Dom Basílio: Prezidenti koalia iha PN bazeia ba faktus

.

Jornal Nacional Diário - 07 de fevereiro de 2016

Bispo Diocese Baucau, Dom Basílio do Nascimento hateten katak, deklarasaun sira ne’ebé mak Prezidenti Repúblika (PR) Taur Matan Ruak hasai iha Parlamentu Nasionál (PN) foin lalais ne’e, bazeia ba faktus ne’ebé Prezidenti hatene.

Dom Basílio haktuir, intervensaun Prezidenti Repúblika nian foin lalais iha PN ne’e, tanba Prezidenti Repúblika iha liberdade espresaun hanesan Xefi Estadu.

“Ha’u hano’in katak buat ne’ebé mak Prezidenti hateten ne’e, buat ne’ebé mak Prezidenti kala haree ho matan, Prezidenti rona, Prezidenti bele iha dadus, tanba ha’u hanoin katak, Prezidenti Repúblika la’os ko’alia arbiru de’it, maibé ha’u hanoin katak, Prezidenti iha mós dadus atu halo afirmasaun sira hanesan ne’e,” dehan Dom Basílio do Nascimento ba Jornalista sira iha Câmara Excleciástica Diocese Dili, Sesta (04/03).

Bispo Diocese Baucau ne’e esklarese, iha buat rua mak hanesan, liafuan Prezidente Repúblika nian ne’e, alto mastradu ka aas liu ba nasaun, no fatin ne’ebé mak atu ko’alia ne’e, mak Parlamentu Nasionál (PN).

“Ne’eduni ha’u hanoin katak, Prezidenti Repúblika mós la ba hateten buat arbiru iha ne’eba, ha’u hanoin katak, Prezidenti hatete buat ne’ebé mak nia haree, nia rona nia sente hanesan Prezidenti,” katak Dom Basilio.

Nia dehan, Prezidenti Repúblika koalia ne’e, bazeia ba buat ne’ebé mak nia haree iha nia vizita sira ne’ebé mak durante ne’e nia halo ba Suku hotu iha Timor laran tomak.

“Ha’u hanoin katak, ema ida iha Timor Leste ne’e mak Suku-Suku hirak ne’e hotu, tanba nia dehan katak, nia vizita ona Suku 401, i la’o ain de’it, ne’eduni ha’u hanoin katak, nia hatene Timor Leste,” Dom Basílio afirma.

Konvida PR Taur

Enkontru ne’ebé Bispo Diocese Baucau, Dom Basílio do Nascimento, Bispo Diocese Maliana, Dom Norberto do Amaral no Bispo foun Diocese Dili, Dom Virgílio do Carmo da Silva ne’e, hodi aprezenta Bispo foun Diocese Dili nian ba Prezidenti Repúblika Taur Matan Ruak, no konvida Xefi Estadu ne’e atu partisipa iha ordenasaun Bispo foun Dili nian, ne’ebé sei hala’o iha Tasi Tolu.

“Ami ho Prezidenti koalia asuntu rua de’it, asuntu ida, ami hanesan Konferensia Episkopal, hakarak aprezenta Dom Virgilio hanesan Bispo Dili nian. Ami aprezenta hodi dehan katak, depois Dom Ricardo matebian mate, Diocese Dili Bispo laiha, ne’ebé agora Santo Padre hili Dom Virgílio hanesan Bispo Dili nian,” informa Dom Basílio ba Jornalista sira iha Câmara Excleciástica Diocese Dili, hafoin enkontru ho PR Taur Matan Ruak, Sesta (04/03).

Tanba ne’e mak Igreja fó hatene ba Prezidenti, oinsa mak uma kreda iha Timor Leste (TL), durante tinan ida nia laran, la’o ho Bispo rua, maibé agora Bispo Dili iha ona mak Virgílio.

Dom Basílio dehan, iha sorumutu ho Xefi Estadu ne’e mós, sira konvida Prezidenti Repúblika atu partisipa iha ordenasaun Dom Virgílio nian iha dia 19 de Marsu de 2016, ne’ebé sei hala’o iha Tasi Tolu.

Dom Basilio dehan, partisipasaun povu nian ba ordenasaun Dom Virgílio nian ne’e, mai husi sarani Diocese tolu nian.

Dom Basílio dehan, ordenasaun Bispo Diocese Dili Dom Virgílio ne’e mós, Konferensia Episkopal konvida hotu Dom Carlos Filipi Ximenes Belo.

Dom Basílio esplika, prosesu ba Vatikanu hili Bispu foun Diocese Dili nian ne’e, tinan-tinan, Konferensia Episkopal rai ida nian, haruka naran Amo Lulik na’in tolu ba Roma.

“Depois komu iha momentu ida ne’e ita seida’uk iha Amu Lulik barak, ne’eduni kuandu Nunsiatura husu, ita haruka,” relata Dom Basílio.

Nia haktuir, husi naran tolu ne’ebé mak haruka ba Roma ne’e, sira haree ida ne’ebé mak adekuadu ka cocok iha Diocese ida hanesan ne’e, ho kondisaun ne’ebé mak Diocese ne’e ninian, tanba ida ne’e Santo Padre ninia servisu.cos

.