PR Taur: “Labele mehi membru Governu mai vizita imi”

.

Jornal Nacional Diário - 16 de novembro de 2015

Prezidenti Repúblika (PR), Taur Matan Ruak husu ba povu atu labele mehi kona-ba membru Governu sira atu ba vizita sira iha sira nia Suku, tanba membru Governu sira labele la’o ain hanesan nia halo ne’e.

Xefi Estadu ne’e dehan, nia simu ona preokupasaun barak husi feto sira iha área rural, kona-ba durante ne’e jender lokaliza de’it iha Dili.

“Imi hanoin imi nia feto maluk ne’e atu mai vizita imi, lalika, to’o nia sai tan de’it mos la mai,” katak Taur Matan Ruak hodi responde preokupasaun feto rural nian, kona-ba durante ne’e Governu nunka tau matan ba sira, bainhira dialogu ho povu iha Suku Matorek, Postu Administrativu Turiskai, Munisipiu Manufahi, Sabadu (14/11).

Tebes duni, durante ne’e, jender ne’e iha de’it Dili, tanba preokupasaun ne’e, mai husi feto hotu iha Suku-Suku.

“Ita agora iha Sekretariu Estdu ida ne’ebé mak tau matan ba ekonomia feto sira nian,”dehan Taur Matan Ruak.

Xefe Estadu ne’e hatutan, Sekretariadu ida ne’e, labee halo vizita ba Suku hotu, tanba difisil tebes.

“Ha’u de’it lori tempu tinan hat resin mak vizita hotu suku iha Timor laran tomak,” dehan Taur Matan Ruak.

PR Taur esklarese lia fuan hirak ne’e hodi responde kona-ba preokupasaun feto rural Lurdes Barboja Fernandes, husi Suku Matorek ne’ebé hatete katak, durante ne’e sira lahatene saida mak jender ne’e.

“Kolia konaba jender iha dei’t kapital, ami feto iha rural, lahatene saida mak jender ne’e, oinsa mak kami bele dezenvolve ami nia moris iha rural,” katak nia.

Tanbane’e, nia husu ba Governu atu tau matan netik ba sira iha iha rural, tanba durante ne’e sira dfisil tebes atu moris dezenvolve sira nia moris iha rural.cos

Foto de Presidência da República de Timor-Leste, Facebook.

.