Partidu Libertasaun Popular - PLP “Hamutuk Hisik Kosar ba Moris Diak” - Deklarasaun ba Média

.

Foto PLP, Facebook.

PARTIDU LIBERTASAUN POPULAR- PLP

“Hamutuk Hisik Kosar ba Moris Diak”

Deklarasaun ba Média - Dili, 29 Janeiru 2016

Iha loron 30 Janeiru 2016, Partidu Libertasaun Popular (PLP) sei halo lansamentu estrutura PLP nian iha Gleno Vila, Munisípiu Ermera. Lansamentu sei hahu iha tuku ualu ho balun dader-san (tuku 08.30 – remata) Estrutura interinu Partidu Libertasaun Popular sei hala’o husi Konselu Presidensial PLP nian nebe lidera husi Prezidenti Interinu PLP, Adérito de Jesus Soares, Vice Prezidenti Andre L4 de Sousa no Vice Prezidenti Sabino Guntur. Iha mos seremónia ne’e sei estabelese Komisaun Instaladora PLP iha Munisípiu Ermera. Seremónia lansamentu ne’e sei partisipa mos husi reprezentante PLP husi munisípiu sira seluk no mos husi Rejiaun Administrativa Especial-Ambeno-Oecussi (RAE-AO) Oecussi.

Partidu Libertasaun Popular ofisialmente harii iha loron 9 fulan Dezembru tinan 2015 no hetan Estatuta legal nudar partidu polítika husi Tribunal Rekursu númeru 04/IPP/2015/TR, ne’ebé publika iha Jornal da Repúblicaa iha loron 22 fulan Dezembru tinan 2015.

Hafoin hetan legalidade nudar partidu polítiku, estrutura interinu PLP nian hahu halo sosializasaun no konsolidasaun ba forsa polítika no massa iha baze hodi introduz PLP. Dadaun ne’e iha ona strutura interinu nasional no mos estrutura interinu munisípiu nian ne’ebé kontinua halo sosializasaun no konsolidasaun ba massa. Alein introdus PLP ba públiku, estrutura interinu ho ekipa téknika sira kontinua formula programa polítika PLP nian. Prezidenti Interinu PLP argumenta katak ”PLP mosu la’os atu harame deit palku polítika Timor-Leste, maibé PLP sei hamosu polítika alternativa iha prosesu dezenvolvimentu. PLP la’os hatene atu hato’o deit kritika, maibé sei hamosu mos alternativa oinsá atu hadia no hametin liután esforsu sira hodi harii-estadu no harii-nasaun”.

PLP harii atu fó valor no dignidade ba eroi rihun atus ba atus ne’ebé husik hela isin no ran, hatudu duni determinasaun, abnegasaun, patriotismu, eroismu no solidaridade ba kauza nasional hodi hakotu dominasaun ukun kolonializmu, agresaun no arogánsia rejime militerismu invasor. Ohin-loron, Timor-Leste sai duni país ida soberanu, independente no povu ida ho diginidade. PLP hamrik atu hatur lolos papel Aswa’in, Kombatente no Veteranu sira ne’ebé sei moris atu sai sujeitu ka autor ba dezenvolvimentu, la’os deit objetu ba dezenvolvimentu nasional.

Partidu Libertasaun Popular hamrik atu sai nudar forsa polítika ida iha Timor-Leste hamutuk ho povu doben Timor-Leste, maubere no buibere sira hotu atu hodi ita labele dala ida tan monu fali ba neo-kolonializmu, dominasaun no agresaun ho forma foun. PLP hakarak povu Timor-Leste, maubere no buibere oan sira hotu nudar povu ida dignu tenke moris duni iha estadu de direito demokrátiku. PLP sei servisu hamutuk ho forsa politika sira hotu-hotu iha Timor-Leste hodi hametin soberania país no dignidade povu doben Timor-Leste. Tambá ne’e, iha tempu uluk ita fakar ran hodi sosa liberdade no independénsia, ohin-loron, mai ita hisik kosar ba moris diak!

Viva Povu Timor-Leste!

Viva PLP!

Presidenti Interinu PLP

Adérito de Jesus Soares

.