Tribunál fó razaun ba Governu kona-ba Osan Infraestrutura ne’ebé Prezidente kestiona

.

Sapo.pt ho Lusa

Tribunál Rekursu, fó sai konstitusionalidade kona-ba artigu Orsamentu Estadu nian ne’ebé kria Fundu Infraestrutura no ne’ebé kestiona ba iha pedidu fiskalizasaun abstrata hosi Prezidente Repúblika, Taur Matan Ruak.

Xefe Estadu Timor-Leste, Taur Maran Ruak, husu ona fiskalizasaun abstrata konstitusionalidade hosi Orsamentu Estadu, hanesan dokumentu ne’ebé nia veto iha finál tinan 2015, hodi hetan hikas aprovasaun, ho unanimidade hosi Parlamentu Nasionál.

Hosi aspetu orsamentu nian ne’ebé Prezidente kestiona tama ba iha artigu 11, ne’ebé kria Fundu Insfraestrutura (FI) foun, hanesan fundu autónomu ho personalidade jurídika rasik, autonomia administrativa, patrimoniál no finanseira.

Koletivu juiz ne’ebé konstitui hosi Maria Natércia Gusmão, Deolindo dos Santos ho Jacinta Correia da Costa konsidera katak artigu refere laviola prinsípiu Estadu Direitu, rezerva lejsilativa absoluta hosi Governu, regra espesifikasaun ka prinsípiu separasaun poder.

Akórdaun hosi tribunál konsidera mos katak laiha violasaun lejislasaun kona-ba rekizitu hosi kriasaun fundu autónomu no ba iha prinsípiu espesifikasaun no publisidade.

Iha ninia espozisaun no pedidu fiskalizasaun, Prezidente Repúblika konsidera katak lahanesan, tanba Governu hakarak hetan benefísiu hosi regra administrasaun indireta Governu nian “atu kontrola ba ninia ezekusaun”, liu hosi Ministériu Planeamentu no Investimentu Estratéjiku.

Iha tempu hanesan, xefe Estadu mos subliña liu tan katak fundu ne’e labele fó benefísiu ba rejime fundu autónomu, tanba tuir lei, fundu refere iha ninia reseita rasik.

Hanesan resposta, Governu haktuir katak ida ne’e hanesan desizaun ne’ebé nia maka tenke foti no autonimizasaun hosi FI “importante hodi halo ezekusaun ba Programa Governu”.

Governu hatutan liu tan katak, foti desizaun ba autonomizasaun hosi fundu, atu hoi hetan “flesibilidade jestaun bot, ba iha dezafiu ne’ebé iha”, asegura finansiamentu ba iha projetu plurianuál liu hosi kontrolu parlamentu nomós Kámara Kontas.

Fó hatene kona-ba kazu ne’e, primeiru ministru Rui Maria de Araújo, halo sitasaun ba xefe Estadu ninia deklarasaun ne’ebé fó sai iha livru biográfiku ida ne’ebé konsidera katak “bainhira lainveste ba iha infraestrutura no área estratéjika seluk, maka naturalmente sei lafasil atu absorve maun-de-obra”.

Iha desizaun ne’eb’e foti, tribunál hatutan tan katak regulamentasaun fundu nian husik ba Governu no bainhira aprova ona diploma ne’ebé regulamenta maka foin bele determina “karik nune’e ka lae, hetan finansiamentu mos hosi reseita rasik”.

Maski halo ona transferénsia osan ba finansiamentu fundu ne’e, maibé “labele dehan katak la’os mai hosi reseita rasik”, ka tenke halo separasaun katak regulamentasaun tuir mai “sei ajuda alkansa objetivu transferénsia nian ba iha jestaun hosi bens públiku”, dehan tribunál.

SAPO TL ho Lusa

.