Surat ne'ebé ha'u haruka ohin ba Sr. Primeiro-Ministro kona-bá tratamentu moras kankru susun

.

Foto de Paróquia de Laleia - Facebook

Frei Hermano Filipe - Pároco da Paróquia de Laleia - Facebook

Surat (nakloke ba públiku) ne'ebé ha'u haruka ohin ba Sr. Primeiro-Ministro kona-bá tratamentu moras kankru susun:

EXMO. DR. RUI ARAÚJO

Médiku no Primeiro-Ministro da RDTL

Excelência,

Ho haraik-án ha’u atan-brani atu hakerek no inkomoda Ita-Boot, la’ós atu husu saída de’it ba ha’u rasik – tanba «Oan Mane la mai atu ema serbi Nia, maibé atu serbi ema, no atu saran Nia moris atu soi ema hotu» (Mc 10,45), – maibé atu buka empresta ha’u-nia nia lian ba hirak ne’ebé demokrasia seidauk fó lian. Ha’u koalia kona-bá feto-sira ne’ebé moras kankru susun.

Ohin dadeer, ha’u sei servisu hela mesak iha kartóriu parokiál no haree señora ida hakbesik daudaun ha’u-nia knaar fatin. Iha ha’u-nia fuan laran ha’u hatene ona katak nia mai atu dehan katak nia mamã iis hotu. Ha’u loke odamatan no nia la presiza hateten buat ida; nia matan-bén mak koalia. Dª J.X. luta hasoru kankru susun durante tinan ruma nia laran. Ohin mate. Durante tinan ruma nia laran nia buka ema barak nia tulun no ha’u hanoin katak nia hetan duni ema ne’ebé buka tulun nia ho ai-morok tradisiunál no ema profisiunál iha ospitál.

Maibé Sr. Primeiro-Ministro, nu’udar médiku, hatene di’ak liu fali ha’u katak moras kankru susun, iha Timor-Leste, ita bele de’it hamoos infeksaun no hamenus ema nia terus ho análjéziku, maibé kimioterapia no radioterapia, ne’ebé iha susesu natoon iha mundu hodi trata moras kankru, bainhira kankru seidauk da’et ba orgaun sira seluk (metástases), iha Timor-Leste seidauk bele halo tanba tratamento onkolójiku seidauk iha.

Durante fulan sira ikus ne’e, Igreja nafatin iha nia sorin. No maski ohin loron triste, ha’o haksolok hodi haree katak dala hirak ne’ebé ha’u, ka ha’u-nia misiunária-sira ba vizita nia, ami nunka hetan nia mesak! Nia oan no família balun sempre hamutuk ho nia kalan-loron hodi tau matan ba nia, atu nia bele moris nia loron-sira ikus no mate ho dignidade tomak. Maibé Sr. Primeiro-Ministro hatene katak infelizmente ema balun mak moras no mate kuaze mesak no ema barak mosu de’it bainhira ema mate tiha ona no karau tau ona iha meza leten. No ita rasik haree katak karreta metan, ne’ebé lori mate-isin, hala’i iha lurón no kondutór-sira respeita liu fali duke ambulánsia ho ema moris ne’ebé tenke to’o lalais iha ospitál! Buat ruma lalós! Kultura ne’ebé valoriza ema nia moris di’ak! Maibé kultura ne’ebé hatún ema nia dignidade, la’ós kultura, maibé hanesan “matadouro”!

Excelénsia, ha’u la fó sala ba ema ida ka ba instituisaun ida. Maibé, iha tempu ne’ebé Governu diskute hela Orçamento Geral do Estado – desculpa, ha’u ladún hatene se aprova tiha ona ka la’e tanba besik tinan tolu ha’u la loke televisaun – ho haraik-án, atan ha’u hanoin katak tratamento onkolójiku – ba ema moras kankru – mos tenke sai prioridade.

Konkretamente, iha buat ne’ebé refere ba kankru susun, ita hatene katak dala ruma feto-sira haree hetan fissura ruma iha sira-nia susun maibé moe no tauk, no bainhira infeksaun boot ona mak sira halai ba ai-moruk tradisunál ka ba ospitál.

Sira la sala ida tanbá ema la iha obrigasaun atu hatene buat ne’ebé seidauk aprende ka buat ne’ebé ema seluk seidauk hanorin. Ita, ne’ebé hatene, mak tenke hadia sistema diagnóstiku tambá iha ita-nia rai doben iha ona doutor no enfermeiru barak ho matenek no kapasidade atu halo diagnóstiku, maibé hodi uza meios rudimentares (hanesan apalpasaun); ne’e duni ha’u mos haree ho esperança planu governu nian atu tama uma sai uma vizita famílias; hein katak hosi vizita ne’e bele mosu mos diagnóstiku ba moras oioin hodi trata ho tempu.

Sr. Primeiro-Ministro, tinan kotuk ha’u representa Bispo Baucau nian iha konferénsia ida iha Díli hodi koalia kona-bá Incesto nu’udar problema morál grave. Iha momento ne’ebá, iha ministru-sira balun no autoridades bar-barak nia oin – atan ha’u ne’ebé toman hela de’it iha sukaer-laran – dehan katak enkuanto ita la hadomi no respeita ema, liuliu ema moras no vítima-sira, hanesan ita respeita no halo kontinénsia ba bandeira nasiunál RDTL, entaun ita seidauk kompreende loloos bandeira Timor ne’e katak sá!

Sr. Primeiru-Ministru, juramentu Hipócrates nian, ne’ebé Ita-Boot halo nu’udar doutor, ba ha’u folin liu fali duke juramento nu’udar Primeiro-Ministro, no Ita-Boot ne’ebé matenek no sensível liu kompreende tansá. Ema ne’ebé halai ba matebian-sira nia uma tanba de’it atu han naan karau sira labele kompreende, maibé Dr. Rui Araújo kompreende buat ne’ebé ha’u koalia.

Orsida, tuku 8,00 kalan, ha’u sei selebra Eukaristia iha uma ne’ebé ema tau matan ba Dª J.X. durante fulan-sira ne’e no ha’u sei hanoin feto-sira hotu iha Timor-Leste ne’ebé moras kankru susun. Sira balun hatene katak moras, balun la hatene; maibé buat ne’ebé sira hotu hatene mak sira seidauk bele hetan tratamento ba sira-nia moras ne’e iha sira-nia nasaun rasik. Inan sira-ne’e moras kankru susun, susun ne’ebé habosu kosok-oan sira ho susu-bén, susun ne’ebé loron ida habosu ita hotu, ne’ebé ohin iha ne’e, hamrrik no goza moris. Susu ne’ebé, em certo sentido, mos harii Timor-Leste! Ita hakarak dezenvolve Timor hodi haluha buat ne’ebé importante liu, entaun dezenvolvimentu ne’e ba sé lós!? Feto-sira ho kankru susun mos tenke sai ita-nia bandeira! Enkuntu ita halo kontinensia ba hena ida maibé trata hanesan ne’e ita-nia inan-sira, deskulpe Sr. Primeiru-Ministru, maibé ita desrespeita fali ita-nia bandeira, tanba ita-nia bandeira no rai doben harii hosi ema nia luta no Fé. Ohin, ha’u-nia kontinénsia no orasaun ba bandeira ne’e, ne’ebé toba hela ona ba nafatin, ita hein, iha Aman Maromak nia Futar Oin!

Obrigadu ba Ita-Boot nia atensaun no simu karik surat ne’e, bele reza iha komuñaun ho ami, ohin, tuku 8,00 kalan no, karik, bele mos halo kontinénsia ba bandeira ne’e. Ita-nia inan-sira hotu!

Ho respeitu no domin, no hodi husu Na’i Feto Rozáriu Laleia nia harohan da’et ba Ita-Boot,

Laleia, 24 outubru 2015

Frei Hermano Filipe

Pároco da Paróquia de Laleia

.