Julgamentu loron daruak, Advogadu la simu tradutor

.

Jornal Nacional Diário - 07 de outubro de 2015

Tribunal Distrital Dili (TDD), Tersa (06/10), tama ba loron daruak kontinua halo julgamentu ba arguida eis Ministra Finasas Emilia Pires ho eis Vise Ministra Saúde, Madalena Hanjam hodi rona testamunha kona ba sosa ekipamentu ba Hospital Nasional Guido Valadares (HNVG), Dili.

Maibe iha julgamentu ba loron daruak ne’e, mosu rekerimentu husi defeza arguida Emilia Pires nian ne’ebé husu atu nomeia rasik sira nia tradutor iha sala audensia para bele fasilita sira iha lingua nian. Pedidu ne’e, tuir advogadu Rui, sira bazeia ba artigu 83 kodigu penal, hodi bele fasilita sira, tanba sira la kompriende ho liafuan ne’ebe mak koalia husi tradutor tribunal nian.

Liu husi audensia julgamentu ba loron daruak ne’e, iha parte dader nian, ne’ebe tuir orariu tribunal rona deklarasaun husi sasin akuzasaun nain hitu ne’ebe mak notifika ona, maibe ajenda ne’e la konsege realiza iha tuku 9:00 to‘o tuku 12:00 meudia tanba autor judisiariu sira iha sala audensia ne’e presiza halo diskusaun kona ba rekerimentu ne’ebe mak hato’o husi advogadu Portugal arguida Emilia Pires nian.

Hatan ba pedidu ne’e parte Ministeriu Publiku la konkorda ho pedidu ne’e, tanba kuandu liga artigu 83 ho artigu 13 kodigu penal autor judisiariu hanesan juis, advogadu no prokurador tenki domina lian ofisial RDTL nian mak tetum ho portugues, tanba lian rua ne’e mak uza iha tribunal. Ho ida ne’e MP mantein pozisaun hodi husu ba tribunal atu kontinua ho julgamentu.

Depois parte defesa halo rekerementu no MP halo depoimentu hodi la konkorda pedidu ne’e. Tribunal suspende 10 minutu hodi reuni juis kolektivu nian, hafoin halo despaisu ba pedidu ne’e.

Iha despaisu ne’e, tribunal mos la konkorda ho pedidu ne’ebe iha, tanba iha artigu 13 kodigu penal nian hatete katak lingua Tetum ho Portugues mak iha tribunal, laiha tan lian seluk no iha artigu 83 hatete tribunal sei bele nomeia fali tradutor seluk kuandu arguida, vitima no testamunha ne’ebe la hatete lian rua ne’e. Ne’ebe nomeasaun tradutor ne’e la’os interese autor judisiariu sira nian, tradutor nain tolu ne’ebe tribunal nomeia ne’e kualifikadu no halo ona juramentu ba sira nia funsaun antes mai iha tribunal, nunee iha biban ne’e tribunal mos mantein kontinua ho julgamentu.

Ho ne’e, liu husi audensia Julgamentu ba loron daruak ne’e, testamunha Manuel da Silva de Souza hanesan Xefi Departemenetu lojistika iha HNGV deklara katak, iha tinan 2011-2012 mais ou menus iha fulan Marsu nia laran Kompaña Mac’s Metal Craft Lda fornese kama ba Hospital Nasional 42 no kama hirak ne’ebe maka forenese ba iha HNGV kama kualidade hotu no laiha kama ida ne’ebe maka a’at ka tuan.

Sasin ne’e afirma tan katak, iha fulan Novembru 2012 kompañia refere fornese tan kama 80 ba hospital, no iha momentu ne’e parte Ministeriu Saude atu halo inspensaun ba sasan hirak ne’e Como kompañia refere lori nia ekipa tekniku rasik halo inspesaun haree katak sasan (kama) hirak ne’ebe maka fornese ne’e kondisaun diak hotu.

Tuir observasaun iha audensia julgamentu ba loron daruak Tersa (06/10), parte dader tribunal so rona deit pedidu sira husi advogadu arguida Emilia nian, no labele rona sasin sira so iha parte tuku 02 lorokraik mak foin rona sasin Xefi Logistika HNGV, Manuel da Silva de Souza.

Julgamentu ba arguida nain rua ne’e sei kontinua tan iha loron hirak tuir mai hodi rona tan sasin seluk ne’ebé parte jusidisiariu notifika ona.

Audensia ne’e prezide husi juis kolektivu Jose Maria de Araujo, Fransisca Cabral no Maria Solana Fernandes. Ministeriu Publiku prokuradora Angelina Saldanha, Lidia Soares no Jasintu Babo, no arguida Madalena Hanjam hetan asistensia legal husi advogadu privadu Jose Guteres, Nunu Morais Sarmos.

Entertantu arguida Emilia Pires hetan asistensia legal husi advogadu privadu Jose Pedro Camoes, Rui Costa Fereira ho Angelica Moniz.

Deputada Moe Ho Emilia-Madalena

Iha sorin seluk, Deputada sira iha Parlamentu Nasional (PN) sente moe haree feto maluk eis Ministra Finansas (MF), Emilia Pires ho eis Vise Ministra Saude (MS), Madalena Hanjam, ne’ebe hetan kondena husi Ministeriu Publiku (MP) involve iha kazu korrupsaun no abuzu poder.

Depuatada husi Bankada CNRT, Olinda Morais, nudar mos veterana ida, moe tebes haree kondenasaun MP nian hasoru feto maluk Emilia ho Madalena, tanba la hatudu exemplu diak ba feto jerasaun foun sira.

“Hau nudar Deputada no mos hanesan veterana ida, hau haree situasaun kona ba korupsaun ne’ebe mak komete husi ami nia feto maluk intelektuais rua, Emilia Pires ho Madalena Hanjam sente ladun diak no moe, nudar deputada hau hanoin katak inves sira hatudu ba ita nia foin sa’e sira ne’ebe preparadu akademikamente atu nune’e ba futuru la bele monu ba pratika sira ne’e, hau kontra tebes hahalok sira ne’e,” hateten Deputada Olinda Moras ba Jornalista sira iha Parlamentu Nasional, Tersa (06/10/2015).

Deputada Olinda ne’ebe hanesan mos veterana kontra maka’as atetude Emilia no Madalena nian. Tanba feto maluk sira uluk luta to’o fo an ba mate soi ukun rasik-an ne’e la’os atu haki’ak koruptor, maibe fo moris diak ba povu ho nasaun ida ne’e.

Deputada ne’e konsidera Emilia no Madalena laiha esperitu nasionalismu no patriotismou. Tanba ne’e, wanhira kondenasuan Tribunal nian hateten duni sira komete korupsaun, maka tenke ba sulan iha komarka Gleno.

Iha fatin hanesan, Deputada Albina Marçal ne’ebe hanesan mos Vice Prezidenti Grupu Mulher Parlamental Timor-Leste (GMPTL) realsa katak, nia pesoalmente seidauk hatene lolos kazu ne’ebe mak komete husi Emilia Pires ho Madalena Hanjam. Infleismente, media foin maka fo sai akuzaun husi MP nian ne’ebe seidauk iha desizaun Tribunal.

“Nudar Vise Prizidenti GMPL, hau lamenta no triste tebes hare hau nia feto maluk nain rua komete kazu korupsaun, tanba ita nudar feto hatudu dignidade ne’ebe mak diak nudar feto no nudar inan edukadora,” hateten Deputada Albina Marçal.

Deputada bankada CNRT ne’e mos dehan aktu ne’ebe mak komete husi eis membru Governu nain rua hatun dignidade feto TL.

“Sira nain rua nia aktu ne’e hatun tebes dignidade feto Timor, li-liu sira ne’ebe mak hanesan lider, maibe husu ida-idak ninia responsabiliza tuir ninia hahalok ne’e iha Tribuinal,” Albina afirma tan.

Iha fatin hanesan, Deputada Bendita Magno, sujere ba arguida nain rua katak, se sente komete duni aktu ne’e husu atu kopera ho justisa.

“Hau hanoin katak so tribunal mak bele deside, tanba ema hot-hotu iha dereito atu kopera ho justisa, mesmu nia feto ka mane hanesan deit, tanba ita bain-bain dehan balansu jeneru. Sekarik nia komete duni erru ne’e tenke kopera ho justisa hodi nune’e bele hato’o lia los,” hateten Deputada Bendita.

“Hanesan feto hau mos sente triste tebes, tanba iha sentimentu, maibe ema ida-idak ho nia prifasidade rasik no nia lalaok rasik, tanba ne’e maka hau hanesan mos feto hakarak fo korazen ba sira hodi kopera ho justisa, tanba tribunal mak deside sira nia sala,” dehan nia.

Emilia Pires no Madalena Hanjan deskonfia komete krime korupsaun, tanba ne’e maka oras ne’e dadauk Tribunal Distrital Dili (TDD) halo hela julgamentu hasoru sira.des/mia

.