Membru hosi Partido Democrático bele halo parte iha Governu hanesan independente

.

Sapo.tl ho Lusa

Membru Governu lima hosi militante Partido Democrático (PD) sei hetan konvite hodi sai nu’udar independente ka lahalo parte ona iha ezekutivu, dehan sekretáriu jerál CNRT, Dionísio Babo ba Lusa.

Dionísio Babo dehan ba Lusa katak ida ne’e nu’udar konsekuénsia “naturál” hosi desizaun Congresso Nacional da Reconstrução Timorense (CNRT) nian, hodi hasai PD hosi Bloku Koligasaun ne’ebé sei apoia Governu to’o 2017 no Frente Mudança de’it maka sei nafatin.

“Ministru sira ne’e halo parte iha Governu, tanba bloku refere. No hanesan baibain, karik bloku ne’e laiha ona, maka sei hato’o pedidu atu hatene, sira hakarak moris nu’udar independente, hodi lasai hanesan membru partidu ka kontinua nafatin iha partidu laran”, tenik Babo, ne’ebé mos hanesan ministru Estadu, Kordenadór ba Asuntu Administrasaun Estadu no Justisa ho mos ministru Administrasaun Estatál.

“Karik lakohi sai independente no tanba akordu bloku nian, maka bainhira akordu refere laiha ona, sei laiha tan ligasaun ho Governu”, dehan, hodi hatutan katak nunka atu uza liafuan demisaun ka haruka sai.

Desizaun ne’e foti liu hosi karta ne’ebé haruka ba PD, iha findesemana kotuk no vigora ona, no sei fó konsekuénsia ba iha kompozisaun ezekutivu, liu-liu ba iha membru na’in lima ne’ebé pertense ba formasaun polítika refere.

Hanesan ministru Kordenadór ba Asuntu Sosiál no ministru Edukasaun, António da Conceição, ministru Obras Públikas, Transporte noTelekomunikasaun, Gastão de Sousa ho ministru Komérsiu, Industria no Ambiente, Constâncio Pinto.

Nune’e mos ba militante PD nian hanesan visi-ministru Komérsiu, Nuno Pereira, ho sekretáriu Estadu Administrasaun Estatál, Samuel Mendonça.

Governu hetan apoia hosi koligasaun tolu entre forsa parlamentár haat (CNRT, PD no FM), Fretilin (partidu bot daruak) apoia liña jerál hosi asaun governativa, inklui programa Governu ho orsamentu nian.

Bloku Koligasaun ne’e, harii desde 2012, hafoin Aliança de Maioria Parlamentar (AMP) ida ne’ebé apoia ona Governu hosi 2007 to’o 2012.

Dionísio Babo defende desizaun CNRT nian ne’ebé nia rasik maka fó sai liu hosi karta ne’ebé haruka ba PD, hodi esplika relasaun sai entre sira la’o ladun di’ak desde eis-prezidente PD, Fernando La Sama de Araújo, mate.

Tuir esplikasaun ne’ebé iha, molok forma Governu “iha ona diskusaun nomós kompromisu informál” hodi haktuir katak Bloku Koligasaun sei bele kontinua, maski integra ba iha ezekutivu Fretilin, ne’ebé kontinua lahalo koligasaun no sai nu’udar partidu opozisaun, maski bankada seluk vota hodi apoia ezekutivu.

Husu kona-ba desizaun ne’e, dirijente PD nian ida lakohi atu fó deklarasaun ba Lusa, relasiona ho krítika hosi CNRT, maibé hatutan katak “koligasaun ida lasiknifika katak hothotu tenke dehan hanesan ka ho hanoin hanesan”.

"Ema idaidak iha ninia pozisaun no bele hato’o. Maibé, importante liu maka tenke iha votu ida, ba iha programa ka orsamentu, no ami fó dalan ba ne’e. Ami sempre halo ida ne’e", dehan dirijente refere.

Babo ohin haktuir katak la’os de’it atu haree kona-ba kestaun hanesan votasaun maibé mos “estabilidade governativa”.

"Ami presija parseiru ne’ebé bele halo serbisu hamutuk tuir akordu no prinsípiu ne’ebé iha ona. Ami sente buat hotu la’o di’ak durante saudozu La Sama nian, maibé agora mosu ona postura polítika foun ho lideransa PD nian foun", dehan.

Babo dehan katak fó vota a favor ba orsamentu, hafoin vetu hosi prezidente, tanba “sei simu ninia konsekuénsia polítika karik lahalo”, liu hosi mensajen ladun di’ak ne’ebé laapoia prinsípiu ba estabilidade governativa.

"Ida ne’enormál no halo parte ba iha prosesu demokrátiku. Iha nasaun seluk, karik parseiru koligasaun nian ida maka larespeita prinsípiu akordu nian, maka naturalmente sei hasai hosi koligasaun", dehan.

"Ami ko’alia akordu parseiru ida ne’ebé hakarak garante estabilidade, interese Estadu nomós nasaun nian", dehan.

Polémika entre partidu sira mosu, bainhira bankada CNRT no Fretilin defende atu kria komisaun eventuál hodi investiga deklarasaun xefe Estadu Taur Matan Ruak nian ne’ebé haktuir katak prosimidade entre Xanana Gusmão ho Mari Alkatiri hodi fó de’it benefísiu ba sira-ninia família no belun.

Deputadu PD nian ida, Virgílio da Costa Hornai, kestiona proposta refere, no konsidera katak laiha justifikasaun tanba PR mos bele hetan imunidade, karik nia hakarak bá ko’alia iha Parlamentu Nasionál.

.