PR Taur: Veteranus ida de’it

.

Jornal Nacional Diário - 20 de janeiro de 2016

Prezidenti Repúblika (PR), Taur Matan Ruak, hatete, veteranus iha Timor-Leste ne’e la’os rua maibe ida de’it, tanba ne’e maka lori Timor-Leste ba independensia.

Prezidenti Republika Taur Matan Ruak husu atu veteranus sira iha unidade ba malu, tanba veteranus ne’e ida deit.

“Maske veteranus sira iha partidu ketak ketak tenke iha unidade, tanba veteranus iha Timor ne’e ida deit, hau ba iha Oecusse sira dehan vetaranus iha Oecusse iha 2, hau dehan se mak dehan veternus iha 2, imi nia avo mak 2,” dehan PR Taur iha ninia diskursu, bainhira halo dialogu aberta ho komunidade Suku Lacawa.

PR Taur afirma tan katak,veteranus hotu hotu hatene,se mak Xanan, se mak Taur Matan Ruak, ne’e duni labele hafahe veteranus ba 2.

“Uluk ne’e ita dehan ita, agora ne’e ita dehan hau ne’ebe ita labele dehan tun sae, hau nia soldadu uluk iha Aileu hau haruka rihun ida atus ida ba tiha uma to’o agora nein doit ida sira atu hetan,” PR Taur hatete.

Alende ne’e, Prezidente Republika Taur Matan Ruak husu ba komunidade hotu, labele sai maupagdor, tanba hahalok ne’e ladiak.

“Hau husu katuas ida se mak iha oan, katuas ne’e dehan hau oan iha, o nia oan iha hira, nain 3, mane hira, feto hira, katuas ne’e dehan feto 2, mane ida, mane iha ne’ebe mate ona, feto iha ne’ebe hola mane tiha ona, laen iha ne’e ka lae, iha hamrik, nia hamrik hau dehan o maupagador, moe laiha hola ema nia oan feto, o haluha tiha nia aman,” dehan Xefi Estado.

Labele sai Bibi Malae

Nune’e mos, PR Taur husu ba povu Timor-Leste atu sai diferente ho nasaun sira seluk, atu nune’e, ema la bele dehan Timor ne’e hanesan bibi malae.

“Ita tenke diferente ho ema seluk, para nune’e bele evita ema dehan ita hanesan bibi malae, ita kiak no seluk tan,” dehan PR Taur, bainhira halo dialogu ho komunidade sira iha Suku Lacawa, Postu Administrativa Luro, MuniSipiu Lautem, Tersa (19/01/2016).

PR Taur afirma katak, Timor nasaun ne’ebe mak foin ukun an, maibe tenke hatudu ninia atetude ne’ebe mak diak atu nune’e ema la bele tula ibun.

Iha fatin hanesan xefe suku Lacawa Thomas da Costa hatete,”Maske ita nasaun ne’ebe mak kiik,maibee ita tenke hatudu ita nia atetude ne’ebe mak diak,atu nune’e ema rai seluk labele dehan ita hanesan bibi malae.”

Delfin da Silva hanesan komunidade suku Lacawa hatete, atu ema nasaun seluk la bele tau imbun mai maka tenke muda Timor oan sira nia mentalidade baruk ten,hodi halao servisu makas liu tan.mia

Foto de Presidência da República de Timor-Leste, Facebook.

.