PR Taur husu TR fiskaliza lei administrasaun eleitoral

.

Jornal Nacional Diário - 07 de janeiro de 2016

Prezidente da Repúblika PR Taur Matan Ruak husu ba Tribunal Rekursu atu halo fiskalizasaun preventiva ba konstitusionalidade relasionadu ho alterasaun lei kona-ba órgaun administrasaun eleitorál.

Prezidente Repúblika, Taur Matan Ruak, husu ba Tribunál Rekursu atu halo fiskalizasaun preventiva ba konstitusionalidade kona-ba Dekretu Parlamentu Nasionál númeru 19/III, ne’ebé aprova.

“Alterasaun daruak ba Lei númeru 5/2006, loron 28 fulan-dezembru (Orgaun Administrasaun Eleitorál), tuir artigu 85, alínea e) no artigu 149 Konstituisaun nian,” dehan Taur Matan Ruak liu husi karta komunikadu imprensa, ne’ebé redasaun Jornal Nacional Diário simu iha Kuarta, (06/01).

Nota imprensa ne’e dehan, kestaun ne’ebé mak sai nu’udar problema mak garantia kona-ba independénsia no imparsialidade Komisaun Nasionál Eleisaun nian, ne’ebé temi iha númeru 6 husi artigu 65 Konstituisaun nian.

“Kestaun seluk mak garantia kona-ba independénsia no imparsialidade, ne’ebé mós parte husi prinsípiu Estadu Direitu nian, ne’ebé temi iha artigu 1 Konstituisaun”, dokumentu informasaun ne’e esplika.

Nota ba imprensa ne’e tenik tan, kestaun seluk tan mak proposta alterasaun ba kompeténsia Komisaun Nasionál Eleisaun nian, nune’e mós kona-ba alterasaun ba kompozisaun foun Komisaun ne’e nian no alterasaun ba mekanizmu eleisaun ba Prezidente Komisaun Nasionál Eleisaun nian.

Parlamentu Nasionál hakarak aplika alterasaun hirak ne’e hotu lala’is kedas hodi hakotu mandatu membru atuál sira Komisaun Nasionál Eleisaun nian ne’ebé mak mandatu seidauk hotu.*/cos

Foto de Presidência da República de Timor-Leste, Facebook.

.