Kargu Xefi Estadu Maior Lu Olo: PR nomeia la pertinenti ho proposta Governu

.

Jornal Nacional Diario - 15 de fevereiro de 2016

Prezidenti Partidu Fretilin nudar mos eis Prezidenti Asembleia Konstituante, Francisco Guterres “Lu Olo”, haklaken katak, desizaun Prezidenti Republika (PR) Taur Matan Ruak nian hodi nomeia Brigadeiru Jeneral Filomeno Paixão troka Maijor Jeneral Lere Anan Timur, la pertenenti ho proposta ne’ebe Governu haruka ba PR rasik.

“Tuir hau hatene Governu propoin tuir Konstituisaun para Prezidenti Republika nomeia Xefi Estadu Maior Jeneral das Forsas Armadas ( XEMFA). Proposta Governu nian hato’o ba Prezidenti Republika ho estensaun de mandatu ba Maijor Jeneral Lere laos ba halo ezenorasaun ou laos atu ba hatun fali nia, ne’e la iha,” hateten eis titular ne’e hodi responde jornalista sirai iha edefisiu Word Vision, Dili, Sesta (12/2/2016).

PR Taur Matan Ruak, foin lalais ne’e, nomeia ona Brigadeiru Jeneral Filomeno Paixão ba Maijor Jeneral no Maijor Jeneral Lere Anan Timur ba Tanenti Jeneral Onorifiku. Maibe, desizaun Xefi Estadu nian ne’e la kombina ho desizaun no proposta Konsellu Ministrus nian atu extende tan mandatu Xefi Estadu Maior FALINTIL-Força Defesa de Timor Leste (F-FDTL), Maijor Jeneral Lere Anan Timur to’o 2017.
.

Lu Olo esplika katak, desizaun PR Taur nian ne’e to’o ona Maijor Jeneral Lere Anan Timur nia futar tilun, maibe buat ne’ebe Lu Olo hatene tuir Konstituisaun katak, Governu maka aprezenta no Prezidenti Republika tenke halo pratika alto ida decomplimentaridade para atu kompleta tuir artigu 86 alinea M Konstitusaun RDTL nian.

Lu Olo friza katak, desizaun sira hanesan ne’e Orgaun soberania sira nia knar, maibe presiza tur hamutuk atu bele hetan solusaun ba problema ida ne’e.
.

Wainhira husu kona ba tempo to’o ona hodi troka Lere Presidente partidu Fretilin ne’e hatete kuandu Governu hatete dehan atu halo estensaun mandatu ba Lere nian tinan 4 tan siknifika katak lei mak hatete dehan sei bele hanesan Lere bele kontinua tinan 4 tan.

“Laos hau Lu Olo mak hatete dehan tempo to’o ona nia atu ba deskansa, hau la bele hatete ida ne’e, ne’e hau la dehan maibe lei mak hatete duni katak nia bele kontinua to’o tinan 4 ho kargo ida Maijor Jeneral ne’e Governu laos haruka atu halo ezenorasaun ou demisaun la iha ida,” hateten Lu Olo.

PR ho Governu “laiha harmonia”

Desizaun Prezidenti Republika (PR), Taur Matan Ruak nian hodi nomea Brigadeiru Jeneral Filomeno da Paixão de Jesus troka Maijor Jeneral Lere Anan Timur hatudu katak, interdependensia instituisaun Estadu nian ne’ebe garante iha Konstituisaun RDTL komesa “tohik” dau-daun no hatudu momos katak, Governu ho Prezidenti Republika la dun iha harmonia ona .

Tuir informasaun ne’ebe Komisariu Politika Nasional BUP (Bloku Unidade Popular), Alarico Daitula, hatene katak, iha fulan Novembru tinan 2015, Konselhu Ministrus (KM) aprova tiha ona hodi extende mandatu Maijor Jeneral Lere Anan Timur nian nudar Xefi Estado Maior ba FALINTIL-Força Defesa de Timor Leste (F-FDTL) to’o tinan 2017. Maibe, derepenti deit PR Taur foti desizaun seluk ida ne’ebe la bazeia ba proposta no desizaun KM nian. Nune’e nomeia fali Maijor Jeneral Lere ba Tanenti Jeneral Onorifiku no Brigadeiru Jeneral Filomeno da Paixão ba Maijor Jeneral.

“Hau haree situasaun ida ne’e hatudu momos mai ita tomak nia futar matan katak, instituisaun Estadu nian, hanesan Prezidensia Repulbika ho Governu la dun iha haromonia ona no bele konsidera ultrapasa ona sentidu interdependensia instituisaun Estadu sira nian,” afirma Alarico Daitula ba jornalista sira, foin lalais ne’e.

Alarico esklarese katak, Lei garante duni separasaun poder instituisaun Estadu nian, maibe Lei mos garante atu iha interdependensia entre instituisaun Estadu sira nian. Katak, desizaun altu nivel nian ba interese Estadu nian tenke submete ba malu no rona malu.

Tuir konhesimentu Alarico nian katak, atu halo nomeasaun ba Xefi Estadu Maior F-FDTL la’os kompetensia absoluta PR nian, maibe proposta tenke mai husi Governu ba PR atu PR hola desizaun bazeia ba proposta Governu nian.

“Se karik Governu nia proposta ba PR maka PR sai fali opozisaun ba proposta sira ne’e, hatudu momos katak, interdependensia instituisaun Estadu nian rua ne’e (PR-Governu,red) la dun harmonia ona,” hateten Alarico Daitula.

Alarico dehan, tuir lolos instituisaun Estadu sira tenke iha linha koordenasaun ida diak atu la bele hamosu polemika ba desizaun Estadu nian. Nune’e, la bele fo espasu ba ema sira atu esplora isu ne’ebe la diak ba estabilidade nasaun nian.

Tuir nia haree, Brigadeiru Jeneral Filomeno Paixão iha duni integridade no kapasidade atu lidera instituisaun F-FDTL, maibe tempu maka seidauk oportunu. Sa tan, nomeasaun ne’e hamosu kontraverisal boot entre instituisaun Governu ho Prezidenti Republika.

“Se ita obriga ho deisaun ida laharmonia hanesan ne’e, maka ninia finalidade ne’e sei sai la diak ba instituisaun refere no bele mos fo implikasaun la diak ba estabilidade nasional,” hateten Alarico.

Iregularidade Prosedimentu

Antes ne’e, Prezidenti Komisaun B-PN ba asuntus Defeza, Seguransa no Negosiu Estranjeirus, David Ximenes “Mandati”, hateten, se desizaun ne’ebe PR Taur foti ne’e la bazeia duni ba proposta Governu nian, signifika iha iregularidade prosedimentu. Deputadu husi Bankada FRETILIN ne’e hateten, Konstitusionalmente iha artigu 68 alinea N dehan katak, proposta ne’e kompetensia Governu nian, depois lori ba PR konkorda nomea. Enkuantu la konkorda haruka fila mai Governu hodi hodi nomea ema seluk.

“Nomeasaun ne’e PR nia kompetensia, maibe proposta ne’e tenke mai husi Governu,” hateten David Mandati ba jornalista iha Hotel Timor.

Biban ne’e, Xefi Estado Frosas Armadas F-FDTL, Koronela Falur Rate Laek, hateten, nomeasaun no desizaun fo sai ona husi PR Taur Matan Ruak no hein deit ezekusaun.

Hafoin hasoru malu ho PR Taur Matan Ruak iha Palacio Prezidenti, Sesta (12/2/2016), Xefi Estadu Maior Lere Anan Timur, hateten, desizaun atu extende ou reforma depende ba Estadu, tanba buat hotu tenke lao tuir lei.

Lere hateten, bainhira Estadu foti desizaun hodi halo reforma ba nia, maka nia hakarak liu maka iha uma deit hodi halo to’os. nes/mia

.