OHIN, POVU TL DEMO EJIZE DIREITU BA TASI TIMOR – INDONESIA, FILIPINA HO AUSTRALIA FO SOLIDARIDAD

.

Jornal Nacional Diário- 22 de março de 2016

Povu Timor-Leste (TL) tomak inklui organizasaun politika no sosiedade sivil, ohin Tersa (22/3/2016) hamrik halo manifestasaun pasífika kontra Governu Australia hodi ejize nia direitu ba Fronteira Marítima TL nian ne’ebé sei disputa hela atu bele termina lalais.

Povu TL konsiente ona katak, nia riku soin sira iha Tasi Timor sei okupa hela husi Australia. Tanba ne’e mak povu TL ejize ba Australia atu tur negosia fronteira maritima ne’ebe ideal liu iha linha klaran. Liafuan liberta patria tenke liberta husi Tasi, Rai Maran no Lalehan.

Manifestasaun ne’e mos Movimentu Kontra Okupasaun Tasi Timor (MKOTT), sei hala’o iha munisipiu tolu; Dili, Manufahi ho Lautem inklui mos nasaun liur hanesan Indonesia, Filipina ho Australia.

Porta voz MKOTT, Juvinal Dias hatete, ,manifestasaun ne’e laos negosiador ka Governu mak halo ne’e manifestante sira maka halo, manifestasaun ne’e mai husi povu TL nia konsiensia rasik. tan ne’e mak povu tomak hotu hamrik inklui Timor oan sira ne’ebe mak hela iha ema nian rai hamrik tomak hodi hakilar ba soberania tasi Timor.

‘’Preparasaun ba manifestasaun aban nian ne’e 90% preparadu hotu ona I MKOTT  hanoin katak manifestasaun ne’e atu hakotu interese TL nian ita hotu hatene katak, Xanana  maka sai hanesan negosiador principal,oinsa atu hatene etika diplomasia nian, manifestasaun sira labele hatudu katak, ema ne’ebe halo negosiasaun ne’e iha hela manifestador nia laran,”dehan Juvinal via telefone, Segunda (21/03/2016).

Juvinal hatete, la bele hatudu imajen ida katak, Kay Rala Xanana Gusmao lori nasaun hasoru Australia tenki hatene negosiador ne’e iha nia papel diferente nia tenki halo asaun diplomatiku ida tanba ne’e maka movimentu kontra okupasaun tasi Timor nia hanoin dehan  bandu la bele lori fotografia Xanana nian hodi halo manifestasaun ne’e lalos, fotografia  saida  deit tenki lori iha manifestasaun.

Iha fatin seluk Movimentu Feto Timor Leste (MFTL) Kontra Okupasaun Tasi Timor sira mos sei hamrik firme iha oin hodi partisipa iha manifestasaun kontra Australia ba soberania tasi Timor.

Porta voz MFTL, Judit Dias Ximenes hanesan mos Prezidente ba Redi Feto hatete, okupasaun tasi Timor husi Governu Australia nudar aktu jenosidiu ne’ebe kruel ,liu iha mundu ba futuru diak povu no Nasaun TL.

“Ami MFTL kontra okupasaun tasi Timor ho firmeza apela ba Governu Australia atu iha kultura boa vontade no boa fè hakat ba meza redonda hodi halo sorumutu ho Governu TL konaba de limitasaun fronteira maritima katak tuir lei interenasional haruka tenki iha tempu badak tenki diskuti,”dehan Judit liu husi konferensia imprensa iha Largo Lecidere.

Porta voz ne’e dehan, okupasaun tasi Timor no uja  ilegalmente  rezultadu rendimentu husi rendimentu mina iha tasi Timor husi Governu Australia hamosu ona impaktu negativu.

Husi litru ida mina ne’ebe Governu Australia foti halakon susuben  kopu ida ba labarik kik ida iha TL. Tanba husi litru ida mina rai Governu Australia  foti halakon  oportunidade joven Timor ida atu ba eskola no halakon hakbit agrikultura  atu sosa ekipamentu agrikulas,i mos halakon hakbit feto no labarik atu asesu ba fasilidade saude.

“TMFL kontra okupasaun Timor ejiji ba Governu Australia atu imidiamente ,buka Governu TL hodi diskuti konaba delimitasaun fronteira maritime entre nasaun soberanu 2 ne’e  TL ho Australia,”dehan Judit.

Husu Governu Australia atu rekunhese povu TL nia direitu fundamental atu hatene konaba nia delimitasaun fronteira maritima, husu mos atu fo fila hotu montante rendimentu diariu  husi mina timor ne’ebe Governu Australia naok ona durante tinan 30+,respeitu husu husu respeitu direitur humanus povu no Nasaun TL  hodi labele halo okupasaun illegal ba tasi Timor.

Tuir portavos ne’e katak Australia nudar fundador ba ONU tenki konsistente nafatin hodi obdese ba lei internasional  konaba fronteira maritima,labele naok riku soin Timor nian hodi kontribui  iha kauza ne’ebe violensia domestika no violensai bazeia ba jeneru iha TL .

“Ami MFTL kontra okupasaun ilegal  tasi Timor depozita  konfiansa tomaka ba eis comandante das Falintil Kayrala Xanana Gusmao hodi lideira prosesu  ne’e ho Governu Australia hodi ba ne’e gosiasaun  delimitasaun fronteira maritime,”tenik nia.

Judit dehan, iha movimentu ne’ebe maka sei halao iha loron aban ohin ne’e manifestante sira sei lori fotografia Xanana nian hodi halo manifestasaun hodi  hodi hatudu ba publiku tanba movimentu fato TL sira tau konfiansa tomak ba maun bot Xanana tanba Xanana maka sai hanesan negosiador.

Governu kordena MKOTT

Nune’e mos, VI Governu halo ona koordenasaun ho Movimentu Kontra Okupasaun Tasi Timor (MKOTT) kona-ba seguransa ba asaun pasífiku kontra Australia ne’ebe sei hala’o ohin Tersa (22/03) to’o Kuarta (23/3/2016).

Asaun kontra Australia husi MKOTT ne’e oinsa ejize ukun nain  Australia sira bele disponibel tur hamutuk negosiasaun ba Fronteira Marítima Timor-Leste ho Australia, ne’ebe disputa maka’as hela.

Enkontru entre Governu  ho MKOTT ne’e hala’o Segunda (21/03)  iha Palasiu Governu  ne’ebe maka partisipa hosi  Primeiru Ministru Rui Maria de Araújo, Ministru Defeza  Cirilo Cristovão no Ministru Interior Longuinhos Monteiro  no Xefi  Estadu Maior F-FDTL Maijor Jeneral Lere Anan Timur,  Komandante Jeral PNTL, Komisariu Julio Hornay, ho  Soseidade Sivil sira.

“Governu hola inisiativa halo kordenasaun kestaun seguransa ho Assosiasaun  dos Combatentes   da Libertação da Brigada Negra (ACBN) ho MKOTT kona-ba demonstrasaun masa ne’ebe maka  sei hala’o aban (ohin)   iha area Embaisada Australia ninian,”esplika  Ministru Interior Longuinhos Monteiro   iha Palasiu Governu, hafoin remata enkontru.

Longuinhos Monteiro hatutan, koordenasaun  ne’ebe hala’o entre Governu ho MKOTT ne’e atu konsolida mekanismu  kona-ba kestaun seguransa nian  iha  terenu  entre  parte rua.

“Ita hotu hatene  katak, iha diskusaun ida Governu tenki foti nia pozisaun hodi  fo tempu ba grupu rua atu aprezenta sira nia kestoens interna sira mai ho konkluzaun katak, aban (ohin)  sei iha kordenador parte rua sei servisu hamutuk ho parte seguransa  para depois  ita bele asegura movimentu masa  bele la’o ho diak repreprezenta duni soberania povu nian,”tenik Ministru Interior  ne’e.

Maske husu kona-ba masa hira  maka sei partisipa iha asaun ne’e, Governante  ne’e la esplika ema  hira maka sei hola parte iha asaun ne’e. Maibe nia dehan, masa sira  ne’e sei  reprezentante  hosi MKOTT, Soseidade Sivil, ACBN Veteranus sei konsentra bo’ot iha Dili laran.

“Aproveita   iha okaziaun  ida ne’e lori mos Komandante Jeral Polisia nia naran atu husu karik ohin komunidade sira ne’ebe maka uza  dalan  iha parte dader no parte lorokraik, evita para halo movimentasaun iha area prinsipal estrada Comoro ninian, tanba iha  ne’eba sei  iha konsentrasaun hosi masa, atu labele prejudika  movimentu  sosiedade nian  iha dalan alternativu Praia dos Coqueiros ou bele liu hosi Dili laran nian, tanba aktividade ne’e kuandu hala’o ona Polisia tenki foti medidas  taka dalan durante oras 8 nia laran,”dehan Longuinhos Monteiro.

Iha parte seluk, Portavos MKOTT, Maleve Guerra hateten, MKOTT ACBN halo koperasaun diak tebes  ho PNTL no F-FDTL atu asegura seguransa  iha momentu asaun ne’e.

“Povu Timor ne’e povu Maubere  iha maturidade  no hatene ona katak, nasaun  ne’e atu sai soberania presiza  ho integridade, presiza ho maturidade  ne’ebe maka ita garantia katak,  wainhira ita ukun a’an ita  seidauk iha fronteira, ukun a’an ne’e sei la kompletu, entaun ho razaun ida ne’e hotu-hotu iha konsiensia nasaun ne’e nia oan iha responsabilidade moral atu bele luta ba soberania ne’e,”dehan Portavos MKOT ne’e.

Nune’e mos, sektetariu ekipa Task Force ba asuntu interese nasional,   Jorge Alves hateten, maske Veteranus  Timor Leste ho Veteranus Australia  iha relasaun ne’ebe diak, maibe agora kestaun ne’e liga ho Governu Australia, la’os Veteranus.

“Hanesan Veteranus Timor Leste reprezenta hato’o ba Veteranus Australia  atu husu ba Governu Australia atu iha  vontade diak atu tur iha meja redonda para resolve problema fronteira maritima,”hateten  Jorge Alves.

Maske husu Vereranus hira maka sei partisipa iha asaun ne’e,  Jorge  Alves lakohi atu hateten, numeru masa Veteranus  lolos, maibe nia garante katak, Veteranus Munisipiu sira sei tun hotu.

“Veteranus ijiji ba Governu Australia maka ida ne’e, Governu Australia tenki simu pedidu Timor Leste nian  atu  resolve  problema fronteira marítima,”dehan Jorge Alves.

Australia  tenke rezolve fronteira maritima

Nune’e mos, Directora Caucus, Dinorah Grandeiro hatutan katak, iha manifestasaun ohin nian sei hala’o ho diak no utiliza pamfletu Xanana Gusmão nudar heroi Nasaun Timor nian.

 “Konserteza ami sei utiliza pamfletu ne’ebe pinta maun Xanana Gusmão nia oin, tanba nia maka nudar heroi Nasaun Timor nian,”haktuir Dinorah Iha Largo, Lecidere, Dili Segunda (21/03/2016). Nia/Avi/ Ita

.