Maun Taur fuan murak, deputadus no governu fuan naokten no oportunista

.

Oan Kiak

Polemika Orsamentu Estadu hotu ona no ha’u hakarak hatoo ha’u nia parabens ba ita nia Maun boot Taur, ita nia Nain Prezidente hatudu ba ita hotu sentidu Estadu, responsabilidade no domin ba povu uainhira veta OJE ba 2016.

Maun boot Taur hatudu ba ukun na’in hotu-hotu saida mak demokrasia, saida mak serve no defende  duni Maubere Oan, maske mesak, tanba uainhira Maun Taur veta OJE nia hatene katak Governu no Parlamentu sei bele hasoru nia no ultrapassa ninia veta. 

Horiseik ha'u mak hatoo ba ha’u nia belun ida notisia kona ba promulga no nia dehan ho tristi mai hau: La buat ida, ó nia Maun Taur la lakon, tanba nia hatudu ba ita hotu saida mak demokrasia no nia joga bonito tebes jogo demokrasia ida ne’e. Ó nia Maun laiha dalan seluk, nia tenki promulga duni, se la promulga mak hasoru Konstituisaun, no halo bandidu sira iha governu no PN kontenti tebes tanba bele iha buat ruma hasoru ó nia Maun Taur. Ha'u nia mana loos duni. 

Maun Taur fuan murak, deputadus no governu mak fuan naokten no oportunista, ha'u fiar katak sira hotu kontenti loos, tinan ida tan ba sira hariku sira nia aan no habosu sira nia kabun ho Maubere Oan nia osan, nia terus, nia susar. 2017 mak ita bele troka situasaun ida ne’e, la kleur ona no povu sei halo justisa hasoru ema halo Maubere Oan terus dala ida tan.

Parlamento Nasional hatudu ba ita hotu sira nia hahalok aat, arogansia nomos desprezu ba povu ninia nesesidade, sira mos lakon respeitu ba ita nia Nain Prezidente tanba la konsiderasaun nein oituan ba Maun Taur nia preokupasaun no saida mak nia husu ba sira hadia iha OJE nia laran, ida ne’e hatudu momos katak sira laiha intrese nein ida ba povu nia edukasaun, saude no agrikultura, setor importante tebes hodi hadia Maubere Oan nia moris. 

Maun Taur semana balun liu ba dehan ba media katak: Povu nia susar ninia moris. Maun Taur nia hahalok hatudu momos konseitu ida ne’e. Propaganda FRETILIN nian dehan Hamutuk Ita Bele, foin ami deskobre lolos saida mak sira bele halo hamutuk hasoru Maubere Oan. Hamutuk sira bele duni esplora povu, hamutuk sira bele naok povu, hamutuk sira bele harii kolonialismu foun. Saida tan mak sira ba halo hamutuk hasoru Maubere Oan?

Ha’ u lee notisia iha jornal sira kona ba folin minarai no ha’u preukupa tebes ho ita nia futuru hanesa nasaun independenti ida no ha’u tauk katak osan governu fakar ba projetu Mari nian no Tasi Mane nian sei mout ita ka lae? Tanba sa mak mega projeitus sira ne’e importante? Importante ba se? Rui Araujo dehan katak importante hodi halo diversifikasaun ekonomia (ZEESM). Tebes ka? Ha’u atan hanoin katak turizmu mak importante liu hodi diversifika ekonomia, Timor Lorosae rai furak tebes hodi halo aposta iha Turizmu maibe sira aposta de’it ba area Oecusi? Rai dook los, ha’u la fiar katak Oecusi mak ba sai polo turistiku sentral ida. Imi hakarak habosok se? Ami laos be’ik hodi fo fiar tomak ba projeitu katak fo de’it benefisiu ba elite ka ba Alkatiri nia matros sira.

Karik deputadus no ukun na’in ohin loron hamnasa maibe imi kuidadu, tanba ita nia demokrasia ita harii ho Maubere Oan nia ran no ruin, loron ida, imi traidor sira sei simu kastigu todan. Imi hein tok.

Maske Maun Taur promulga ona OJE, ha'u fiar katak promulga ho fuan kanek tanba Maun boot hatene katak se la investe maka’as iha setor edukasaun, saude no agrikultura, Maun boot nia povu doben sei la hetan prosperidade no moris di’ak maibe ha’u hakarak dehan katak Maun Taur halo ona ninia dever, povu labele hatudu liman ba Maun no dehan katak nia mos hamutuk ho bandidu seluk hodi naok, esplora no sama Maubere Oan.

Ne’ebe ha’u hanesan atan oan ida senti obrigasaun hodi agradese Maun Taur nia fuan murak no ninia postura hanesan Ema Estadu, tanba Maun Taur la uza ninia naran bot ka pozisaun hanesan Prezidente hodi naok, hanehan ka esplora Maubere Oan, Maun bot ne’e servisu duni hodi Maubere Oan hetan moris di’ak no prosperidade.

Obrigadu wain, Maun Taur. Viva Maun Taur!

Foto de Presidência da República de Timor-Leste, Facebook.

.