Hafoin foti osan iha BNU, Domingos mate iha Hotel Colmera

.

Foto Jornal Nacional Diário

Jornal Nacional Diário

Professor Portugues Eskola Sekundaria Konis Santana Gleno, Domingos Soares Maia tinan 60 mate iha Hotel Colmera andar rua deskonfia ema deskoñesidu mak oho, tanba matebian nia isin lolon hetan torturasaun iha parte rentos ho ulun fatuk sai kuak.

Matebian Domingos Soares tun mai Dili iha loron Kuarta (20/01) hela iha Surik Mas, Suku Bairo-Pite, ho objetivu atu simu osan Portugal nian.

Matebian nia isin mate hetan iha hotel Colmera laran iha dadersan oras tuku 09:45 OTL wainhira cleaner hotel Colmera nian atu hamos fatin refere hetan matebian monu hela iha azulezu ninia leten nakonu ho ran.

Matebian Domingos Soares Maia husi Postu Administrativu Gleno, Munisipiu Ermera, matebian mate husik hela nia oan hamutuk nain ualu (8), feto 6 mane 2.

Oan Feto husi matebian Bibiana Domingas Soares Maia ho triste hateten, nia aman sai husi uma ba foti osan iha Banco Nacional Ultramarino (BNU) iha dadersan mais ou menus dadersan tuku 08:30 Otl.

“Nudar familia Vitima konkorda atu halo autopsia ba vitima nia isin mate, tamba mate ne’e ita haree hanesan la’os mate tamba buat seluk, maibe afeta husi ema baku, ita haree iha kamera CCTV ne’e kadera badak hela, maibe haree pai nia kondisaun parte ulun hanesan ema baku,”oan matebian, Bibiana ba Jornalista sira Kinta (21/01) horseik iha Hospital Nasional Guido Valadares (HNGV).

Oan husi matebian ne’e hateten, ninia aman antes ne’e mos hetan moras fuan no hetan atendementu rutina husi doutor espesialista fuan Dr. Andre, maibe dezastre ne’ebé vitima hetan ne’e tuir logika la’os tamba fuan maibe hetan baku.

“Kadeira ne’ebé haree ne’e badak hela, maibe nusa mak monu bele rejulta ulun parte reto’os nakles inklui parte uln mos iha kanek ne’e laiha lojika, tamba keta ema ruma baku entaun presija liu husi autopsia mak bele detekta,”haklaken nia.

Relasiona ho matebian ninia mate ne’e nudar oan feto entrega tomak prosesu ne’e ba iha Polisia Investigasaun kazu refere hodi bele hatene lolos motivu husi mate ne’e rasik.

Espelika antes nia atu ba servisu, fo hatene hela ninia aman atu mana ida tuir ba BNU simu osan, maibe ninia aman lakohi.

“Maibe ha’u mós la espera katak bele hetan asidente ida to’o hanesan ne’e, ema ne’ebé telefone mai ha’u dehan pai mate ne’e iha tuku 10 dader, no sira lori pai nia telefone mak kontaktu ha’u, maibe iha fatin akontesementu ema dehan maun ida lori ambulansia ne’e mak kontaktu,”tenik oan matebian refere.

Iha fatin hanesan, subrinha matebian Anabela da C.S Maia akontesimentu ne’ebe refere afeta ba ninia tiu Domingos ninia mate, nune’e husu ba iha parte Govenru atu bele tau atensaun ba iha fatin prostituisaun.

“Ha’u deskontente teb-tebes ho tiu nia mate, ita nia nasaun ne’e ukun a’an sosa ho ran no ruin, maibe tanba saida mak ukun a’an tiha feto puta sira mai nakonu tiha fali hodi halo katuas sira mak sai vitima, tamba akontesementu ba katuas mate tamba feto á’at sira ne’e dala rua ona,”dehan Ana Bela.

Tuir observasaun JN-Diario ne’e oiha tereinu, matebian tula ho kareta Funerariu Solidaridade Sosial nian ho sapa martikula 05.231 G, hodi lori kedas ba iha mortuary HNGV hodi halao prosesu autopsia, iha fatin akotesementu krimi nian halao dereita husi Polisia Cientifiku Investigasaun Criminal (PCIC).

Husi preleminaria ia local krimi ne’e, PCIC foti mos gravasaun CCTV no mos sasan balun ne’ebe mak matebian husik hela no mos lori kliner hotel Kolmera nian hodi ba halao investigasaun. Eus

.