak nia tama PLP ho objetivu atu dezenvolve nasaun ida ne’e tanba durante ne’e laiha dezenvolvimentu ne’ebé maka di’ak liu-liu ba ema ne’ebé maka hela iha área rurais.

Entretantu, Prezidente  Partidu Klibur Oan Timor Aswain (KOTA), Manuel Tilman, afilia ona ba PLP. Nia hatete  nia ba hamutuk ho PLP tanba liufuan ida katak “hikis kosar ba moris di’ak”. Tanba ne’e maka nia hakarak hamutuk ho PLP hodi hikis kosar ba povu nia moris di’ak.

“Ha’u mai tanba liafuan “hikis kosar ba moris di’ak”. Ida ne’e maka bolu ha’u atu ita mai hamutuk fó liman ba malu ita dezenvolve rai ida ne’e,” Tilman informa.

Nia haktuir durante ne’e laiha partidu ka ukun na’in ida ne’ebé maka tane no haree nia povu nia terus to’o baze maibé PLP mosu ho liafuan libertasaun populár ne’e partidu ida ne’e maka povu ninian. (way)

.