PD PRONTU HUSIK KARGU IHA GOVERNU

.

Timor Post

DILI-Kuadru Partidu Demokrátiku (PD) ne’ebé assumi pasta Ministru Estadu Koordenador Assuntu Sosiais i Ministru Edukasaun, António da Conceição, afirma, prontu husik governu bainhira Primeiru Ministru laiha ona konfiansa.

“Se siñor Primeiru Ministru mak lakon ona konfiansa ba ha’u ohin, ohin mós ha’u sai hosi Ministériu da Edukasaun mas enkuantu siñor Primeiru Ministru seidauk ko’alia liafuan ida ba ha’u, ha’u sei ejerse ha’u nia responsabilidade ba nasaun i ba povu,” hatete Ministru António ba jornalista sira iha nia servisu fatin edifisiu ME, Vila-Verde, Dili, Tersa (15/03).

Ministru António afirma, hanesan membru governu submete ba Primeiru Ministru ninia desizaun tanba nia asumi kna’ar hanesan ministru iha VI governu konstitusional ne’e indizitadu hosi Primeiru Ministru no hetan aseitasaun hosi Prezidente Repúblika.

Prezidente Comisaun Polítika Nasionál (CPN), partidu PD ne’e rekoñese katak, PD simu ona karta hosi partidu mais votadu CNRT katak hahú hosi dia 11 fulan Marsu liu ba, Bloku Koligasaun la konta ona ho partidu PD maibé hanesan opozisaun iha PN.

“Ha’u fó de’it rekoinesimentu ida katak ami simu duni karta ida hosi partidu CNRT ne’ebé dehan ona lakonta PD hanesan bloku apartir de dia 11 fulan Marsu liu ba ne’e iha Parlamentu no mós iha Governu,” Ministru António hatutan.

Prezidente CPN ne’e mós afirma, PD rasik seidauk iha pozisaun ofisial kona-ba desizaun partidu CNRT nian ne’ebé mak hasai PD hosi Bloku Koligasaun.

Iha parte seluk, Xefe bankada CNRT iha Parlamentu Nasionál (PN), Natalino dos Santos hatete kona-ba remodela ka hasai membru governu hosi partidu PD nian ne’e kompeténsia Primeiru Ministru nian.

“Kompeténsia atu hasai ministru ne’e se? Ne’e Primeiru Ministru. Iha Parlamentu pozisaun PD hanesan ona opozisaun,” afirma Natalino dos Santos.

.