Lere Anan Timur: “Ami jura ran ho isin, sei la soe malu’’

.

Jornal Nacional Diário - 15 de fevereiro de 2016

Xefi Estadu Maior Jeneral Forsas Armadas F-FDTL, Major Jeneral Lere Anan Timur hateten katak, agora dada’uk mosu persepsaun iha komunidade katak, nia ho Prezidenti Repúblika, Taur Matan Ruak haree malu ladi’ak, maibé persepsaun ne’e lalos.

“Ami jura ho ran no isin katak, ami mai husi ailaran la so’e malu, ami mate hamutuk, liafuan bele naksalak ba malu, mas ami na’in hira ne’e la so’e malu,” dehan Lere Anan Timur ba Jornalista sira iha Palásiu Prezidensiál Aitarak Laran Dili, Sesta (12/02), hafoin sorumutu ho Xefi Estadu Taur Matan Ruak.

Lere Anan Timur husu ba komunidade tomak atu labele hanoin katak, lideransa jerasaun tuan sira ne’e agora dada’uk fahe malu, tanba hanoin ida ne’e sala.

Major Jeneral Lere Anan Timur hateten katak, nia hakarak sai Prezidenti Repúblika Timor Leste (TL) nian, maibé nia lakohi halo kampaña.

“Hakarak ha’u sai Prezidenti, imi ba halo kampaiña depois imi fó nia rezultadu mai dehan 90%, entaun obrigadu ha’u ba Prezidenti Repúblika,” dehan Lere Anan Timur.

Lere Anan Timur akresenta mós katak, bainhira nia reforma husi F-FDTL, laiha ema ida atu obriga nia hodi harii ka tama iha Partidu polítiku ruma.

“Polítiku ne’e, ha’u desde tinan 24 ha’u halo polítika ona, polítika ne’e ha’u hanoin katak la difisil ida, ita ko’alia ba ko’alia mai ne’e mós polítika ona,” nia dehan.

Lere mós husu ba jerasaun foun sira atu banati tuir jerasaun tuan sira nia hahalok ida ne’e, hodi aban bainrua hetan fiar husi povu atu ukun rai doben ida ne’e karik, lideransa foun sira labele hirus no so’e malu.

Lere Anan Timur hatutan tan katak, bainhira Estadu foti desizaun hodi halo reforma ba nia, nia sei hakarak iha uma de’it hodi halo to’os.

Tanba ne’e, Lere Anan Timur husu ba públiku atu kalma hodi hein rezultadu ne’ebé mak Estadu sei fó sai kona-ba ninia mandatu iha tempu badak.

“Ha’u agora 64 anos, tama ona ba tempu reforma ninian, maibé tenke tuir prosediamentus, tuir régras, legalidades para atu dehan katak, ita mós nasaun ida, ita foin ukun-an, maibé ita iha régra no prosedimentus atu la’o tuir,” relata Lere Anan Timur.cos

Foto de Presidência da República de Timor-Leste, Facebook.

.