Polisia tiru joven 2 iha Quelicai

.

Jornal Nacional Diário - 05 de novembro de 2015

Polisia Nasional Timor Leste (PNTL) Eskuadra Posto Administrativu Quilicai, Munisipiu Baucau, iha finadu foin lalais ne’e, tiru kanek joven nain 2 no detein nain rua seluk tanba lori motor ba insulta polisia sira iha eskuadra.

Segundu Komandante Jeral PNTL, Komisiariu Faustino da Costa, Kuarta (4/11/2015), klarifika katak, polisia halo asaun hasoru joven nain hirak ne’e hodi toru nain 2 kanek tanba lori motor ba insulta fali polisia sira iha eskuadra Quelicai.

Joven hirak ne’ebe kaptura iha Quelicai submete ona ba prosesu investigasaun. Nune’e, iha fali area Bedois, Dili nian mos polisia kaptura joven nain 5 tanba asalta malu.

Faustino da Costa hateten, grupu sira asalta malu iha Bedois ne’e iha relasaun oituan ho movimentu grupu arte marsiais nian ne’ebe maka Governu deside taka permanenti ona.

“Ami orienta ami nia komandu Munisipiu sira atu halao patrollamentu rutina para antisipa movimentu sira ne’e,” Faustino mensiona hikas.

akontesimentu seluk maka iha area Postu Administrativu Vemasse, Munisipiu Baucau, iha Joven balun ne’ebe maka tuda kareta nune’e mós iha Munisipiu Bobonaro, Postu Administrativu Maliana mosu grupu rua halao konfrontasaun ba malu hodi halo komunidade sira ne’ebe maka atu ba tau aifunan iha rate halai namkari.

Konaba situasaun jeral iha rai laran, liu-liu loron Finadu nian ne’e lao normal la iha akontesementu ne’ebe maka afeita ba movimentu komun nian.

Iha sorin seluk, Komandante Munisipiu Baucau Superintendenti Justino Menez hateten, joven nain rua ne’ebe maka hetan kanek oras ne’e halao hela tratamentu iha Hospital Referal Baucau no Polisia detein joven nain rua seluk.

“Hau simu informasaun husi komandante eskuadra katak, katak joven nain tolu ho motor ba insulta polisia ho liafun tolok, dudu polisia no baku mak sira ho meus rekursu salva aan husi joven nain, entaun polisia tiru kanek,” dehan Justino via telefone.

Aman husi vitima Doli, Vitoriano Ximenes hatete, nia lamenta tebes ho hahalok polisia nian tamba tiru kanek joven sira la iha konsiderasaun hanesan ema.

“Hau lamenta tebes ho hahalok polisia, se karik joven sira nee halo sala ou halo krime sira bele foti medida seluk hasoru sira maibe laos ho tiru,” Vitoriano afirma tan. Eus

.