Problema ezonerasaun Lere nian vingansa Governu no PN hasoru Taur

.

Opiniaun hosi Arnaldo Fretilino

Aban, kinta-feira, ita nia Prezidente  ba koalia iha Parlamentu Nasional no iha ita nia sosiedade nia le’et mosu ona espekulasau barak. Balun dehan katak TMR ba aprezenta ninia demisaun, seluk dehan katak ba defende Meno Paixao ninia nomeasaun.

Ita seidauk hatene lolos saida mak atu akontese aban iha Uma Fukun ne'eba maibe tuir ha’u nia hanoin polemika ida ne’e mosu tan de’it Governu no PN hakarak halo vingansa ida hasoru ita nia Prezidente. Vingansa tanba sira hakarak estende Maun Lere ninia mandato mesmo ke la tuir lei tanba sira iha Governu no PN tauk katak Maun Lere wainhira nia ba vida sivil nia bele fila ba vida politika no estraga ema balun ninia estratejia foer.

Wainhira Maun Lere dehan katak wainhira reforma nia sei fila ba nia partidu FRETILIN, ida ne’e direitu tomak Maun Lere nian tanba nia mos ema FRETILIN no kaer bandeira FRETILIN hodi funu hasoru inimigu indonezio durante tinan 24. Direitu tomak duni, maibe Alkatiri no ninia matros sira aseita karik Maun Lere hakarak kaer lideransa partidu istoriku no ba demokratikamente sadik lideransa FRETILIN nian atual? Ita labele haluha katak Maun Mari no Maun Lu beibeik halo manipulasaun kongresu FRETILIN nian, dala ruma sira inventa votasaun foti liman no iha ultimu kongressu sira inventa “lista uniku”.

Maibe karik Maun Lere hakarak fila ba FRETILIN ha’u fiar katak nia ba hetan suporta boot hosi militantes FRETILIN nian tanba militantes mos baruk ona Maun Mari no Maun Lu ninia lideransa tanba ita haree momos katak sira neneik lori partidu istoriku ba rai kuak. Karik sira hakarak eleje Rui ba lider FRETILIN maibe karik Rui ba halo kompetisaun ho Lere, militantes barak karik fo suporta ba Maun Lere no rejeita Rui. Kazu akontese ida ne’e Maun Mari nia “kurita” rahun hotu kedas no ninia matros sira (inklui Rui)  ke tabele ba nia hodi uza naran boot FRETILIN hodi hetan benefisiu ba sira nia aan rasik, nomos sira nia belun no familia ba hotu halo to’os no natar tanba ha’u la fiar katak Maun Lere sei hakarak servisu ho oportunista sira ne’ e, oportunistas ke mai Timor hodi susu Maubere nia ran no ruin.

Governu no PN preokupa tebes ho nomeasaun ke Maun Taur halo, maibe sira la preokupa katak proposta governu nian la tuir lei? Katak Governu la foo naran seluk tan hodi Prezidente hili? Katak Maun Lere tanba Governu nia inkompetensia asume hela ilegalmente kna’ar hanesan CEMGFA tanba nia mandatu ramata tiha ona fulan balun liu ba? Entaun Governu komete ilegalidade ida ka lae? Sim. Parlamentu la investiga Rui nia Governu ninia hahalok tanba sa?

Imi lori lai ita nia Prezidente ba Tribunal no depois mak ita haree se mak sala se mak la sala. Diak liu tan tanba balun tur iha Parlamentu sira beik liu kuda ne’ebe lee Konstituisaun susar tebes ba sira no sira hatene deit mak dehan, “Yes, sir!”.

Ironia mak Governu de facto Rui nian povu la foo fiar  ba sira ukun, Rui simu knaar PM nian hanesan prezente ida hosi ninia patraun sira, Maun Xanana no Maun Alkatiri, no foin hahu kokotek hasoru ita nia Prezidente ke povu eleje iha eleisaun demokratika ida no manan kandidatu FRETILIN nian ho votus barak liu tan. Rui nia Governu ninia lejitimidade hodi ukun Timor kiik liu kompara ho ita nia Maun Taur.

Rui Araujo karik devia preokupa ho problema boot iha ita nia nasaun, foin selebra tinan ida ke Governu de facto ida ne’e simu pose, maibe imi nia servisu iha ne’ebe? Povu hahu moris diak ka sei mate tanba laiha ambulansia, tanba sei hamalaha? Emprego ba joven imi kria posisaun balun ka lae? Ka joven sira sei tur iha dalan ninin hodi haree imi pasiar iha kareta luxu ke imi sosa ho povu nia osan?

Sai PM laos deit atu sai bintang iha Facebook ka Twitter ka rede sosial seluk, imi manan osan hodi dezenvolve ita nia nasaun doben nomos hadia povu doben nia moris. Laos halo rezolusaun hodi oho ema, laos lori PR ba tribunal, laos halo vingansa hasoru ema ke la konkorda ho imi nia politika naokten, deslutu, festa iha ain badak nia territoriu, sama povu nia direitu no medidas aat seluk tan. Imi servisu ba se lolos? Ida ne’e mak sai pergunta boot ida.

Governu no PN hakarak halo vingansa hasoru Maun Taur maibe ha’u sei fiar katak lei iha TMR nia sorin ne’ebe Governu no PN  halimar ho “ahi”, no sira nia “ahi” rasik sei “sunu” sira! Otonomista no integrasionista nia oan sira sei la manan ita nia herois nasional, sei la manan………………………………

VIVA MAUN TAUR!

VIVA FALINTIL!

VIVA POVU MAUBERE!

.