PM Rui keisa ona ba MP hasoru Media

.

Jornal Nacional Diário - 19 de novembro de 2015

Primeiru Ministru (PM), Rui Maria de Araújo, hato’o ona keisa ba Ministeriu Publiku (MP), relasiona ho publikasaun media nasional balun ne’ebe hateten,   diskonfia Xefi Governu sai hanesan asesor iha Ministeriu Finansas tinan hirak liu ba fo projetu ka asina rekomendasaun ba kompañia ida husi Indonesia.

Publikasaun   informasaun kona-ba PM Rui nian ne’e iha edisaun 10 Novembro 2015 iha media Jornal balun   ne’ebe maka ejisti iha Timor Leste.

“Ha’u hateten ona keisa ha’u aprezenta tiha ona, agora husik Prokurador sira maka haree,”esplika Primeiru Ministru (PM) Rui Maria de Araújo ba Jornalista hafoin abertura enkontru jeral FONGTIL iha salaun Kongregasaun Madres Canosiana Becora, Dili, Kuarta (18/11).

Iha parte seluk, Diretur Ezekutivu Luta Hamutuk, Mericio Akara hateten, keisa PM Rui Maria de Araújo ba MP ne’e, nia direitu.

“Nia nudar sidadaun, nia iha direitu atu klarifika bainhira notisia ruma maka ladun diak, negative ba nia no ladun iha baze, nia direitu atu kestiona,”dehan Akara.

Tuir Akara, haree fila fali ba politiku nain ida maka tenke tetu atu labele iha impresaun seluk hanesan presaun politika ba Media. Maibe nudar sidadaun haree notisia ne’e maka soke itoan nia (PM Rui), nia bele keisa, maibe la’os tanba tendensia politika halo presaun ba Media ne’e labele.

“Entaun   ita ladun fo espeasu ona ba liberdade expresaun liu-liu Media, maibe nudar pesoal bele,”tenik Akara. Avi

.