PN APROVA VIZITA PR TAUR HO ABSTENSAUN 36

.

Jornal Nacional Diário - 09 de fevereiro de 2016

Parlamentu Nasional (PN), Tersa (8/3/2016), aprova ona vizita Estadu Prezidenti Republika (PR), Taur Matan Ruak nian ba Japaun.

Liu husi sesaun plenaria aprovasaun, membru PN nain 12 fo votus a favor, nain 36 abstensaun no kontra zero.

PR Taur Matan Ruak sei ba Japaun hahu loron 12 too 16 iha fulan Marsu nee nia laran, atu aprofunda liu tan kooperasaun bilateral entre povu no nasaun rai rua ne’e.

Vise Presidente Parlamentu Nasional, Adriano do Nascimento, hatete PR Taur atu ba ou laba ida ne’e lei hatete dehan tenki maioria mak ba ou votus hanesan ne’e la ba ne’ebe ohin abstensaun ne’e lasura entaun votus a favor 12 admiti no legaliza ona vizita PR nian.

Nia hatutan Presidente da Republika ne’e hanesan Xefi Estado simblo nasaun nian, se Presidente la ba ema bele dehan nasaun ne’e la hakmatek, maibe ho Xefi Estadu ba ne’e iha problema mas mai mak rezolve.

Iha fatin hanesan Presidente bankada CNRT Natalino dos Santos hatete abstensaun 36 ne’e tamba desizaun deputadus sira nian ne’e ho konsiensia.

“Depende se mak vota a favor, vota kontra mais ohin ita bo’ot sira hare abstensaun ne’e direitus deputadu ida – ida nian atu foti desizaun, vota abstensaun 36,” hateten Deputadu Natalino dos Santos.

Husi sorin seluk, Ministru Negosio Estranjeiro no Koperasaun (MNEK), Hernani Coelho, informa katak, preparasaun ba vizita Xefi Estado nian ne’e ba Japaun ne’e prontu ona.

“Kona ba vizita ofesial Prezidente Republika nian ba iha Japaun, oras ne’e dadauk preparasaun hotu ona, ita hein deit katak iha loron rua tolu nia laran ne’e bele finaliza atu nune’e Prezidente bele desloka ona,” informa Hernani Coelho hafoin hasoru malu ho Prezidente Republika, Taur Matan Ruak ia Palacio Presidensial.

Iha hasoru malu ho Xefi Estado ne’e, Hernani hato’o mos programa ne’ebe mak atu hala’o durante vizita, koalia mos oitoan kona ba topiku sira ne’ebe prezidente sei foti nune’e mos Japaun. nes/mia

.