Mauk Moruk lakon ona husi mundu ba fulan neen no família komemora ho matan been

.

Hosi: Kruzeiru Leste

08 Agostu 2015 ba 08 Fevreiru 2016

Dia 8 fevreiru 2016 nudár data ne’ebé kompleta fulan ne’e ba eis komandante brigada mean Mauk Moruk nia mate. Mate ida ne’e kruél tebes tanba nia mate ho bala musan besik liman nulu. 

Tuir informasaun sira ne’ebé semo husi tilun ba tilun hatete katak Komandante mate ho kondisaun hamlaha no iha ai-farina pedasuk ida no osan besi rahun de’it mak iha kohe laran. Lakon ida ne’e hatudu regresividade ba demokrasia no direitus umanus iha rai Timor-Leste tanba autoridade Polítiku sira ignora kapasidade negosiasaun, diskusaun no diálogu ne’ebé sai baze ba hametin demokrasia no direitus umanus iha rai doben ida ne’e. 

 Mauk Moruk mate ba kauza husi laiha liberdade ba espresaun tanba Mauk ko’alia de’it iha estadu direitu demokrátiku maibé kaer no hatama ba kadeia, depois Mauk hetan liberdade autoridade seguransa sira ba halo provokasaun no situasaun muda an sai tiha violénsia no krime depois ulun boot sira aproveita akuza no kondena ba asasinasaun ida ne’e. 

Mauk mate ona, populasaun sira nain hat mak mate hamutuk ona, populasaun besik rihun sanulu mak hetan tortura no tratamentu kruél husi autoridade seguransa ne’ebé simu mandatu ba operasaun konjunta ne’e. 

Relatóriu ne’ebé PDHJ no instituisaun seluk halo seidauk hetan apresiasaun husi PN ne’ebé reklama an nudár reprezentante Povu nia. 

Família sira komemora loron ne’e ho matan been, sira tanis matan be laran tanba lakon tan ema ida depois ita hela iha liberdade laran. Lakon tan ema ida ne’ebé lakon nia família barak ba funu kontra invazór Indonézia. 

Depois de lakon alin, L-7 hetan akuzasaun oin-oin, seidauk hatene tanba sá lider sira ba funu ne’e sofre situasaun at nune’e. 

Para ona ho tanis, para ona ho mate no fuan kanek. Hadomi malu ba nudár maun no alin. 

Adeus maun Mauk Moruk Adeus maun alin sira ne’ebé mate hamutuk ho Komandante Mauk Moruk 

Solidariedade ba família ne’ebé oras ne’e matan been seidauk maran liuliu ba mana no sobriña no sobriñu sira iha Olanda.

TANBA SÁ MAK FAMÍLIA SEIDAUK HETAN RELATORIU AUTOPSIA NIAN? FAMÍLIA HUSU BEIBEIK MAIBE OTORIDADES LAKOHI FO? 

.