Partidu timoroan sira sei presiza asinatura rihun 20 hodi bele inskreve

.

SAPO TL ho Lusa - 28 de outubro de 2015

Parlamentu Nasionál horisehik aprova alterasaun lei partidu sira ne’ebé obriga ho forsa polítika foun atu iha pelumenus asinatutra rihun 20 hodi bele inskreve, liu dala 13 duké uluk.

Aleinde aumenta númeru asinatura ne’ebé presiza atu partidu polítiku ida bele inskreve – sira ne’ebé liu hosi 1.500 ba rihun 20 – ne’e hanesan mós ho ezije atu munisípiu ida hosi 13 pelumenus iha asinatura rihun ida.

Rekorda katak, to’o oras ne’e, lei define de’it katak signatáriu sira "proporsionalmente tenke distribui iha nasaun".

"Inskrisaun partidu polítiku ida nian rekere, pelumenus, sidadaun rihun 20, mak inskreve iha resenseamentu eleitorál, iha gozu totál ba sira-nia direitu sivíl no polítiku, hosi munisípiu hotu, rekerimentu tenke subskreve hosi, pelumenus, sidadaun ruhun ida mak rejistu iha kada munisípiu", refere lei foun ne’e.

Hirak ne’e mak aspetu signifikativu liu hosi proposta lei ne’ebé altera Lei Partidu sira Timor-Leste nian, mak iha desde jullu 2004.

Proposta lei ne’ebé aprova hosi Governu iha fulan abril, altera totál artigu 11hosi lejislasaun anteriór entre sira ne’e mak artigu 6 kona-ba dirijente partidu polítiku sira-nian, iha ne’ebé elimina tiha rekizitu iha lei orijinál mak uluk permite atu timoroan sira ne’ebé hela iha nasaun "ho nasionalidade orijinária" mak bele ezerse kargu.

Ho alterasaun ne’e dirijente polítiku sira tenke "sidadaun timoroan sira ne’ebé iha rezidénsia abituál iha territóriu nasionál" no inskreve iha resenseamentu eleitorál.

Iha artigu 7 habelar informasaun atu partidu sira tenke fornese ba Tribunál Rekursu, iha baze "prinsípiu hosi transparénsia" kona-ba dadus dirijente sira ne’ebé eleitu ba sira-nia órgaun nasionál.

Proibe mós atu partidu polítiku sira "halo koligasaun ida de’it, frente ka movimentu".

Haboot ezijénsia ba reprezentasaun partidu sira nian hodi obriga atu iha "nia sede nasionál iha kapitál Repúblika Demokrátika Timor-Leste, maibé, tenke, estabelese sede munisipál iha munisípiu ida-idak".

Aprova mós alterasaun ba artigu kona-ba finansiamentu partidu sira-nian, hodi bandu doasaun hotu (no la’ós de’it iha numeráriu, tuir lei anteriór) hosi empreza públika sira, sosiedade sira ho kapitál eskluzivu ka maioritariamente hosi Estadu no empreza konsesionária hosi servisu públiku.

Rekorda mós katak partidu sira la bele simu doasaun hosi "ema koletiva hosi utilidade públika ka sira ne’ebé dedika ba atividade benefisénsia ka ba relijiozu", hosi asosiasaun profisionál, sindikál ka patronál", hosi fundasaun ka "Governu ka ema koletiva estranjeira".

Alterasaun tam iha vigór hafoin publikasaun proposta lei iha Jornál Repúblika.

.