PN husu relatoriu implementasaun Lian Materna

.

Jornal Nacional Diário -22 de outubro de 2015

Membru Parlamentu Nasional (PN) husu Ministeriu Edukasaun (ME) atu aprezenta relatoriu implementasaun projeito pilotu lian materna iha Munisipiu Manatuto, Lautem ho Oecusse.

“Kona ba projeitos pilotus linguas maternas ne’ebe la’o kleur ona iha relatorio prontu tiha ona ka seidauk, relatorio ne’e publiku no ami bele asesu ka lae,” hateten Deputada bankada Partidu Demokratiku (PD), Maria Lurdes Bessa liu husi debate publiku Ministeriu Edukasaun ho membru PN, Kuarta (21/10/2015).

Iha parte seluk, reprezentante povu iha uma fukun Parlamentu Nasional kestiona mos kona ba kualidade de ensinu ninian, tanba kuaze maioria estudante barak mak ladun hatene hakerek no le.

“Hau atu husu klarifikasaun katak, Ita hare tuku 10 dader iha dalan ninin tantu husi kapital Dili no mos areas rurais sira, estudante sira la’o iha dalan ho farda eskola kompletu, signifika katak tempu ne’ebe sira pasa iha sala de aula ladun sufiente hodi sira bele aprende lolos no konhesementu ruma,” kestiona Deputada Bessa.

Deputada ne’e kestiona la’os koalia deit, maibe nia rasik hare ho matan duni bainhira hala’o viagem ba municipiu.

“Hau la’os koalia deit, maibe pesoalmente hau akompanha duni hau haree katak frekuentemente professor sira falta iha eskola hodi abandona alunus sira, pior liu maka alunu ida hau rasik akompanha nia terceiro klasse tiha ona maibe hakerek ninia naran rasik mos seidauk hatene,” hateten Deputada Besa.

Nia afirma katak, koalia kualidade de ensinu jero tebes, li-liu iha munisipiu sira, tanba deit professores sira ladun ativu hodi hanorin didiak.

Hatan ba preukupasaun ne’e, Ministru Edukasaun, Antonio da Conceição rekonhese katak lian materna sai mos preukupasaun Ministeriu nian.

“Hau hanoin la’os problema lingua materna ne’ebe ita hotu konsidera, maibe metodu ne’ebe edukasaun opta atu bele hanorin estudante sira iha eskola, ida ne’e maka agora dadauk ne’e la’o hela, maibe ita sei iha difikuldade iha lingua ba professor no alunu, tanba ne’e maka modalidade ne’ebe mak agora dadauk professor sira tenke iha kreatividade hodi uja lingua atu fasilita estudante hodi bele aprende,” hateten Ministru Edukasaun.

Primeira vise Ministru Dulce de Jesus promete katak, remata debate sira sei haruka kedas relatorio mai PN. mia

.