Partidu sira estuda hela prosesu konstitusionál kontra PR - parlamentár

.

Partidu timor-oan hirak ne’ebé hetan kadeira iha Parlamentu Nasionál halo hela estudu ba prosesu hasoru Prezidente Repúblika ne’ebé viola ninia obrigasaun konstitusionál hodi hatuun xefe forsa defeza, dehan fonte parlamentár nian sira horisehik ba Lusa.

Karik lori prosesu ne’e ba to’o Tribunál Rekursu – instánsia judisiál bot liu iha Timór – maka bele hatuun Taur Matan Ruak hosi ninia kargu.

Fonte bankada tolu hosi bankada haat ne’ebé hetan kadeira iha parlamentu konfirma ba Lusa katak posibilidade kona-ba ne’e debate ona iha reuniaun polítika oioin durante loron hirak ne’e, inklui sorumutu ho líder bankada desde semana kotuk.

“Ami debate daudaun situasaun ne’e. Ami konsidera katak ida ne’e nu’udar desizaun komplikada ida hosi Prezidente Taur”, dehan fonte hosi Congresso Nacional para a Reconstrução de Timor-Leste (CNRT) ba Lusa, partidu ne’ebé halo deklarasaun polítika, no hetan apoiu hosi bankada hothotu, hodi kestiona dezisaun hosi xefe Estadu nian.

“Situasaun ne’e komplikada tebes. Ami hotu konkorda katak xefe Estadu lakumpri ninia kompeténsia konstitusionál ho lolos”, dehan fonte hosi Frente Revolucionária do Timor-Leste Independente (Fretilin), maibé fonte hosi Partido Democrático (PD) dehan katak “tama ba situasaun ne’ebé ladun di’ak”.

Asuntu ne’e sai hanesan problema polítika durante semana ida, bainhira xefe Estadu desidi hapara xefe Estadu-Maiór Forsa defeza Timor-Leste (F-FDTL), major-jenerál Lere Anan Timur, hodi foti fali brigadeiru-jenerál Filomeno da Paixão de Jesus.

Taur Matan Ruak esplika katak eskolla “susesaun iha F-FDTL, hanesan kontinuiasaun ba prosesu ne’ebé hahú ona 2011 bainhira nia rasik maka husu atu tuun hosi lideransa F-FDTL nia”.

Polémika ne’e mosu, tanba desizaun hosi Taur Matan Ruak nian latuir proposta hosi Governu nian ne’ebé hetan aprova hosi Konsellu Ministru, loron 12-outubru tinan kotuk, atu renova mandatu hosi Lere Anan Timur.

Problema mosu bazeia ba interpretasaun hosi artigu 86 Lei Timór, relasiona ho kompeténsia Prezidente Repúblika nian, hodi fó nomeasaun ba xefe forsa defeza.

Xefe Estadu hateten, tuir esplikasaun hosi artigu ne’e haktuir katak iha kbi’it atu “nomeia no hapara, Xefe Estadu-maiór Forsa Armada nian, bazeia ba proposta hosi Governu”.

Prezidénsia Repúblika insisti ba interpretasaun katak artigu ne’e laobriga xefe Estadu atu halo tuir saida maka Governu hato’o no desizaun ikus nia rasik maka foti ka lapresija respeita proposta hosi Governu.

Ezekutivu ho partidu parlamentár nian hothotu defende ho ideia oinseluk, hodi haktuir katak ida ne’e nu’udar kompeténsia ne’ebé ekivale ba nomeasaun membru Governu nian, liu hosi proposta primeiru ministru, no Taur Matan Ruak tenke halo tuir rekomendasaun ezekutivu.

Tema ne’e hamosu ona sesaun plenária rua hosi parlamentu iha semana ne’e nia laran, hanesan iha segunda-feira bankada hothotu adia tiha votasaun ne’ebé atu autoriza PR hala’o viajen bá Japaun iha fulan marsu no sira uza períudu ne’e molok orden do dia hodi kritika desizaun xefe Estadu nian.

Hala’o hikas debate kona-ba asuntu refere horisehik no CNRT lee deklarasaun ida ba testu ne’ebé hetan apoiu hosi bankada Fretilin no Frente mudansa hodi ameasa xefe Estadu katak karik ladada hikas desizaun ne’e maka sei bele avansa ho prosesu ida.

CNRT hateten katak kona-ba kazu refere, Taur Matan Ruak ninia kompeténsia “kondisionadu” no lahanesan ho Governu ninia proposta ne’ebé tuir lolos tenke ko’alia uluk ho ezekutivu atu “buka solusaun hamutuk”.

Maski Taur Matan Ruak ninia desizaun fó sai ofisialmente ona kona-ba exonerasaun Lere Anan Timur nian, liu hosi ninia gabinete iha loron 9-fevereiru, maibé ladauk publika iha Jornál Repúblika.

Tuir fonte Prezidénsia haktuir ba Lusa katak sira fó ona instrusaun atu lahalo publikasaun “maibé tanba de’it ladauk marka loron ba serimónia tomada pose ne’ebé sei tenke hala’o duni bainhira fó sai ona dekretu refere”.

Maski nune’e, nia garante katak “desizaun polítika ne’ebé Prezidente foti, mantén nafatin no sei lamuda”.

Inisiativa hosi prosesu ida kontra Prezidente Repúblika “tanba halo violasaun klaru no grave hosi ninia obrigasaun konstitusionál”, determina ona iha artigu 79 hosi Konstituisaun.

Atu avansa, prosesu refere tenke hato’o pelumenus dalima hosi deputadu 65 no deliberasaun aprova hosi maioria tersu rua.

Desizaun ne’e fó sai hosi plenáriu Tribunál Rekursu ho prazu máximu loron 30 no “kondenasaun implika destituisaun kargu nomós laiha posibilidade atu hala’o hikas eleisaun”.

SAPO TL ho Lusa

.